ఇంతకీ మీ చాయ్ ఆరోగ్యకరమైందేనా?
మన దేశంలో 64 శాతం మంది క్రమం తప్పకుండా టీ ని తాగుతున్నారని పలు నివేదికలు వెల్లడిస్తున్నాయి. ఇది బానే ఉన్నా.. అసలు మనం తాగే చాయ్ మన ఆరోగ్యానికి మంచి చేస్తుందా? చెడు చేస్తుందా?
మన దేశంలో చాయ్ ప్రియులు చాలా మందే ఉన్నారు. 64 శాతం మంది భారతీయులు రెగ్యులర్ గా టీ తాగుతున్నారని నివేదికలు చెబుతున్నాయి. అంటే మన దేశంలో దాదాపుగా ప్రతి ఇల్లు రోజుకు కనీసం ఒక కప్పు టీని తయారుచేస్తుందన్న మాట. అయితే టీ లో చాలా రకాలే ఉన్నాయి. అల్లం టీ, బాదం టీ, బ్లాక్ టీ, మసాలా టీ అంటూ రకరకాల టీలు అందుబాటులో ఉన్నాయి. నీళ్లు, టీ ఆకులు, చక్కెర, పాలు, అల్లం, ఇతర మసాలు దినుసులతో నచ్చినట్టుగా టీని తయారుచేసుకుని తాగుతుంటారు. నిజానికి టీ మన ఆరోగ్యానికి అంత మంచిది కాదు. ఇది ఎన్నో రోగాలకు దారితీస్తుందని నిపుణులు చెబుతున్నారు.
మన దేశంలో చాలా మంది భోజనానికి ముందే టీని తాగుతుంటారు. దీనివల్ల ఆకలి తగ్గుతుంది. అలాగే గట్ ద్వారా శోషణను అడ్డుకుంటుంది. ఆకలిని తగ్గించమంటే పోషణను పరిమితం చేయడమే అవుతుంది. అలాగే ఆమ్లత్వం, ఇతర జీర్ణ సమస్యలకు కూడా దారితీస్తుంది.
టీలో కెఫిన్ కంటెంట్ ఎక్కువగా ఉంటుంది. ఇది రక్తపోటును పెంచుతుంది. అలాగే నిద్రసమస్యలకు దారితీస్తుంది. చక్కెర ఎక్కువగా ఉండే ఆహారాలు మీ శరీర బరువును పెంచుతాయి. జీవక్రియ సిండ్రోమ్ బారిన పడే ఛాన్సెస్ కూడా ఉన్నాయి. ఇది డయాబెటీస్, గుండె జబ్బుల ప్రమాదాల్ని పెంచుతుంది.
ఎక్కువ మొత్తంలో టీ తాగడం వల్ల ప్యాంక్రియాస్ పనిచేయడం కష్టమవుతుంది. దీనివల్ల నిద్రలేకపోవడం, రక్తంలో చక్కెర స్థాయిలు పెరగడం, ఇన్సులిన్ నిరోధకత, విశ్రాంతి లేకపోవడం వంటి సమస్యలు వస్తాయి.
ప్రమాదాలు ఏంటి?
ఎక్కువ చక్కెర వినియోగం ఆరోగ్యానికి అంత మంచిది కాదు. ఎందుకంటే ఇది శుద్ధి చేసిన కార్భోహైడ్రేట్. ఇది మన రక్తంలో సులువుగా కలిసిపోతుంది. అలాగే రక్తంలో చక్కెర స్థాయిలను పెంచుతుంది. ఎక్కువ సేపు మరిగించిన ఇండియన్ మసాలా టీ పోషకాలను శరీరంలోకి గ్రహించకుండా చేస్తుందని నిపుణులు చెబుతున్నారు.
టీని ఎప్పుడు తాగకూడదు
ఒకవేళ మీకు డయాబెటీస్ ఉన్నా.. ప్రీ డయాబెటీస్ ఉన్నా, బరువును తగ్గించుకోవాలనుకున్నా.. టీని తాగకూడదు.
పోషకాహార లోపం వల్ల బలహీనంగా ఉన్నా తాగకూడదు.
అధిక రక్తపోటు వంటి వ్యాధులు ఉంటే కూడా..
మీరు తరచుగా ఎసిడిటీ, మలబద్దకంతో బాధపడుతుంటే కూడా టీకి దూరంగా ఉండాలి.
టీకి ప్రత్యామ్నాయం ఏంటి?
టీని తాగకుండా నేను ఉండలేను అనే వాళ్లు చాలా మందే ఉన్నారు. కానీ టీ ఆరోగ్యానికి అస్సలు మంచిది కాదు. దీనివల్ల ఎన్నో అనారోగ్య సమస్యలు వస్తాయి. అందుకే పాలు కలిపిన టీకి బదులుగా గ్రీన్ టీని తాగడం మంచిది. నిజానికి గ్రీన్ టీ ఆరోగ్యానికి ఎంతో మేలు చేస్తుంది. ఎందుకంటే గ్రీన్ టీని ఎక్కువ సేపు మరిగించరు. దీంతో ఇది టానిన్ ను రిలీజ్ చేయదు. దీనిలో యాంటీ ఆక్సిడెంట్ లక్షణాలు ఉంటాయి. ఇది బరువు తగ్గడానికి, గుండెను ఆరోగ్యంగా ఉంచడానికి, జీవక్రియను పెంచడానికి సహాయపడుతుంది.