కాలిన గాయాలు, చిన్న చిన్న దెబ్బలు తొందరగా మానడానికి వంటింటి చిట్కాలు మీ కోసం..

కూరగాయలు కోస్తున్నప్పుడు వేళ్లు కట్ కావడం, వంట చేస్తున్నప్పుడు చేతులు కాలడం సర్వ సాధారణ విషయం. అయితే కొన్ని వంటింటి చిట్కాలతో ఈ గాయలను చాలా తొందరగా నయం చేసుకోవచ్చు.  

కూరగాయలను కట్ చేస్తున్నప్పుడు మనమెంత జాగ్రత్తగా ఉన్నా.. ఎప్పుడో ఒకసారి వేళ్లు కొద్దిగా తెగుతుంటాయి. కొందరైతే చాకులతో కూరగాయలను కట్ చేస్తూ.. పెద్ద పెద్ద గాయలను చేసుకుంటారు. అలాగే వంట చేసేటప్పుడు కూడా చేతులు, వేళ్లు కాలుతుంటాయి. ఇది సర్వ సాధారణ విషయం. ఇకపోతే పిల్లలు ఆడకుంటూ కూడా చేతులకు, కాళ్లకు గాయాలు చేకుంటారు. తెగిన, కాలిన గాయాల వల్ల ఇతర పనులను చేసుకోవడం చాలా కష్టం. ఇవి అంత సులువుగా మానవు కూడా. చిన్న చిన్న గాయాలకు హాస్పటల్ కు వెళ్లాలనిపించదు. నిజానికి ఇలాంటి చిన్న గాయాలకు మీరు హాస్పటల్ కు వెళ్లాల్సిన అవసరం ఎంతమాత్రం లేదు తెలుసా? మీ వంటగదిలోని కొన్ని పదార్థాలతో ఈ గాయాలను చాలా సులువుగా తగ్గించుకోవచ్చు. అదెలాగో ఇప్పుడు తెలుసుకుందాం.. 

చల్లని నీరు

వంట చేసేటప్పుడు మీ వేళ్లు కాలిపోయిన సందర్భాలు చాలానే ఉండి ఉంటాయి. లేదా వేడిగా ఉన్నవాటిని మీ పిల్లలు ముట్టుకుని గాయాలు చేసుకున్న సందర్భాలు కూడా ఉండొచ్చు. మీకైనా, మీ పిల్లలకైనా  చిన్నపాటి కాలిన గాయం అయితే.. మీరు చేయాల్సిన మొదటి పని 20 నిమిషాల పాటు కాలిన ప్రదేశాన్ని చల్లగా ఉంచండి. అంటే నీళ్లలో మాత్రం పెట్టకండి. గాయానికి చల్లని గాలి తగిలేలా చూసుకోండి. ఆయిల్ వల్ల కాలినట్టైతే  ఆ ప్రాంతాన్ని తేలికపాటి సబ్బు, నీటితో కడగండి.

కూల్ కంప్రెస్ లు

కాలిన ప్రదేశంపై చల్లని కంప్రెస్ లేదా శుభ్రమైన తడి గుడ్డను పెట్టండి. ఇది నొప్పి, వాపు నుంచి ఉపశమనం పొందటానికి సహాయపడుతుంది. కోల్డ్ కంప్రెస్లను ఎక్కువగా ఉపయోగించకుండా ఉండటానికి ప్రయత్నించండి.  ఎందుకంటే ఇది చికాకును, ఎక్కువ మంటను కలిగిస్తుంది.

పసుపు

పసుపు ఒక శక్తివంతమైన వంటింటి పదార్ధం. ఎందుకంటే పసుపులో ఎన్నో ఆరోగ్య ప్రయోజనాలు ఉన్నాయి. అందుకే పసుపు ఎల్లప్పుడు వంటింట్లో తప్పకుండా ఉండేట్టు చూసుకోవాలి.  ఉపయోగకరమైన, ప్రభావవంతమైన పసుపులో గొప్ప శోథ నిరోధక, క్రిమినాశక, యాంటీ బాక్టీరియల్ లక్షణాలు ఉంటాయి. పసుపులో ఉండే హీలింగ్ ఏజెంట్స్ త్వరగా నయం కావడానికి సహాయపడతాయి. చిన్న చిన్న గాయాలు, తెగిన గాయాలపై ప్రథమ చికిత్సగా దీనిని ఉపయోగించొచ్చు. దీన్ని పెట్టడం వల్ల మీ చర్మంపై ఏదైనా ఇన్ఫెక్షన్ పెరగకుండా నిరోధించబడుతుంది. 

కలబంద

కలబందను  "బర్న్ ప్లాంట్" అని కూడా అంటారు. కలబందలో యాంటీ ఇన్ఫ్లమేటరీ లక్షణాలు ఉంటాయి. ఇవి రక్త ప్రసరణను మెరుగుపరుస్తాయి. ఇది బ్యాక్టీరియా పెరుగుదలను నిరోధిస్తుందని నిపుణులు చెబుతున్నారు. ఒకవేళ మీకు  కాలిని గాయాలు లేదా ఇతర గాయాలైతే స్వచ్ఛమైన కలబంద జెల్ అక్కడ అప్లై చేయండి. ఒకవేళ మీరు దుకాణం నుంచి కలబందను కొనుగోలు చేస్తే.. అందులో అధిక శాతం కలబంద ఉందని నిర్ధారించుకోండి.

తేనె

తేనె రుచిగా ఉండటమే కాదు ఎన్నో అనారోగ్య సమస్యలను తగ్గించడానికి సహాయపడుతుంది. ముఖ్యంగా ఇది చిన్న చిన్న గాయలను, మంటను నయం చేయడానికి కూడా సహాయపడుతుంది. తేనెలో యాంటీ ఇన్ఫ్లమేటరీ, యాంటీ బాక్టీరియల్, యాంటీ ఫంగల్ లక్షణాలు ఉంటాయి. ఇది కాలిన గాయాలను, దెబ్బలను తగ్గిస్తుంది.