మీకిది తెలుసా..? శరీరంలో ఈ పోషకాలు లోపిస్తే కూడా రాత్రిళ్లు అస్సలు నిద్రరాదు..
మనం తీసుకునే ఆహారంలో ఉండే కొన్ని పోషకాలు నిద్రరావడానికి సహాయపడతాయని పలు అధ్యయనాలు చెబుతున్నాయి. అయితే కొన్ని రకాల పోషకాల లోపం నిద్రలేమికి దారితీస్తుందని పోషకాహార నిపుణురాలు నవమి అగర్వాల్ అంటున్నారు.
మనం నిండు నూరేళ్లు ఆరోగ్యం, సంతోషంగా జీవించాలంటే నిద్ర చాలా అవసరం. ఒకవేళ మీరు తక్కువ గంటలు నిద్రపోతే మాత్రం శారీరక ఆరోగ్యంతో పాటుగా.. మానసిక ఆరోగ్యం కూడా దెబ్బతింటుంది. ఒత్తిడి, పనులు, డిప్రెషన్ వంటి ఎన్నో కారణాల వల్ల నిద్ర ఉండదు. కానీ ఈ నిద్రలేమి సమస్యను ఎక్కువ కాలం ఫేస్ చేస్తే మీ లైఫ్ టైం తగ్గే అవకాశం ఉంది. ఎందుకంటే ఇది ప్రాణాంతక రోగాలకు దారితీస్తుంది. అయితే మనం తినే ఆహారంలోని కొన్ని పోషకాలు నిద్రను ప్రభావితం చేస్తాయని పలు అధ్యయనాలు వెల్లడించాయి.. కొన్ని పోషకాలు, విటమిన్లు శరీరంలో లేకపోవడం కూడా నిద్ర లేమికి దారితీస్తుందని ఇన్ గ్రామ్ వేధికగా న్యూట్రిషనిస్ట్ నవమి అగర్వాల్ చెప్పారు. అవేంటో ఇప్పుడు చూద్దాం...
మెగ్నీషియం
నవమి అగర్వాల్ ప్రకారం.. శరీరంలో మెగ్నీషియం లోపిస్తే కూడా నిద్రలేమి సమస్య వస్తుంది. అందుకే మీరు తినే ఆహారంలో మెగ్నీషియం ఎక్కువగా ఉండే ఆహారాలను చేర్చుకోవాలి. మెగ్నీషియం ఒత్తిడిని తగ్గిస్తుంది. రక్తపోటును నియంత్రిస్తుంది. అలాగే రాత్రిళ్లు హాయిగా పడుకునేందుకు సహాయపడుతుంది కూడా. బచ్చలికూర, సోయా, బంగాళాదుంపలు, అవోకాడోల్లో మెగ్నీషియం ఎక్కువ మొత్తంలో ఉంటుంది.
విటమిన్ డి
విటమిన్ డి లోపం వల్ల ఎముకలు, దంతాలు బలహీనంగా అవ్వడమే కాదు ఇది నిద్రలేమికి కూడా దారితీస్తుంది. మన శరీరంలో విటమిన్ డి.. కాల్షియం శోషణకు సహాయపడుతుంది. ఈ విటమిన్ డి వల్లే ఎముకలు, దంతాలు ఆరోగ్యంగా పెరుగుతాయి. బలంగా ఉంటాయి. అంతేకాదు విటమిన్ డి రోగనిరోధక శక్తిని పెంచడంలో కీలక పాత్ర పోషిస్తుంది. ఇతర విటమిన్ల మాదిరిగా. విటమిన్ డి కేవలం ఆహారాల ద్వారే కాదు సూర్య రశ్మి ద్వారా కూడా లభిస్తుంది. నిపుణుల ప్రకారం.. విటమిన్ డి లోపం కూడా నిద్రలేమికి కారణమవుతుంది. పాలు, పెరుగు, వెన్న, జున్ను వంటి పాల ఉత్పత్తుల్లో విటమిన్ డి పుష్కలంగా ఉంటుంది. ప్రోటీన్ పుష్కలంగా ఉండే గుడ్డు పచ్చసొనలో కూడా విటమిన్ డి ఉంటుంది. చేపల్లో కూడా విటమిన్ డికి ఏ కొదవా ఉండదు. ముఖ్యంగా సాల్మన్ చేపలు విటమిన్ డికి మంచి మూలం. పుట్టగొడుగుల్లో కూడా విటమిన్ డి ఉంటుంది. వీటిలో కొవ్వు తక్కువగా ఉంటుంది. కానీ పోషకాలు మాత్రం ఎక్కువ మొత్తంలో ఉంటాయి. అలాగే తృణధాన్యాలు, చిక్కుళ్లను తింటే కూడా విటమిన్ డిని పొందుతారు.
calcium
కాల్షియం
కాల్షియం లోపం కూడా నిద్రలేమికి దారితీస్తుంది. కాల్షియం ఎక్కువగా ఉండే ఆహారాన్ని తింటే నిద్ర రుగ్మతలన్నీ తొలగిపోతాయి. అందుకే కాల్షియం ఎక్కువగా ఉండే పాలు, పెరుగు వంటి పాల ఉత్పత్తులను మీ రోజు వారి ఆహారంలో చేర్చుకోండి.
vitamin b12
విటమిన్ బి 12 లోపం
పోషకాహార నిపుణురాలు నవమి అగర్వాల్ ప్రకారం.. విటమిన్ బి 12 లోపం కూడా నిద్ర లేమి సమస్యకు దారితీస్తుంది. అందుకే విటమిన్ బి12 ఎక్కువగా ఉండే చేపలు, గుడ్లు, చికెన్ వంటి ఆహారాలను తరచుగా తింటూ ఉండండి.
ఒమేగా 3 ఫ్యాటీ ఆమ్లాలు
మన శరీరానికి ఒమేగా -3 కొవ్వు ఆమ్లాలు చాలా అవసరం. ఇవి మనలో లోపిస్తే కూడా నిద్రలేమి సమస్య వస్తుంది. అందుకే ఒమేగా-3 ఫ్యాటీ యాసిడ్స్ ఎక్కువగా ఉండే సాల్మన్ వంటి చేపలను, అవిసె గింజలు వంటి ఆహారాలను రోజూ తినండి.