Diabetes: మధుమేహులు ఈ టీ తాగితే రక్తంలో చక్కెర స్థాయిలు నియంత్రణలో ఉంటాయి..

Diabetes: అల్లం టీ షుగర్ పేషెంట్లకు ఎంతో మంచిది. దీన్ని తాగడం వల్ల వారి రక్తంలో షుగర్ లెవెల్స్ నియంత్రణలో ఉంటాయి. ఇది గ్తైసెమిక్ ను కూడా కంట్రోల్ లో ఉంచుతుంది. 

ఆహారంతో పాటుగా టీ కూడా మన దినచర్యలో ఒకభాగమైపోయింది. అయితే టైప్ 2 డయాబెటీస్ తో బాధపడేవారికి టీ మంచి చేస్తుందా? చెడు చేస్తుందా? అన్న ముచ్చట తెల్వకుండా తాగేస్తుంటారు. పాలు, చక్కెరతో తయారుచేసిన టీ షుగర్ పేషెంట్లకు ఏ మాత్రం మంచిది కాదు. టీ తయారు చేయడానికి మనం ఉపయోగించే పాలలో చక్కెర స్థాయిలను పెంచే కొన్ని ఐజిఎఫ్ అణువులు ఉంటాయి. టీ లో పంచదార కలిపి తాగితే రక్తంలో షుగర్ లెవెల్స్ విపరీతంగా పెరిగిపోతాయి. అందుకే మధుమేహులు పాలు, పంచదార కలిపిన టీకి దూరంగా ఉండాలని ఆరోగ్య నిపుణులు  సూచిస్తున్నారు. న్యూట్రిషనిస్ట్ కవితా దేవ్ గన్ మాట్లాడుతూ.. డయాబెటిస్ ఉన్నవారు ఆరోగ్యకరమైన టీ లను బేషుగ్గా తాగొచ్చు. వాటిలో పాలను మిక్స్ చేయకూడదు. మధుమేహులకు మేలు చేసే టీ లేంటో ఇప్పుడు తెలుసుకుందాం.. 

గ్రీన్ టీ...

దేవగన్ ప్రకారం.. మధుమేహలుకు గ్రీన్ టీ ఆరోగ్యకరమైనది. ఎందుకంటే దీనిలో ఎపిగాలోకాటెచిన్ గలేట్ (EGCG) ఉంటుంది. గ్రీన్ టీ కండరాల కణాలలోకి గ్లూకోజ్ శోషణను పెంచుతుందని నిపుణులు చెబుతున్నారు. 

 గ్రీన్ టీ లో కేలరీలు, షుగర్ కంటెంట్ చాలా తక్కువగా ఉంటుంది. కాబట్టి ఇది బరువు తగ్గడానికి కూడా సహాయపడుతుంది. అంతేకాదు రక్తంలో చక్కెర స్థాయిలను కూడా నియంత్రణలో ఉంచుతుంది. టైప్ 2 డయాబెటిస్ ప్రమాదాన్ని తగ్గించడానికి గ్రీన్ టీ గొప్పగా సహాయపడుతుంది. జర్నల్ ఆఫ్ న్యూట్రిషన్ అండ్ మెటబాలిజంలో ప్రచురితమైన అధ్యయనం ప్రకారం.. రక్తంలో గ్లూకోజ్ సాంద్రతలపై సానుకూల ప్రభావాన్ని చూపిందని కనుగొన్నారు.

అల్లం టీ

అల్లం టీని రోజూ తాగడం వల్ల ఇన్సులిన్ ఉత్పత్తి నియంత్రిణలో ఉండటమే కాదు.. రక్తంలో చక్కెర స్థాయిలు కూడా తగ్గుతాయి. అల్లం టీ గ్లైసెమిక్ నియంత్రణకు దారితీస్తుంది. కాబట్టి రక్తంలో చక్కెర స్థాయిలను నియంత్రించడానికి అల్లం టీ ఒక గొప్ప మార్గం.

అల్లం టీ జీర్ణ సమస్యలను కూడా తగ్గిస్తుంది. అల్లంలో జింగిబెర్ అనే ఒక సమ్మేళనం ఉంటుంది.  ఇది కడుపును బాక్టీరియల్ ఇన్ఫెక్షన్ల నుంచి రక్షిస్తుంది. అల్లంలో బ్యాక్టీరియాకు ను నాశనం చేసే పదార్థాలు ఉంటాయి. ఇవి శరీరాన్ని రక్షిస్తాయి.

దాల్చిన చెక్క టీ

దాల్చిన చెక్కను టీ కి జోడించి తీసుకుంటే మధుమేహుల ఆరోగ్యానికి ఎంతో మంచిది. ఎందుకంటే ఇది రక్తంలో చక్కెర స్థాయిలను నియంత్రణలో ఉంచడానికి ఎంతో సహాయపడుతుంది. అంతేకాదు ఇది కడుపును ఎక్కువ సేపు నిండుగా ఉంచుతుంది. దాల్చినచెక్క బరువు తగ్గడానికి ఉత్తమ పదార్ధాలలో ఒకటి. ఈ దాల్చిన చెక్క టీ  ఆరోగ్యకరమైన టీ కూడా. ఎందుకంటే దీనివల్ల ఎలాంటి దుష్ప్రభావాలు లేకుండా బరువు సులువుగా బరువు తగ్గడానికి మీకు సహాయపడుతుంది.