China: పాకిస్థాన్, బంగ్లాదేశ్ అమ్మాయిలపై చైనా యువత చూపు.. ఎందుకో తెలుసా.?
పాకిస్తాన్, బంగ్లాదేశ్ అమ్మాయిల్ని పెళ్లి చేసుకునే చైనా ప్రజల సంఖ్య పెరుగుతోంది. దీనిపై చైనా ప్రభుత్వం ఆందోళన వ్యక్తం చేస్తోంది. ఇంతకీ చైనా యువత ఆ దేశాల వారిని ఎందుకు వివాహం చేసుకుంటున్నారంటే.
రోజురోజుకీ పెరుగుతోన్న సంఖ్య
పాకిస్తాన్, బంగ్లాదేశ్ అమ్మాయిల్ని పెళ్లి చేసుకునే చైనా పురుషుల సంఖ్య పెరుగుతోంది. దీన్ని చూసి మానవ అక్రమ రవాణా జరుగుతుందని చైనా ప్రభుత్వం ఆందోళన వ్యక్తం చేస్తోంది. మొదట్లో ఈ పెళ్లిళ్లని సాంస్కృతిక మార్పిడిగా భావించినా, వీటి వెనుక కుట్ర, అక్రమ కార్యకలాపాలున్నాయని తేలింది. బంగ్లాదేశ్ ప్రజలతో పెళ్లి చేసుకునే ముందు జాగ్రత్తగా ఉండాలని చైనా ప్రభుత్వం హెచ్చరించింది. ఈ విషయంపై బంగ్లాదేశ్లోని చైనా దౌత్య కార్యాలయం ప్రకటన కూడా విడుదల చేసింది.
యువతను కోరుతోన్న చైనా ప్రభుత్వం
చైనా ప్రభుత్వ పత్రిక ‘గ్లోబల్ టైమ్స్’ ప్రకారం, చైనా ప్రజలు ‘విదేశీ భార్యల్ని కొనుగోలు చేసే’ ధోరణి మానుకోవాలని ప్రభుత్వం కోరింది. మరి ఈ పరిస్థితి ఎందుకు వచ్చింది? చైనా పురుషులు పాకిస్తాన్, బంగ్లాదేశ్ అమ్మాయిల్ని ఎందుకు పెళ్లి చేసుకుంటున్నారు? లాంటి వివరాలు ఇప్పుడు తెలుసుకుందాం.
అసలు కారణం ఏంటి.?
నిపుణుల అభిప్రాయం ప్రకారం, చైనాలో చాలా కాలం పాటు అమలులో ఉన్న ఒకే ఒక్క సంతానం పాలసీ వల్ల జెండర్ అసమతుల్యత ఏర్పడి, విదేశీ మహిళలపై ఆసక్తి పెరిగింది. అయితే, జనాభా సగటు వయసు పెరుగుతుండటంతో చైనా ప్రభుత్వం ఒకే ఒక్క సంతానం పాలసీని ఉపసంహరించుకుంది. ఇప్పుడు ప్రజలు ఎక్కువ మంది పిల్లల్ని కనాలని ప్రోత్సహిస్తోంది. దీనివల్ల జననాల రేటు కొంత పెరిగినా, జెండర్ అసమతుల్యత ఇంకా సమస్యగానే ఉంది.
చాలా మంది చైనా పురుషులు ఇప్పుడు విదేశీ మహిళల్ని పెళ్లి చేసుకోవాలనుకుంటున్నారు. కొంతమంది దళారులు డబ్బు తీసుకుని వారికి జీవిత భాగస్వామిని వెతికిపెడతామని చెబుతున్నారు. కానీ ఈ ప్రక్రియ వెనుక మానవ అక్రమ రవాణా జరుగుతోంది. నివేదికల ప్రకారం, చైనాలో దాదాపు 3.5 కోట్ల మంది పురుషులకు సరైన జీవిత భాగస్వామి దొరకడం లేదు. ఈ సంఖ్య భవిష్యత్తులో ఇంకా పెరగవచ్చని నిపుణులు అంచనా వేస్తున్నారు.
ఆ అమ్మాయిలే లక్ష్యంగా..
అందుకే చాలా మంది చైనా పురుషులు భార్య కోసం విదేశాలకు వెళ్తున్నారు. ముఖ్యంగా ఆసియాలోని పేద దేశాల అమ్మాయిల్ని టార్గెట్ చేస్తున్నారు. చాలా మంది ఆన్లైన్లో కూడా భార్య కోసం వెతుకుతున్నారు. బంగ్లాదేశ్ అమ్మాయిల్ని పెళ్లి చేసుకోవాలనుకునే చైనా పురుషులు చాలా డబ్బు ఖర్చు పెడుతున్నారు. ‘సౌత్ చైనా మార్నింగ్ పోస్ట్’ ప్రకారం, చైనాలోని గ్రామీణ ప్రాంతాల్లో దాదాపు 3.5 కోట్ల మంది పురుషులు పెళ్లి కాలేదు. వారిలో కొంతమంది పెళ్లి కోసం 5 నుంచి 6 లక్షల యువాన్ ఖర్చు పెడుతున్నారు.
మానవ అక్రమ రవాణా
పెళ్లి కోసం మాత్రమే కాదు, కొంతమంది చైనా పురుషులు బంగ్లాదేశ్, పాకిస్తాన్ అమ్మాయిల్ని డబ్బులిచ్చి కొనుక్కుంటున్నారని ప్రొఫెసర్ డింగ్ చాంగ్ఫా ఆందోళన వ్యక్తం చేశారు. ఈ ధోరణి మానవ అక్రమ రవాణాను పెంచుతోంది. సాధారణంగా బంగ్లాదేశ్లోని పేద కుటుంబాల అమ్మాయిలకు మంచి జీవితం, పెళ్లి ఆశ చూపి వలలో వేసుకుంటున్నారు.
ఆ తర్వాత ఆ అమ్మాయిల్ని పెళ్లి పేరుతో లేదా ఇతర మార్గాల్లో చైనాకు అక్రమంగా తరలిస్తున్నారు. అంతర్జాతీయంగా పెళ్లి పేరుతో జరిగే మోసాలను నిరోధించే చట్టాలున్నప్పటికీ, కొంతమంది దళారులు వాటిని ఉల్లంఘిస్తూ ఈ కార్యకలాపాలు కొనసాగిస్తున్నారు.