Exercise: వీళ్లు పొరపాటును కూడా ఎక్సర్‌సైజ్ లు చేయకూడదు తెలుసా?

వ్యాయామం చేయడం ఆరోగ్యానికి ఎంత మంచిదో అందరికీ తెలుసు. రోజూ ఉదయం, సాయంత్రం కాసేపు వ్యాయామం చేయడం వల్ల చాలా జబ్బుల ముప్పును తప్పించుకోవచ్చు. కానీ కొందరు ఎక్సర్‌సైజ్ చేయడం అస్సలు మంచిది కాదంటున్నారు నిపుణులు. ఎవరు వ్యాయామం చేయొద్దు? ఎందుకు చేయొద్దో ఇక్కడ తెలుసుకుందాం.

ప్రతిరోజు వ్యాయామం చేయడం ఆరోగ్యానికి చాలా మంచిది. శరీరంతో పాటు మనసు ఆరోగ్యంగా, ఉత్సాహంగా ఉంటుంది. ప్రతిరోజు వ్యాయామం చేయడం వల్ల కండరాలు బలపడతాయి. ఎక్కువ కాలం ఆరోగ్యంగా ఉండాలనుకుంటే ప్రతిరోజు వ్యాయామం చేసే అలవాటును పాటించమని చెబుతుంటారు నిపుణులు. కానీ వ్యాయామం అన్ని పరిస్థితుల్లోనూ మేలు చేస్తుందా అంటే కచ్చితంగా చెప్పలేం అంటున్నారు. నిపుణుల ప్రకారం కొన్ని సమస్యలు ఉన్నవాళ్లు వ్యాయామం చేయకూడదట. ఎవరెవరు చేయకూడదో ఇక్కడ తెలుసుకుందాం.

తలనొప్పి:

నిపుణుల ప్రకారం, తలనొప్పి ఉన్నప్పుడు వ్యాయామం చేయకూడదు. కానీ చాలామంది తలనొప్పి ఉన్నా వ్యాయామాలు చేస్తారు. ఇలా చేస్తే నాడీ వ్యవస్థపై చెడు ప్రభావం పడుతుందని నిపుణులు అంటున్నారు. అంతేకాదు తలనొప్పి సమస్య కూడా పెరుగుతుందట. అధిక రక్తపోటు, శరీరంలో నీటి శాతం తగ్గడం వల్ల ఈ సమస్య వస్తుంది. ఇలాంటి సమయంలో శరీరం, మనస్సు రెండింటికీ విశ్రాంతి అవసరం. విశ్రాంతి లేకుండా చేస్తే రక్తపోటు పెరుగుతుంది. కాబట్టి తలనొప్పి ఉంటే అస్సలు వ్యాయామం చేయకూడదని నిపుణులు సూచిస్తున్నారు.

శారీరక గాయాలు:

కొన్నిసార్లు వ్యాయామం చేసేటప్పుడు కండరాలు సాగి గాయాలవుతాయి. ఇలాంటి సమయంలో వ్యాయామం చేయకూడదు. కానీ చాలామంది ఈ పరిస్థితిలో కూడా వ్యాయామం చేస్తారు. అలా చేస్తే అయిన గాయం నయం కావడానికి ఎక్కువ సమయం పడుతుంది. సమస్య కూడా పెరుగుతుంది. కాబట్టి శరీరంలో గాయాలు ఉన్నప్పుడు అస్సలు వ్యాయామం చేయకండి.

దగ్గు, జలుబు, జ్వరం

నిపుణుల ప్రకారం దగ్గు, జలుబు, జ్వరం, కొద్దిగా ఒళ్లు నొప్పులు ఉన్నప్పుడు వ్యాయామం చేయకండి. ఈ టైంలో వ్యాయామం చేస్తే రోగనిరోధక శక్తి మరింత బలహీనపడుతుంది. దీనివల్ల ఇన్ఫెక్షన్ల నుంచి కోలుకోవడానికి ఎక్కువ సమయం పడుతుంది. కాబట్టి పూర్తిగా కోలుకునే వరకు వ్యాయామం చేయకపోవడమే మంచిది.

నిద్రలేమి:

సరిగ్గా నిద్రపోకపోతే వ్యాయామం చేయకూడదు. నిద్రలేమి శరీరం, మనస్సు రెండింటిపై ఒత్తిడిని కలిగిస్తుంది. ఈ సమయంలో కండరాలు చురుగ్గా ఉంటాయి. కాబట్టి ఇలాంటి పరిస్థితుల్లో వ్యాయామం చేస్తే గాయాలయ్యే అవకాశం ఉంది.

శస్త్రచికిత్స:

శరీరానికి ఏదైనా శస్త్రచికిత్స చేయించుకుంటే డాక్టర్‌ను అడగకుండా వ్యాయామం చేయకండి. శస్త్రచికిత్స తర్వాత శరీరం సాధారణ స్థితికి రావడానికి ఎక్కువ సమయం పడుతుంది. కాబట్టి డాక్టర్‌ను అడిగిన తర్వాత, శరీరం బాగా కోలుకున్నాకే వ్యాయామం చేయాలి. అది కూడా తేలికపాటి వ్యాయామాలే చేయాలని గుర్తుంచుకోండి.

గమనిక:

అతిగా తింటే అమృతం కూడా విషం అన్నట్లుగా, వ్యాయామాన్ని మితంగా చేస్తేనే దాని ఫలితాలను పూర్తిగా పొందగలం. అతిగా వ్యాయామం చేస్తే కండరాలు దెబ్బతింటాయి.