శరీరంలో విటమిన్ బి-12 లోపిస్తే తలెత్తే అనారోగ్య సమస్యలు ఏంటో తెలుసా?

మన శరీర అవయవాలన్నీ సక్రమంగా పని చేయడానికి విటమిన్ బి-12 ఎంతో అవసరం. మరి విటమిన్ బి-12 లోపిస్తే (Deficiency of vitamin B-12) అనేక అనారోగ్య సమస్యలు (Illness issues) ఏర్పడతాయి. అయితే ఇప్పుడు మనం ఈ ఆర్టికల్ ద్వారా శరీరంలో విటమిన్ బి-12 లోపిస్తే తలెత్తే అనారోగ్య సమస్యలు ఏమిటో తెలుసుకుందాం..  

మన శరీర అవయవ పనితీరుకు అనేక విటమిన్లు తప్పనిసరి. అయితే ఈ మధ్యకాలంలో చాలా మందిలో విటమిన్-డి లోపంతో పాటు మరో విటమిన్ బి-12 (Vitamin B-12) లోపం కూడా కనిపిస్తోంది. విటమిన్ బి-12 ని కోబాలమిన్ (Cobalamin ) గా కూడా  పిలుస్తారు. విటమిన్ బి-12 ముఖ్యంగా మెదడు, ఎముకలు పనితీరులో ప్రధాన పాత్ర వహిస్తుంది.

 అదేవిధంగా రక్త కణాల వృద్ధికి (Growth of blood cells) డిఎన్ఏ తయారీకి ఇది సహాయపడుతుంది. అయితే మన శరీరం దీన్ని సహజంగా ఉత్పత్తి చేసుకోలేదు. దాంతో పాటు ఎక్కువ కాలం నిలువ ఉంచుకోలేదు. కాబట్టి శాకాహార ఉత్పత్తుల్లో (Vegetarian Products) ఇది చాలా తక్కువగా ఉంటుంది.

కనుక  విటమిన్ బి-12 లోపం శాకాహారుల్లో ఎక్కువగా ఉంటుంది. అలాగే ఆల్కహాల్ (Alcohol) ఎక్కువగా తీసుకునే వారిలోనూ, రోగనిరోధక వ్యవస్థలో లోపాలు (Defects in the immune system) ఉంటే వారిలోనూ విటమిన్ బి-12 లోపం ఎక్కువగా ఉండే అవకాశం ఉంటుంది. విటమిన్ బి-12 లోపిస్తే శరీరంలో అనేక అనారోగ్య సమస్యలు వచ్చే అవకాశం ఉంటుంది. 

ఈ లోపం ఏర్పడినప్పుడు అధిక ఒత్తిడి (Stress), అలసట (Fatigue), తలనొప్పి వంటి సాధారణ లక్షణాలు కనిపిస్తాయి. ఈ లోపాన్ని అజాగ్రత్త చేస్తే చర్మం పాలిపోవడం, నీరసంగా అనిపించడం, నాలుక నున్నగా మారడం, మలబద్ధకం డయేరియా తగ్గకపోవడం, ఆకలి లేకపోవడం, కండరాలు బలహీనపడటం, కంటిచూపు మందగించడం, నడవలేకపోవడం వంటి సమస్యలు ఏర్పడే అవకాశం ఉంటుంది.

దీంతోపాటు జ్ఞాపకశక్తి క్షీణించడం, రక్తహీనత (Anemia), శ్వాస సంబంధిత సమస్యలు (Respiratory problems) తలెత్తే అవకాశం ఎక్కువగా ఉంటుంది. ఈ లోపాన్ని నిర్లక్ష్యం చేయకుండా విటమిన్ బి-12 అధికంగా ఉండే ఆహార పదార్ధాలను తీసుకోవాలి. అయితే సముద్రపు చేపలను తీసుకుంటే శరీరానికి కావలసిన విటమిన్ బి-12 పుష్కలంగా లభిస్తుంది.

దీంతోపాటు ఒమేగా 3 ఫ్యాటీ యాసిడ్స్, రిబోఫ్లేవిన్, నియాసిస్, థియామిన్, విటమిన బి 6 వంటి పోషకాలు శరీరానికి లభిస్తాయి. అదేవిధంగా మాంసాహారంలో (Non-vegetarian) కూడా విటమిన్ బి-12 సమృద్ధిగా ఉంటుంది. గుడ్లు (Eggs) కూడా విటమిన్ బి-12 అందించే ముఖ్యమైన పౌష్టికాహార జాబితాలో ఉంది. కనుక గుడ్లు తీసుకోవడం ఆరోగ్యానికి మంచిది.

అలాగే శాకాహారులైతే తృణధాన్యాలు (Cereals), పాల ఉత్పత్తులు (Dairy products) ఎక్కువగా తీసుకోవడం మంచిది. వీటిని తీసుకుంటే శరీరానికి కావలసిన విటమిన్ బి-12  పుష్కలంగా లభిస్తుంది. విటమిన్ బి-12 లోపం చాలా అధికంగా ఉంటే వైద్యులను సంప్రదించి విటమిన్ బి-12 ట్యాబ్లెట్లు తీసుకోవడం మంచిది.