Oil Reusing: వాడిన వంటనూనె పారేస్తున్నారా? ఇలా వాడేసేయండి!

వంటనూనె లేకుండా కిచెన్ లో ఏ పని చేయలేము. కూర వండాలన్నా, చట్నీ చేయాలన్నా, ఏదైనా ఫ్రై చేయాలన్నా నూనె తప్పనిసరి. అయితే ఫ్రై చేయగా మిగిలిన నూనెను చాలామంది పక్కన పడేస్తుంటారు. ఆ నూనె వేస్ట్ కాకుండా తిరిగి ఎలా ఉపయోగించుకోవాలో ఇక్కడ తెలుసుకుందాం.

వంటల్లో వాడిన నూనె వేస్టే కావద్దని అందరు కోరుకుంటారు. కానీ పోపులకి వాడిన నూనెని మళ్లీ వాడటానికి చాలామంది ఇష్టపడరు. ఆ నూనెను పడేస్తుంటారు. పోపులకి వాడిన నూనెని మళ్ళీ వాడితే ఆరోగ్యానికి హానికరం. కానీ, మిగిలిన నూనెని వృధా చేయకుండా మళ్ళీ వాడుకోవచ్చని మీకు తెలుసా? పోపుల్లో మిగిలిన నూనెని వివిధ మార్గాల్లో ఉపయోగించుకునే పద్ధతుల గురించి ఇక్కడ తెలుసుకుందాం.

కీటకాలకు మందుగా..

వంటగదిలో బొద్దింకలు, బల్లులు, దోమలు వంటి కీటకాల బెడద ఎక్కువగా ఉంటుంది. వీటిని తరిమికొట్టడానికి, పోపుల్లో మిగిలిన నూనెలో కొద్దిగా కిరోసిన్ కలిపి స్ప్రే బాటిల్‌లో పోసి, కీటకాలు వచ్చే చోట చల్లితే చాలు అవి మళ్లీ రావు.

తోటకి ఎరువుగా..

పోపుల్లో మిగిలిన నూనెని తోటకి ఎరువుగా వాడొచ్చు. కానీ, దాన్ని నేరుగా మొక్కలకి పోయకూడదు. మొక్కల పెరుగుదల దెబ్బతింటుంది. నూనెని నీటిలో కలిపి మొక్కలకి పోయాలి. దీనివల్ల మొక్కలకి అవసరమైన పోషకాలు అందుతాయి.

పర్యావరణానికి మేలు:

మిగిలిన నూనెని మళ్ళీ వాడటం వల్ల చెత్తలో పారబోయడం తగ్గుతుంది. దీనివల్ల పర్యావరణానికి మేలు జరుగుతుంది. నిజానికి, మిగిలిన నూనెని చెత్తలో పారబోయడం వల్ల నేల క్షీణత, నీటి కాలుష్యం ఏర్పడతాయి. దాన్ని మళ్ళీ వాడటం వల్ల కాలుష్యాన్ని తగ్గించవచ్చు.

ఇనుప వస్తువులను..

ఇంట్లో ఏవైనా ఇనుప వస్తువులు తుప్పు పట్టాయంటే, వాటిని శుభ్రం చేయడానికి మిగిలిన నూనెని వాడొచ్చు. ఎందుకంటే నూనెలో తుప్పు నిరోధక లక్షణాలు ఉంటాయి. వాటితో శుభ్రం చేస్తే ఇనుము మీద తేమ నిలవదు, తుప్పు పట్టదు. వంటల్లో వాడిన నూనెని ఇనుముని కాపాడటానికి వాడొచ్చు.

చెక్క సామాగ్రికి కూడా..

ఇంట్లో ఉన్న పాత చెక్క సామాగ్రి మెరుపు తగ్గిపోయి ఉంటే, పోపుల్లో మిగిలిన నూనెలో క్లాత్ ముంచి, దాంతో చెక్క సామాగ్రిని శుభ్రం చేయాలి. ఇలా చేస్తే చెక్క సామాగ్రి మళ్ళీ మెరుస్తుంది. దీనివల్ల చెక్క సామాగ్రి కీటకాల బారి నుంచి కూడా రక్షించబడుతుంది.