Kitchen tips: ఇలా చేస్తే ఇడ్లీ, దోశ పిండి అస్సలు పులిసిపోదు!

మనం ఇంట్లో ఎక్కువగా చేసే టిఫిన్లలో ఇడ్లీ, దోశ ముందు వరుసలో ఉంటాయి. పిల్లల నుంచి పెద్దల వరకు వీటిని ఇష్టంగా తింటారు. తొందరగా జీర్ణం అవుతాయి కాబట్టి వారంలో రెండు, మూడుసార్లు ఈ టిఫిన్లనే చాలామంది చేస్తుంటారు. అయితే  వేసవి కాలంలో ఇడ్లీ, దోశ పిండి తొందరగా పులిసిపోతుంటుంది. మరి ఎక్కువ రోజులు ఈ పిండిని ఫ్రెష్ గా ఎలా ఉంచుకోవాలో ఇక్కడ చూద్దాం

సాధారణంగా చాలామంది ఇడ్లీ, దోశ బ్యాటర్ ను ఎప్పుడూ స్టాక్‌లో ఉంచుకుంటారు. కానీ ఎండాకాలంలో మాత్రం ఈ బ్యాటర్ ను నిల్వ చేయడం కాస్త కష్టమైన పని. ఇంకా ఫ్రిజ్ లేకపోతే ఒక్క రోజులోనే దాని పని అయిపోతుంది.

బ్యాటర్ పులియకుండా ఏం చేయాలి?

సాధారణంగా ఇడ్లీ, దోశ బ్యాటర్ మూడు రోజుల వరకు పులిసిపోకుండా ఫ్రెష్‌గా ఉంటుంది. కొందరి ఇళ్లలో వారం రోజులైనా పులిసిపోదు. అది ఎలాగో మీకు తెలుసా? అందుకు కొన్ని చిట్కాలు ఉన్నాయి. అవెంటో ఇక్కడ తెలుసుకుందాం.

పిండి పులిసిపోకుండా ఇలా చేయండి!

-బియ్యాన్ని ఎక్కువసేపు నానబెట్టకుండా 3 నుంచి 4 గంటలు మాత్రమే నానబెట్టండి. ఎక్కువసేపు నానబెడితే బ్యాటర్ త్వరగా పులిసిపోతుంది.

- మినప్పప్పు త్వరగా నానిపోతుంది కాబట్టి ఒక గంట మాత్రమే నానబెడితే సరిపోతుంది.

- పిండిని రుబ్బుకునే ముందు గ్రైండర్‌ను శుభ్రంగా కడగాలి. లేకపోతే ముందు రుబ్బిన పిండి పులుపు గ్రైండర్‌లో ఉండిపోతుంది.

పప్పు రుబ్బుతున్నప్పుడు...

- పిండిని ఎక్కువసేపు రుబ్బకూడదు. చాలామంది బ్యాటర్ రుబ్బుతున్నప్పుడు వంటింట్లో ఇతర పనులు చేస్తూ ఉంటారు. అలా ఎక్కువసేపు రుబ్బితే గ్రైండర్ వేడెక్కుతుంది. ఆ వేడి వల్ల బ్యాటర్ త్వరగా పులిసిపోతుంది.

- మినప్పప్పును రుబ్బుతున్నప్పుడు తరచుగా నీళ్లు చిలకరిస్తే 20-25 నిమిషాల్లోనే పొంగుతుంది. అలాగే బియ్యాన్ని కూడా సరైన సమయంలో రుబ్బుకోవాలి.

- కొందరు బియ్యం, మినప్పప్పును కలిపి రుబ్బుతారు. కానీ బ్యాటర్ ఎక్కువ రోజులు ఫ్రెష్‌గా ఉండాలంటే బియ్యం, మినప్పప్పును విడివిడిగా రుబ్బుకోవాలి. కలిపి రుబ్బకూడదు.

ఉప్పు ఎప్పుడు వేయాలో తెలుసా?

- బ్యాటర్ రుబ్బుతున్నప్పుడు చేతులతో కాకుండా ప్లాస్టిక్ లేదా చెక్క గరిటెను ఉపయోగించండి. చేతులతో రుబ్బితే శరీర వేడి వల్ల త్వరగా పులిసిపోతుంది.

- రుబ్బిన తర్వాత ఉప్పు వేసి కలపకూడదు. ఉప్పు వేయకుండా మూత పెట్టి ఉంచండి. బ్యాటర్ రుబ్బిన తర్వాత 3 గంటలు బయట ఉంచి.. తర్వాత ఫ్రిజ్‌లో పెట్టండి.

- అవసరమైనప్పుడు మాత్రమే తీసి ఉపయోగించండి. చేతులతో కాకుండా గరిటెతో తీసుకోండి. తీసిన బ్యాటర్ లో ఉప్పు వేసుకోండి.

- ఫ్రిజ్ లేకపోతే పెద్ద గిన్నెలో బ్యాటర్ ను పెట్టి, దానిలో చిన్న గిన్నెను ఉంచండి. దీనివల్ల అది త్వరగా పులియదు. బ్యాటర్ రుబ్బిన తర్వాత అరటి ఆకుతో మూత పెట్టాలి. ఇలా చేస్తే రెండు రోజులు పిండి పులియకుండా ఫ్రెష్‌గా ఉంటుంది.