మీరు కొన్న గోధుమ పిండికి కల్తీ అయ్యిందా? లేదా ? అని ఎలా తెలుసుకోవాలంటే?

మనం తినే ప్రతి ఫుడ్ కల్తీ అవుతూనే ఉంది. కానీ మనకు ఏవి కల్తీ అయ్యాయో, ఏవి కాలేదో గుర్తించడం తెలియదు. కానీ కల్తీ వాటిని తింటే మన ఆరోగ్యం పాడవుతుంది. కాబట్టి గోధుమ పిండి కల్తీ అయ్యిందా? కాలేదా? అని ఎలా తెలుసుకోవాలో ఇప్పుడు తెలుసుకుందాం పదండి.

ఈ రోజుల్లో జొన్న రొట్టె కంటే గోధుమ చపాతీలనే ఎక్కువగా తింటున్నారు. నిజానికి గోధుమ చపాతీలు కూడా ఆరోగ్యానికి మంచివే. గోధుమ పిండిలో విటమిన్ బి, ఐరన్, మెగ్నీషియంతో పాటుగా ఎన్నో రకాల పోషకాలు పుష్కలంగా ఉంటాయి. ఇవి మనల్ని ఎంతో ఆరోగ్యంగా ఉంచడానికి సహాయపడతాయి. రోజూ గోధుమ చపాతీని తినడం వల్ల మన జీర్ణక్రియ మెరుగుపడుతుంది. అలాగే బరువు కూడా తగ్గుతారు. 

అయితే గోధుమ పిండి కూడా కల్తీ అవుతుందన్న ముచ్చట మీకు తెలుసా? అవును చాలా మంది గోధుమ పిండిలో పొట్టును కలుపుతారు. దీనివల్ల పిండి నాణ్యత తగ్గుతుంది. అలాగే ఈ పిండిలో పోషకాలు కూడా తక్కువగా ఉంటాయి.

నిజానికి ఈ గోధుమ పొట్టులో ఫైబర్ కంటెంట్ ఉంటుది. కానీ దీనిలో నాణ్యత లేని పొట్టునే కలుపుతారు. దీనివల్ల చపాతీల రుచి తగ్గుతుంది. అలాగే జీర్ణవ్యవస్థకు సంబంధించిన సమస్యలు కూడా వస్తాయి. అందుకే గోధుమ పిండి కల్తీ జరిగిందా? లేదా?అనేది ఎలా తెలుసుకోవాలో ఇప్పుడు చూద్దాం పదండి. 

పిండిలో పొట్టును ఎందుకు కలుపుతారు?

 మీకు తెలుసా? స్వచ్ఛమైన గోధుమ పిండి కంటే పొట్టే చాలా తక్కువ ధర ఉంటుంది. అందుకే వ్యాపారులు గోధుమ పిండిలో దీనిని కలుపుతారు. ఈ పొట్టు వల్ల పిండి బరువు పెరుగుతుంది. అలాగే వారి ఖర్చు కూడా తగ్గుతుంది. అయితే కల్తీ పిండి కూడా స్వచ్ఛమైన పిండి లాగే కనిపిస్తుంది. అందుకే దీనిని గుర్తించడం చాలా కష్టం. కానీ ఈ పద్దతిలో సరఫరాదారులు తక్కువ ఖర్చుతో ఎక్కువ లాభం పొందుతారు. 

పిండిలో పొట్టును ఎలా గుర్తించాలి?

ఎఫ్ఎస్ఎస్ఏఐ ప్రకారం.. గోధుమ పిండి స్వచ్ఛతను చెక్ చేయడానికి ఒక సులువైన మార్గం ఉంది. దీనికోసం మీరు పెద్దగా కష్టపడాల్సిన అవసరం లేదు. ఇందుకోసం ముందుగా ఒక గ్లాసులో నీళ్లను తీసుకుని అందులో కొంచెం గోధుమ పిండిని వేయండి.

స్వచ్ఛమైన పిండిలో పొట్టు కొంచమే నీటి పైన తేలుతూ కనిపిస్తుంది. కానీ అదే పిండిలో చాలా పొట్టు నీళ్లపై తేలుతున్నట్టైతే అది కల్తీ జరిగిందని అర్థం. ఇలాంటి పిండిలో పెద్ద మొత్తంలో పొట్టును కలిపారని అర్థం చేసుకోవాలి. 

జీర్ణక్రియను దెబ్బతీస్తుంది

పొట్టు ఎక్కువగా కలిపిన గోధుమ పిండి చపాతీలు తింటే మీ జీర్ణ సామర్థ్యం తగ్గుతుంది. అంతేకాదు దీని ద్వారా మీకు చాలా తక్కువ పోషకాలు అందుతాయి. ఇలాంటి పిండితో చేసిన చపాతీ రుచి, ఆకృతి మారుతాయి. ఇలాంటి చపాతీ గట్టిగా, కొద్దిగా చేదుగా ఉంటుంది. 

ఎక్కువ మొత్తంలో పొట్టును తినడం వల్ల కడుపు ఉబ్బరం, గ్యాస్, అపానవాయువు వంటి జీర్ణ సమస్యలు వస్తాయి. ముఖ్యంగా ఫైబర్ కంటెంట్ ఎక్కువగా ఉండే ఆహారాలకు సున్నితంగా ఉన్నవారికి.