Rice cooking tips: ఎండల వేడికి అన్నం త్వరగా పాడవుతోందా? అయితే ఇలా చేయండి!

చాలామందికి మధ్యాహ్నం, రాత్రి అన్నం తినడమే అలవాటుగా ఉంటుంది. కొందరైతే మూడు పూటలు అన్నమే తింటారు. మామూలుగా అయితే మార్నింగ్ వండిన అన్నాన్నే మధ్యాహ్నం తింటారు. మిగిలితే రాత్రికి కూడా అదే తింటారు. కానీ కొన్నిసార్లు ఉదయం వండిన అన్నం మధ్యాహ్నానికే పాడైపోతుంటుంది. వేసవికాలంలో అయితే ఇలా ఎక్కువసార్లు జరుగుతుంది. మరి అన్నం చెడిపోకుండా రోజంతా తాజాగా ఉండాలంటే ఏం చేయాలో ఇక్కడ చూద్దాం.

వేసవి కాలంలో ఉదయం వండిన అన్నం మధ్యాహ్నం వరకు చెడిపోతుంటుంది. ముఖ్యంగా స్కూల్, కాలేజ్, ఆఫీసుకు వెళ్లేవారు బాక్సుల్లో తీసుకెళ్తారు కాబట్టి అన్నం చెడిపోయే అవకాశం ఎక్కువగా ఉంటుంది. ఇలాంటి పరిస్థితుల్లో, ఉదయం వండిన అన్నం రోజంతా తాజాగా ఉంచడానికి ఏం చేయాలో ఇక్కడ చూద్దాం.

అన్నం చెడిపోకుండా ఏం చేయాలి?

అన్నాన్ని ఎప్పటిలాగే  నీటిలో కడిగి నానబెట్టి.. ఆ తర్వాత నీరు పోసి.. గ్యాస్ మీద ఉడికించాలి. అన్నం బాగా ఉడికిన తర్వాత వడకట్టడానికి ఒక నిమిషం ముందు ఒక చెంచా కొబ్బరి నూనెను అన్నంలో పోసి బాగా కలిపి ఒక మరుగు వచ్చిన వెంటనే అన్నాన్ని వడకట్టాలి.

బియ్యాన్ని బట్టి నూనె

ఒక గ్లాసు బియ్యానికి ఒక చెంచా కొబ్బరి నూనె పోస్తే సరిపోతుంది. మీరు వండే అన్నం పరిమాణానికి అనుగుణంగా కొబ్బరి నూనెను పోయాలి. కొబ్బరి నూనె వాసన అన్నంలో వస్తుందని బాధపడాల్సిన అవసరం లేదు. అన్నం ఎప్పటిలాగే ఉంటుంది.

కుక్కర్ లో అన్నం వండితే?

కుక్కర్‌లో వండే అన్నానికి కూడా ఈ చిట్కా వర్తిస్తుంది. కుక్కర్‌లో అన్నం వండేటప్పుడు బియ్యం వేసి.. అవసరమైన నీరు పోయాలి. ఆ తర్వాత ఒక చెంచా కొబ్బరి నూనె వేసి కుక్కర్ మూత పెట్టాలి. విజిల్ వచ్చాక దించుకోవాలి.

టిఫిన్ బాక్స్‌లో అన్నం ఎలా ప్యాక్ చేయాలి?

ఒక హాట్ బాక్స్‌లో శుభ్రమైన వైట్ క్లాత్ ఉంచి, వడకట్టిన అన్నాన్ని అందులో వేసి మూత పెట్టాలి. దాదాపు అరగంట తర్వాత ఆ అన్నాన్ని లంచ్ బాక్స్‌లో ప్యాక్ చేస్తే అన్నం చెడిపోదు. రోజంతా తాజాగా ఉంటుంది. మధ్యాహ్నం తినేటప్పుడు కూడా అన్నం వేడిగా ఉంటుంది.

ఇది గుర్తుంచుకోండి!

మీకు కొబ్బరి నూనె నచ్చకపోతే నువ్వుల నూనెను ఉపయోగించవచ్చు. ఈ విధంగా మీరు అన్నం వండినట్లయితే వేసవి వేడి వల్ల అన్నం త్వరగా చెడిపోదు. ఈ చిట్కా చాలా సులభం. కాబట్టి ఈ చిట్కా మీకు నచ్చితే ఒకసారి ప్రయత్నించండి.