Gutti Vankaya Kothimeera Curry: గుత్తి వంకాయకు కొత్తిమీర టచ్.. రుచి డబుల్
Gutti Vankaya Kothimeera Curry: పాక శాస్త్రంలో వంకాయకున్న ప్రత్యేకత మరే కూరగాయలకు లేదన్నది అతిశయోక్తి కాదు. అలాంటి వంకాయలతో ఏ కూర చేసిన 100కు 100 మార్కులు పడాల్సిందే. అందులో ఈ కొత్తిమీర గుత్తి వంకాయ కర్రీ ఉంటుంది..అద్బుతః
'వంకాయ వంటి కూరయు' మరొకటి లేదు
వంకాయల్లో రకరకాలు ఉంటాయి.ఏ రకం వంకాయతో అయినా కూర చేసినా, ఫ్రై చేసినా, పులుసు పెట్టినా అదిరిపోద్ది. అన్నంలో కలుపుకుని తింటే అబ్బబ్బ..నోట్లో నీళ్లూరాల్సిందే. అందులో ఈ కొత్తిమీర గుత్తి వంకాయ కర్రీకి ఎవరూ పెట్టలేరు. అంత రుచిగా ఉంటుంది. ఇదే కర్రీని బిగ్ బాస్ లో కంటెస్టెంట్ డిమోన్ పవన్ చేసి...అందరికీ రుచి చూపించాడు. అంతేకాదు కుక్ విత్ జాతి రత్నాలు షోలో కూత చేసి...అందరి చేత వావ్ అనిపించుకున్నాడు. అంత బాగుంటుంది ఈ కర్రీ. ఒక్కసారి తిన్నారంటే...మళ్లీ మళ్లీ కావాలంటారు. రెసిపీ ఏంటో చూద్దాం.
కావలసిన పదార్థాలు
పావు కిలో వంకాయలు, మూడు చిన్న ఉల్లిపాయలు, 5 పచ్చిమిర్చి, కప్పు కొత్తిమీర, రెండు ఎండుమిరపకాయలు, ఆయిల్, ధనియాలు, జీలకర్ర, అల్లం, వెల్లుల్లి, పసుపు, కారం, లవంగాలు, ఉప్పు
మసాలా పేస్టు తయారీ
మిక్సీలో అల్లం , వెల్లుల్లి, జీలకర్ర, ధనియాలు, లవంగాలు, పచ్చిమిర్చి, కొత్తిమీర వేసి పేస్ట్ చేసుకోవాలి. పక్కన ఓ బాణాలిలో 1 టేబుల్ స్పూన్ ఆయిల్ వేసుకోవాలి. అందులో ఉల్లిపాయముక్కలు వేసి 2 నిమిషాలు ఫ్రే చేసుకోవాలి. ఇప్పుడు మళ్లీ కొత్తిమీర పేస్ట్ లో ఈ ఉల్లిపాయలు వేసి మెత్తగా పట్టుకోవాలి. ఇప్పుడు వంకాయల్ని నాలుగు వైపులా కాస్త కోసి అందులో ఉల్లి పేస్టు పెట్టుకోవాలి.
రెసిపీ విధానం
మళ్లీ మరో పాన్ లో 2-3 టేబుల్ స్పూన్ల ఆయిల్ వేసి అది వేడెక్కాక అందులో జీలకర్ర, కరివేపాకు, ఎండు మిరపకాయలు వేసి వేయించుకోవాలి. ఇప్పుడు వాటిలో ఉల్లి పేస్ట్ పెట్టిన వంకాయలను వదలాలి. గరిటెతో కదుపుతూ ఆయిల్ లోనే మగ్గనివ్వాలి. తర్వాత మిగిలిన పేస్ట్ కూడా వేసుకుని దాంట్లో ఉప్పు, పసుపు వేసి మగ్గించుకోవాలి. ఆ తర్వాత 2 కప్పుల నీళ్లు పోసుకుని కలిపి మూత పెట్టుకోవాలి. ఓ 15 నిమిషాలు ఉడికించుకోవాలి. వంకాయ బాగా ఉడికి నూనె పైకి తేలి కూర దగ్గరైతే అంతే. ఘుమఘమలాడే కొత్తిమీర గుత్తి వంకాయ కర్రీ రెడీ.
పొగడ్తలు గ్యారెంటీ
వేడి వేడి అన్నంలో కలుపుకుని తింటే నోట్లో బ్లాస్టరే. బటర్ నాన్, చపాతీ, రైస్ లోకి ఎందులోకి అయినా బాగుంటుంది. ఒకసారి ఇంట్లో ట్రై చేయండి. వంకాయలు ఇష్టపడని వాళ్లు కూడా ఈ కర్రీ తిని మిమ్మల్ని మెచ్చుకుంటారు. మళ్లీ మళ్లీ మీతో చేయించుకుంటారు. మీకు పొగడ్తలు గ్యారెంటీ.
