స్వర్గం చూడాలని ఉందా అయితే హిమాలయాల్లో ఉన్న ఈ ప్రాంతానికి ట్రిప్ వేయండి
ఏదైనా ప్రాంతం అందంగా, ప్రశాంతంగా ఉంటే.. స్వర్గంలా ఉంది అంటాము. నిజంగా ఆ స్వర్గం లాంటి ప్రాంతం మనదేశంలోనే ఉంది. హిమాలయాల్లో ఉన్న ఈ ప్రాంతం పేరు మధ్యమహేశ్వర్. ఇది పంచ కేదార క్షేత్రాల్లో ఒకటి. ఉత్తరాఖండ్ రాష్ట్రంలో ఇది ఉంది.
మధ్యమహేశ్వర్ ఎక్కడ ఉంది?
హిమాలయాల్లో ఉన్న ఒక అందమైన ప్రాంతం మధ్యమహేశ్వర్. పర్వతాలు, పచ్చని అడవులు, జలపాతాలు, నదులు, మంచుతో నిండిన శిఖరాల మధ్య ప్రశాంతంగా, గంభీరంగా ఉంటుంది ఈ ప్రాంతం. ఆ ప్రశాంత వాతావరణంలో కొన్ని రోజులు గడిపితే చాలు మనస్సు, శరీరం ఉత్తేజితమవుతాయి. ఉత్తరాఖండ్‌లో ఉంది ఈ మధ్యమహేశ్వర్. రుద్రప్రయాగ్ జిల్లాలో ఉన్న ఈ ఆలయం పంచకేదారాలలో ఒకటి. ఇక్కడ శివుని మధ్యభాగం అంటే నాభిని పూజిస్తారు.
మధ్యమహేశ్వర్ ఆలయం సముద్ర మట్టానికి సుమారు 3,497 మీటర్ల ఎత్తులో ఉంటుంది. దీని చుట్టూ ఉన్న ప్రకృతి సౌందర్యం పర్యాటకులను కట్టిపడేస్తుంది. ఇక్కడి నుండి చౌఖంబా సహా హిమాలయాలలోని ఎత్తైన శిఖరాల అద్భుత దృశ్యాలను చూడొచ్చు. కుటుంబంతో కలిసి వెళ్లేవారికి ఇది ఎంతో అద్భుత అనుభూతిని మిగులుస్తుంది.
మధ్యమహేశ్వర్‌కు ఎలా వెళ్లాలి?
తెలుగు రాష్ట్రాల నుంచి వచ్చే వారు ముందుగా ఢిల్లీని చేరుకోవాలి. అక్కడ నుండి రోడ్డు మార్గంలో హరిద్వార్, రిషికేశ్, దేవప్రయాగ్, శ్రీనగర్, రుద్రప్రయాగ్, ఉఖిమఠ్ మీదుగా రాన్సీ గ్రామానికి చేరుకోవచ్చు. రాన్సీ గ్రామం నుంచే మధ్యమహేశ్వర్ ట్రెక్ మొదలవుతుంది. అదే బేస్ పాయింట్. అక్కడ నుండి సుమారు 16-17 కిలోమీటర్లు కాలినడకన ట్రెక్ చేయాలి.
దారి పొడవునా ప్రకృతి అందాలే
ట్రెక్కింగ్ అంటే ఇష్టమైన వాళ్లకి ఇది బాగా నచ్చుతుంది. ట్రెక్కింగ్ మొదలుపెట్టాక గోండార్, బంటోలి వంటి అందమైన పల్లెలు కనిపిస్తాయి. అడవులు, నదులు, జలపాతాలు, ఎత్తైన పర్వతాల మధ్య సాగే ఈ ట్రెకింగ్ మర్చిపోలేని అనుభూతిని అందిస్తుంది. దారిలో పర్యాటకులు బస చేయడానికి, భోజనం చేయడానికి హోంస్టేలు, చిన్న లాడ్జీలు కూడా ఉంటాయి.
మధ్యమహేశ్వర్ ఆలయం చేరుకున్నాక అక్కడ నుండి సుమారు 2 కిలోమీటర్ల దూరంలో బుద్ధ మధ్యమహేశ్వర్ ఉంది. ఇక్కడి నుండి చౌఖంబా, నీలకంఠ్ సహా మంచుతో కప్పిన అనేక పర్వత శిఖరాల అద్భుత దృశ్యం కనిపిస్తుంది. దీనితో పాటు, కాంచని తాల్ అనే ఎత్తైన హిమనీనద సరస్సు కూడా ఉంది. అక్కడికి చేరుకోవడానికి ప్రత్యేకంగా ట్రెకింగ్ చేయాలి. ఏదైనా ఈ ప్రదేశం కూడా స్వర్గాన్ని గుర్తుకు తెస్తుంది.
