- Home
- Entertainment
- మరో సెన్సేషన్ సాంగ్ లోడింగ్.. ఇకపై ప్రతీ పెళ్లి బరాత్లో ఈ పాట ఉండాల్సిందే, సౌండ్ లగారే అనాల్సిందే
మరో సెన్సేషన్ సాంగ్ లోడింగ్.. ఇకపై ప్రతీ పెళ్లి బరాత్లో ఈ పాట ఉండాల్సిందే, సౌండ్ లగారే అనాల్సిందే
Folk Song: తెలంగాణ ఫోక్ సాంగ్స్కు ప్రత్యేక గుర్తింపు ఉంది. గ్రామీణ సంస్కృతి, స్థానిక భాషను ప్రతిబింబిస్తాయి పాటలు. తాజాగా అలాంటి మరో కొత్త సాంగ్ ప్రేక్షకుల ముందుకు రానుంది. "సౌండ్ లగారే" పేరుతో విడుదలకు సిద్ధమవుతున్న ఈ పాట ప్రోమో వైరల్ అవుతోంది.
‘లగారే సౌండ్ సాలా దంచికొట్టు డీజే వాలా’తో ప్రారంభమయ్యే సందడి
"లగారే సౌండ్ సాలా దంచికొట్టు డీజే వాలా" అంటూ ఈ పాట మొదలవుతుంది. మొదటి లైన్ నుంచే తెలంగాణ మాస్ బీట్ను ప్రేక్షకులకు పరిచయం చేస్తుంది. డీజే సౌండ్స్, జానపద సంగీతం కలయికలో రూపొందిన ఈ పాట వినగానే డ్యాన్స్ చేయాలనిపించేలా ఉంది. ప్రోమోలో కనిపించే వేడుక వాతావరణం, కళాకారుల ఎనర్జీ ప్రేక్షకులను వెంటనే ఆకర్షిస్తోంది.
పెళ్లి వేడుక నేపథ్యంలో హృదయాన్ని తాకే కథ
ఈ పాటకు కేవలం డ్యాన్స్ మాత్రమే కాదు, ఒక మంచి సందేశం కూడా ఉంది. పెళ్లి పూర్తయిన తర్వాత కొత్త జంట బరాత్ దావత్లో పాల్గొంటుంది. అక్కడ వివాహానికి హాజరైన వారంతా ఆనందంగా డ్యాన్స్ చేస్తుంటారు. కానీ పెళ్లికూతురు మాత్రం బిడియంతో, సిగ్గుతో ఉంటుంది. అప్పుడు ఆమె తండ్రి వచ్చి "ఓ బిడ్డ.. ఎందుకు సిగ్గుపడుతున్నావు? ఆడబిడ్డ అయితే సిగ్గుపడాలనే నియమం ఏమీ లేదు. నువ్వు కూడా ఆనందంగా డ్యాన్స్ చేయి" అని ప్రోత్సహిస్తాడు. ఆ తర్వాత ప్రారంభమయ్యే పాట కథకు మరింత బలం చేకూరుస్తుంది. ఈ సన్నివేశం తండ్రి-కూతురు బంధాన్ని ఎంతో అందంగా చూపిస్తుంది.
ఆడబిడ్డలకు ధైర్యం చెప్పే అద్భుతమైన సాహిత్యం
ఈ పాటలోని ప్రధాన ఆకర్షణ సాహిత్యం. సమాజం ఏమంటుందో, చుట్టుపక్కల వారు ఎలా చూస్తారో అనే భయంతో చాలా మంది అమ్మాయిలు తమ భావాలను వ్యక్తపరచలేకపోతుంటారు. అలాంటి ఆడబిడ్డలకు ధైర్యం చెప్పేలా ఈ పాట లిరిక్స్ ఉన్నాయి. "వాళ్లేమంటారో, వీళ్లేమంటారో అని భయపడకు.. నీకు నచ్చినట్లు ఆనందంగా డ్యాన్స్ చేయి" అనే భావనతో సాగే పదాలు ఎంతో ప్రేరణాత్మకంగా ఉన్నాయి. మహిళలు తమలోని సంకోచాన్ని వదిలేసి ఆత్మవిశ్వాసంతో ముందుకు సాగాలనే సందేశాన్ని ఈ పాట అందిస్తోంది.
తెలంగాణ స్ఫూర్తిని ప్రతిబింబించే ‘సౌండ్ లగారే’
"సౌండ్ లగారే" కేవలం ఒక ఫోక్ సాంగ్ మాత్రమే కాదు. తెలంగాణ సంస్కృతి, సంప్రదాయాలు, గ్రామీణ జీవనశైలిని ప్రతిబింబించే ప్రయత్నంగా కనిపిస్తోంది. స్థానిక భాష, పల్లెటూరి వాతావరణం, వేడుకల సందడి, కుటుంబ అనుబంధాలు అన్నీ ఈ పాటలో కనిపిస్తున్నాయి. తెలంగాణ జానపద గీతాల ప్రత్యేకత ఏమిటంటే అవి వినోదంతో పాటు ఒక సామాజిక సందేశాన్ని కూడా అందిస్తాయి. అదే అంశం ఈ పాటలో కూడా స్పష్టంగా కనిపిస్తోంది. అందుకే ప్రోమో విడుదలైన కొద్ది సమయంలోనే ప్రేక్షకుల నుంచి మంచి స్పందన లభిస్తోంది.
మదీన్ సంగీతం, బుల్లెట్ బండి లక్ష్మణ్ సాహిత్యం, నాగ దుర్గ డ్యాన్స్ ప్రత్యేక ఆకర్షణ
ఈ పాట ప్రోమోనే ఇంతలా వైరల్ కావడనికి సంగీత దర్శకుడు మదీన్ ప్రధాన కారణంగా చెప్పొచ్చు. ఆయన అందించిన సంగీతం పాటకు ప్రత్యేకమైన ఎనర్జీని తీసుకొచ్చింది. ఇక బుల్లెట్ బండి లక్ష్మణ్ రాసిన సాహిత్యం పాటకు ప్రాణం పోసింది. గతంలో ఆయన రచించిన అనేక ఫోక్ సాంగ్స్ యూట్యూబ్లో సంచలన విజయాలు సాధించాయి.
మమతా అందించిన గాత్రం పాటను మరో స్థాయికి తీసుకెళ్లింది. ఆమె గొంతులోని ఉత్సాహం, భావోద్వేగం పాటకు మరింత అందాన్ని చేకూర్చాయి. ఇక ఈ పాటలో ప్రధాన ఆకర్షణగా నాగ దుర్గ నిలిచింది. ఆమె డ్యాన్స్ స్టెప్స్, హావభావాలు, స్క్రీన్ ప్రెజెన్స్ ప్రేక్షకులను ఆకట్టుకునేలా ఉన్నాయి.
బుల్లెట్ బండి లక్ష్మణ్ నుంచి గతంలో వచ్చిన పాటలు మిలియన్ల వ్యూస్ సాధించి ప్రేక్షకాదరణ పొందిన సంగతి తెలిసిందే. ఇప్పుడు "సౌండ్ లగారే" కూడా అదే స్థాయిలో ప్రేక్షకులను అలరించే అవకాశాలు కనిపిస్తున్నాయి. ప్రోమోతోనే ఆసక్తిని పెంచిన ఈ పాట పూర్తి వెర్షన్ విడుదలైన తర్వాత తెలంగాణ ఫోక్ మ్యూజిక్ అభిమానులను మరింతగా ఆకట్టుకోవడం ఖాయంగా కనిపిస్తోంది.
