Monkeys: ఒక్క కోతిని అమ్మితే 25 లక్షల రూపాయలు.. కోతుల ధర ఇంతలా ఎందుకు పెరిగాయో తెలుసా?
Monkeys: ఒక్క కోతిని అమ్మితే లైఫ్ సెటిలైపోతుంది. ఒక్కోకోతిని పాతిక లక్షల రూపాయలు ఇచ్చి కొంటున్నారు. ఇంతలా కోతుల ధరలు ఎందుకు పెరిగాయి? వాటితో ఏం చేస్తారు? తెలుసుకోండి.
కోతి అమ్మితే లక్షల రూపాయలు
సాధారణంగా మన దేశంలో కోతులు దేవాలయాల వద్ద గుంపులుగా కనిపిస్తుంటాయి. వాటిని జనం పెద్దగా పట్టించుకోరు. కానీ మన పొరుగు దేశమైన చైనాలో మాత్రం కోతులకు ఉన్న డిమాండ్ చూస్తే ఆశ్చర్యపోతారు. చైనాలో ఇప్పుడు ఒక కోతి ధర విపరీతంగా పెరిగిపోయింది. అక్కడ ఒక్కో ప్రయోగశాల 'మకాక్' జాతి కోతి ధర ఏకంగా 1,80,000 యువాన్లకు చేరింది. అంటే మన భారతీయ రూపాయిల్లో దాదాపు రూ.25.5 లక్షలకు పైమాటే. ఇంత డబ్బు చెల్లించడానికి పరిశోధకులు సిద్ధంగా ఉన్నారు. కానీ సరిపడా కోతులు దొరక్క చైనాలోని శాస్త్రవేత్తలు తీవ్ర ఇబ్బందులు పడుతున్నారు.
కోతులతో ఏం చేస్తారు?
కోతులకు ఇంత భారీ రేటు పెరగడానికి ప్రధాన కారణం చైనాలోని ఫార్మాసూటికల్, బయోటెక్నాలజీ రంగాల్లో వస్తున్న భారీ మార్పులే. క్యాన్సర్, మధుమేహం, గుండె సంబంధిత వ్యాధులు, మెదడుకు సంబంధించిన తీవ్రమైన వ్యాధుల కోసం చైనా సరికొత్త ఔషధాలను, వ్యాక్సిన్లను తయారు చేస్తోంది. వైద్య రంగంలో అగ్రరాజ్యాల ఆధిపత్యాన్ని తట్టుకుని గ్లోబల్ మెడిసిన్ హబ్గా మారాలని చైనా లక్ష్యంగా పెట్టుకుంది. అయితే మానవ శరీరంలో ప్రయోగించే ముందు ఈ ఔషధాల ప్రభావం, సేఫ్టీని పరీక్షించడానికి మనుషులకు అత్యంత దగ్గరగా ఉండే 'మకాక్' జాతి కోతులు తప్పనిసరి అయ్యాయి.
కోతులు దొరక్క ఇబ్బందులు
డిమాండ్ పెరిగినంత వేగంగా కోతులు దొరక్కపోవడం వాటి ధరలు విపరీతంగా పెరిగాయి. ప్రయోగాలకు ఉపయోగించే కోతులు కనీసం 3 సంవత్సరాల వయస్సు కలిగి ఉండాలి. వాటి ప్రత్యుత్పత్తి సమయం తక్కువగా ఉండడం, అవి చాలా నెమ్మదిగా పెరగడం వల్ల కోతుల సరఫరా తగ్గిపోయింది. దీనికి తోడు అడవుల్లో కూడా వీటి సంఖ్య తగ్గుతుండటం ల్యాబ్లకు సమస్యగా మారింది. ఏటా వేల సంఖ్యలో కోతులు అవసరమవుతుండగా, మార్కెట్లో తగినంత సరఫరా లేకపోవడంతో వాటి కోసం తెగ వెతుకుతున్నారు. కోతులను కొనేందుకు ముందుకు వస్తున్నారు.
