- Home
- Entertainment
- కోట శ్రీనివాసరావు, బాబుమోహన్ కాంబోలో 60 సినిమాలు, 35 ఏళ్ల స్నేహం, విషాదంలోను వీడని అనుబంధం
కోట శ్రీనివాసరావు, బాబుమోహన్ కాంబోలో 60 సినిమాలు, 35 ఏళ్ల స్నేహం, విషాదంలోను వీడని అనుబంధం
కోట శ్రీనివాసరావు అనగానే గుర్తుకువచ్చే మరో పేరు బాబుమోహన్. వీరిద్దరి కాంబినేషన్ లో సినిమా అంటే అది సూపర్ హిట్ అవ్వాల్సిందే. దాదాపు 60 సినిమాల్లో కలిసి నటించిన ఈ ఇద్దరి స్నేహం, టాలీవుడ్ కే ప్రత్యేకం.
వయస్సు విషయం పక్కన పెడితే విడదీయలేని అనుబంధం కోట శ్రీనివాసరావు, బాబుమోహన్ ది. వీరిద్దరి మధ్య 10 ఏళ్ల వయసు తేడా ఉన్నా కాని, ఇండస్ట్రీలో మంచి స్నేహానికి నిదర్శనంగా నిలిచారు. కోట శ్రీనివాసరావు తో బాబుమోహన్ కాంబినేషన్ ఉందంటే ఆ సినిమా హిట్ అయినట్టే అనే పేరు ఉండేది. అంతే కాదు సినిమాలో వీరి కలయికలో సీన్స్ కోసం ఫ్యాన్స్ ఎదురు చూసేవారు. వీరిద్దరు కలిసి కనిపిస్తే కడుపుబ్బా నవ్వుకోవచ్చు అని ఆశపడేవారు ఆడియన్స్. దాదాపు 35 ఏళ్ల స్నేహ బంధం వీరిద్దరిది.
కోట శ్రీనివాసరావు - బాబు మోహన్ కాంబినేషన్ కలిసింది బొబ్బిలి రాజా సినిమాతో. ఈ సినిమాలో వీరి కామెడీకి ప్రేక్షకులు కడుపుబ్బా నవ్వుకున్నారు. వీరి కాంబోలో ఏదో మ్యాజిక్ ఉంది అని గ్రహించిన దర్శకులు ఎస్వీ కృష్ణారెడ్డి, ఈవీవీ సత్యనారాయణ తదితరులు ఈ కాంబినేషన్‌ను రిపీట్ చేయడం మొదలు పెట్టారు.
అంతే కాదు వీరి కోసం ప్రత్యేకంగా సీన్లు కూడా రాయడం, సినిమాలో వీరి సన్నివేశాలు పెంచడం లాంటివి చేసేవారు. ఇక కోటా, బాబుమోహన్ కాంబినేషన్ లో కడుపు చెక్కలయ్యేలా నవ్వించిన సినిమాలు చిన్నరాయుడు, ఏవండి ఆవిడ వచ్చింది, అల్లరి అల్లుడు, సీతారత్నం గారి అబ్బాయి, నెంబర్ వన్, మాయలోడు, జంబలికిడిపంబ, సహా దాదాపు 60 సినిమాల్లో వీరి కాంబినేషన్ అద్భుతంగా పండింది.
ఓనర్ పనివాడు,తండ్రీ కొడుకు, స్నేహితులు, రాజకీయ నాయకులు, ఇలా రకరాకల పాత్రలు వీరిద్దరు అదరగొట్టారు. ఇక మామగారు సినిమాలో బిచ్చగాడిగా బాబుమోహన్, హీరోయిన్ తండ్రిగా కోట.. వీధి అరుగు మీద వీరిద్దరి కాంబినేషన్ సీన్లు చూసి జనాలు నవ్వలేక పొట్టపట్టుకునేవారంటే అతిశయోక్తి కాదు.
కోట శ్రీనివాసరావు - బాబు మోహన్ ప్రాణ స్నేహితుల్లా, అన్నదమ్ముల్లా మెలిగారు. వీరిద్దరి కాంబో సినిమాల్లో నే కాదు నిజ జీవితంలో కూడా వీరిమధ్య కొన్ని సారుప్యతలు ఉన్నాయి. ఇద్దరు రాజీయాల్లోకి వెళ్లారు. ఇద్దరు అసెంబ్లీ లో అడుగు పెట్టారు, ఇద్దరు ఎమ్మెల్యేలు అయ్యారు.
కాకపోతే బాబు మోహన్‌కి అదృష్టం కలిసొచ్చి ఏకంగా చంద్రబాబు నాయుడు కేబినెట్‌లో మంత్రిగా ఛాన్స్ కొట్టేశారు. అయితే కేవలం గన్‌మెన్‌ల కోసమే కోట శ్రీనివాసరావు ఎమ్మెల్యే అయ్యారని ఓ సందర్భంలో బాబు మోహన్ తెలిపారు. తొలుత టీడీపీ నుంచి తాను ఎమ్మెల్యేగా గెలిచి షూటింగ్‌కు గన్‌మెన్‌లతో వచ్చేవాడిని చెప్పారు.
అది చూసి తట్టుకోలేకపోయిన కోట.. వెంటనే బీజేపీలో చేరి విజయవాడ తూర్పు నియోజకవర్గం నుంచి ఎమ్మెల్యేగా గెలిచినట్లు బాబు మోహన్ ఓ సందర్భంలో అన్నారు. ఎమ్మెల్యే అయిన తర్వాత మాక్కూడా గన్‌మెన్లు ఉన్నారని చెప్పేవాడని తెలిపారు.
ఇక అసెంబ్లీలోకూడా కోట, బాబుమోహన్ ఇద్దరు పక్కపక్కనే కూర్చొనేవాళ్లట. కాని రెండేళ్ల బాబుమోహన్ మంత్రి కావడంతో, బాబుమోహన్ సీట్ మారింది. సీటింగ్ మారిన తరువాత ముందు వరసలో బాబుమోహన్, బ్యాక్ రో లో కోట కూర్చోనేవాళ్లు. అయితే కోటా మాత్రం మంత్రివి అయినా సరే పక్కనే కూర్చోవాలని మారాం చేసేవాడట, ఆతరువాత చిన్నగా రాజకీయాలకు కూడా ఆయన దూరం అయ్యాడు. నటనకు మాత్రమే పరిమితం అయ్యాడు కోట.
కోట శ్రీనివాసరావు , బాబుమోహన్ ఇద్దరి స్నేహ బంధం విషాదంలో కూడా వదల్లేదు. వ్యక్తిగత జీవితంలో విషాదం ఒకటి ఇద్దరికి ఒకేలా జరిగింది. బాబు మోహన్, కోట శ్రీనివాసరావు ఇద్దరి కొడుకులు ఒకేలా మరణించారు. వీరిద్దరి కుమారులు రోడ్డు ప్రమాదంలో కన్నుమూశారు. కోటకి ఒక్కగానొక్క కొడుకు వెంకట అంజనేయ ప్రసాద్. 2010 జూన్ 20న హైదరాబాద్‌లో జరిగిన రోడ్డు ప్రమాదంలో దుర్మరణం చెందారు. కొడుకు మరణం తరువాతే కోటా బాగా కృంగిపోయారు. అటు బాబు మోహన్ కుమారుడు.. ఓ పాపను తప్పించే క్రమంలో రోడ్డు ప్రమాదానికి గురై ప్రాణాలు కోల్పోయాడు. దాంతో కొడుకు పేరు మీద ట్రస్ట్ ఓపెన్ చేసి పలు సామాజిక కార్యక్రమాలు నిర్వహిస్తున్నారు.
