- Home
- Business
- PAN Card: పాన్ కార్డ్ యూజర్లకు అలర్ట్.. ఈ 5 లావాదేవీల్లో పాన్ నంబర్ ఇవ్వకపోతే భారీ పెనాల్టీ తప్పదు
PAN Card: పాన్ కార్డ్ యూజర్లకు అలర్ట్.. ఈ 5 లావాదేవీల్లో పాన్ నంబర్ ఇవ్వకపోతే భారీ పెనాల్టీ తప్పదు
PAN Card : పాన్ కార్డ్ కేవలం ఐటీ రిటర్న్స్కే కాదు, ఈ 5 రకాల పెద్ద ఆర్థిక లావాదేవీలకు కూడా తప్పనిసరి. తప్పు నంబర్ ఇస్తే రూ.10 వేల జరిమానా పడుతుంది. ఆ వివరాలు ఇక్కడ తెలుసుకుందాం.
పాన్ కార్డ్ యూజర్లు ఈ తప్పు చేస్తే బ్యాంక్ అకౌంట్ విండోస్ క్లోజ్
ఓటరు కార్డ్, ఆధార్ కార్డ్ తరహాలోనే పాన్ కార్డ్ కూడా మన దేశంలో అత్యంత కీలకమైన పత్రం. అయితే, చాలా మంది పాన్ కార్డ్ను కేవలం ఆదాయపు పన్ను రిటర్న్స్ (ఐటీఆర్) దాఖలు చేయడానికి మాత్రమే అవసరమైన పత్రంగా భావిస్తారు. కానీ వాస్తవానికి, అనేక పెద్ద ఆర్థిక లావాదేవీల నిర్వహణకు పాన్ కార్డ్ చాలా ముఖ్యం. బ్యాంక్ ఖాతా తెరవడం నుండి ఆస్తుల కొనుగోలు, షేర్లలో పెట్టుబడుల వరకు ఎన్నో పనులకు పాన్ నంబర్ ఇవ్వడం చట్టరీత్యా తప్పనిసరి.
నిపుణుల అభిప్రాయం ప్రకారం, పాన్ నంబర్ ద్వారా ఆదాయపన్ను శాఖ దేశంలో జరిగే పెద్ద పెద్ద ఆర్థిక లావాదేవీలపై నిఘా ఉంచుతుంది. ఒక వ్యక్తి ఆదాయం, ఖర్చుల వివరాలు సరిగ్గా నమోదయ్యాయా లేదా అని నిర్ధారించుకోవడానికి ఇది ఉపయోగపడుతుంది. మరి ఏ ఏ లావాదేవీలకు పాన్ కార్డ్ తప్పనిసరిగా ఇవ్వాలో తెలుసా? మొత్తం ఐదు రకాల ముఖ్యమైన లావాదేవీలకు పాన్ నంబర్ ఇవ్వడాన్ని ప్రభుత్వం తప్పనిసరి చేసింది.
ఆస్తుల కొనుగోలు, విక్రయం
మీరు ఏదైనా స్థలం, ఇల్లు లేదా ఫ్లాట్ వంటి ఆస్తిని కొనాలన్నా లేదా అమ్మాలన్నా పాన్ కార్డ్ చాలా ముఖ్యం. ఒకవేళ ఆ లావాదేవీ విలువ రూ.20 లక్షల కంటే ఎక్కువగా ఉంటే, కచ్చితంగా పాన్ కార్డ్ వివరాలను అందించాల్సి ఉంటుంది. లేకపోతే ఆ లావాదేవీ ముందుకు సాగదు.
ఖరీదైన వస్తువుల కొనుగోళ్లు
మీరు మార్కెట్లో లేదా ఏదైనా షోరూమ్లో భారీగా షాపింగ్ చేస్తున్నప్పుడు జాగ్రత్తగా ఉండాలి. ఒకేసారి రూ.2 లక్షల కంటే ఎక్కువ విలువైన వస్తువులను లేదా సేవలను కొనుగోలు చేస్తే పాన్ నంబర్ ఇవ్వడం తప్పనిసరి అవుతుంది. ఇది నగదు రూపంలో లేదా డిజిటల్ రూపంలో చేసినా వర్తిస్తుంది.
అన్లిస్టెడ్ షేర్ల ట్రేడింగ్
షేర్ మార్కెట్లో పెట్టుబడి పెట్టే వారికి కూడా పాన్ కార్డ్ నిబంధనలు ఉన్నాయి. స్టాక్ ఎక్స్ఛేంజీలలో లిస్ట్ కాని కంపెనీల షేర్లను కొనుగోలు చేసినా లేదా విక్రయించినా పాన్ కార్డ్ అవసరం అవుతుంది. ఈ లావాదేవీల విలువ రూ.1 లక్ష దాటితే పాన్ నంబర్ ఇవ్వడం తప్పనిసరి.
వాహనాల కొనుగోలు, డీమ్యాట్ అకౌంట్
మీరు కొత్తగా కారు లేదా బైక్ కొనాలని ప్లాన్ చేస్తున్నారా? అయితే రూ.5 లక్షల కంటే ఎక్కువ విలువైన మోటార్ సైకిల్ లేదా కారు కొనుగోలు చేసేటప్పుడు పాన్ కార్డ్ సబ్మిట్ చేయాలి. దీనితో పాటు, షేర్ మార్కెట్ ట్రేడింగ్ కోసం డీమ్యాట్ అకౌంట్ తెరవడానికి కూడా పాన్ కార్డ్ కచ్చితంగా కావాలి.
తప్పు నంబర్ ఇస్తే భారీ జరిమానా
ఆర్థిక లావాదేవీల సమయంలో పొరపాటున లేదా కావాలని తప్పు పాన్ నంబర్ ఇస్తే భారీ ఇబ్బందులు ఎదుర్కోవాల్సి వస్తుంది. నిబంధనల ప్రకారం, తప్పుడు పాన్ నంబర్ ఇస్తే రూ.10,000 వరకు జరిమానా విధించే అవకాశం ఉంది. అంతేకాకుండా, టాక్స్ క్రెడిట్ పొందడంలో ఇబ్బందులు, డాక్యుమెంట్లలో తేడాలు వంటి అనేక సమస్యలు వస్తాయి. అందుకే పాన్ నంబర్ ఇచ్చేటప్పుడు చాలా జాగ్రత్తగా ఉండాలి.
ఆదాయపన్ను శాఖ ప్రస్తుతం డేటా అనలిటిక్స్, అత్యాధునిక సాంకేతికతను ఉపయోగించి ఈ సమాచారాన్ని నిరంతరం విశ్లేషిస్తోంది. ఒక వ్యక్తి ఆదాయానికి, అతను పెట్టే ఖర్చులకు మధ్య తేడాలు లేదా వ్యత్యాసాలు కనిపిస్తే, ఐటీ శాఖ నోటీసులు జారీ చేసి వివరణ కోరుతుంది. అందుకే పాన్ నిబంధనలను పాటించడం, సరైన సమాచారాన్ని అందించడం ప్రతి ఒక్కరికీ ఎంతో ముఖ్యం.
