Stock Market Crash: కుదేలైన మార్కెట్‌.. భారీగా పతనమైన సెన్సెక్స్, నిఫ్టీ. ఈ పతనం ఆరంభమేనా.?

ఏమంటూ ట్రంప్‌ అమెరికా అధ్యక్షుడిగా రెండోసారి పదవి స్వీకరించారో ఆ రోజు నుంచి ఏదో ఒక అలజడి రేగుతూనే ఉంది. ఒక్క అమెరికాకే పరిమితం కాకుండా ప్రపంచమంతా ట్రంప్‌ ప్రభావం పడుతోంది. తాజాగా ట్రంప్ విధించిన ప్రతీకార సుంకాల ప్రభావం యావత్‌ ప్రపంచంపై పడింది. స్టాక్‌ మార్కెట్లపై ఈ ప్రభావం స్పష్టంగా కనిపిస్తోంది..  

అమెరికా అధ్యక్షుడు ట్రంప్ విధించిన పన్నుల వల్ల ప్రపంచ మార్కెట్లలో భయం నెలకొంది. ట్రంప్ ఏప్రిల్ 2న చాలా దేశాలకు 25% పన్ను వేశారు. దీని కారణంగా గత గురు, శుక్రవారాల్లో అమెరికా మార్కెట్ పడిపోయింది. ఇది ఇప్పుడు ఆసియా దేశాల్లో కూడా కనిపిస్తోంది. ముఖ్యంగా భారత మార్కెట్‌పై కూడా దీని ప్రభావం స్పష్టంగా కనిపిస్తోంది. మార్కెట్లకు బ్లాక్‌ మండేగా మారింది. సోమవారం మన మార్కెట్ మొదట్లో వెయ్యి పాయింట్లు తగ్గింది. ఇది ఇలాగే ఉంటుందా, లేక మార్కెట్ సర్దుకుంటుందా అనేది చూడాలి. 

US President Donald Trump

మార్కెట్ల పతనంపై సమర్థించుకున్న ట్రంప్‌:

మార్కెట్ల పతనమవుతోన్నా ట్రంప్‌ తన నిర్ణయాన్ని సమర్థించుకున్నారు. మార్కెట్ పడిపోవడం గురించి ట్రంప్ మాట్లాడుతూ, కొన్నిటిని సరి చేయడానికి మందులు తీసుకోవాలి. ఇతర దేశాలు మనల్ని బాగా చూసుకోలేదు. మార్కెట్లో ఏం జరుగుతుందో చెప్పలేను. మన దేశం చాలా స్ట్రాంగ్‌గా ఉంది అని అమెరికా అధ్యక్షుడు చెప్పుకొచ్చారు. అమెరికా మాజీ అధ్యక్షుడు జో బైడెన్‌పై కూడా ట్రంప్‌ విరుచుకుపడ్డారు. 

జో బైడెన్ పాలనలో అమెరికాను సరిగ్గా చూసుకోలేదని విమర్శించారు. బైడైన్‌ చేతకాని తనం వల్లే అలా జరిగిందంటూ దుయ్యబట్టారు. ఇతర దేశాలు మన వ్యాపారాన్ని, డబ్బును, ఉద్యోగాలను తీసుకెళ్లారు. ఇవన్నీ మెక్సికో, చైనా, కెనడాకు వెళ్లాయని ట్రంప్‌ అన్నారు. 

అమెరికా మార్కెట్ పతనంతో దీన్ని మరో బ్లాక్‌ మండేగా చెబుతున్నారు. గురు, శుక్రవారాల్లో అమ్మకాల తర్వాత వాల్ స్ట్రీట్‌లో పెద్ద పతనం కనిపించింది. ఇప్పుడు మన మార్కెట్లు కూడా పడిపోతున్నాయి. ఇది ఒక్క రోజుతో ఆగుతుందా లేదా చూడాలి. మన మార్కెట్ అమెరికా మీద ఆధారపడి లేదు. అందుకే త్వరగా మంచి స్థితికి వస్తుందని నిపుణులు అభిప్రాయపడుతున్నారు. సోమవారం సెన్సెక్స్ 3000 పాయింట్లు, నిఫ్టీ 1000 పాయింట్లు పడిపోయాయి. 

డవ్ ఫ్యూచర్స్ ఆదివారం సాయంత్రం 1,600 పాయింట్లు పడిపోవడంతో, దాని ప్రభావం ఇక్కడ కూడా ఉండొచ్చు. శుక్రవారం నిఫ్టీ 350 పాయింట్లు పడిపోయి 23,000 దిగువకు చేరింది. సెన్సెక్స్ 900 పాయింట్లు పడిపోయింది. చైనా మీద 34%, ఇండియా మీద 26%, యూరోపియన్ యూనియన్ మీద 20% పన్నును ట్రంప్ వేశారు. ఇది అమెరికా, ప్రపంచ ఆర్థిక మార్కెట్లను షాక్‌కు గురి చేసింది. దీనివల్ల అమెరికా షేర్ల విలువలో దాదాపు 6 ట్రిలియన్ డాలర్లు నష్టం వచ్చింది.