దొరికిపోతామనే భయంతో ఉత్తమ్ రూ.3 కోట్లను తగులబెట్టారు: కేటీఆర్

కోదాడలో పోటీ చేసిన సమయంలో ఉత్తమ్ కుమార్ రెడ్డి రూ.3 కోట్లను ప్రజలకు పంచేందుకు వెళుతూ.. దొరికిపోతాననే భయంతో ఇన్నోవా కారును తగులబెట్టుకున్నారని కేటీఆర్ గుర్తు చేశారు.  

హుజుర్ నగర్ అసెంబ్లీ ఉపఎన్నికకు సంబంధించి నల్గొండలో కార్యకర్తల సన్నాహక సమావేశంలో కేటీఆర్ పాల్గొన్నారు. ఈ సందర్భంగా హుజుర్‌నగర్‌ ఉపఎన్నికకు టీఆర్ఎస్ అభ్యర్ధిగా సైదిరెడ్డిని కార్యకర్తలకు పరిచయం చేశారు.

ఈ సందర్భంగా కేటీఆర్ మాట్లాడుతూ.. గడచిన అసెంబ్లీ ఎన్నికల్లో ఉత్తమ్‌కుమార్ రెడ్డికి సైదిరెడ్డి చెమటలు పట్టించి గెలిచినంత పనిచేశారని కేటీఆర్ గుర్తు చేశారు. ట్రక్కు గుర్తు లేకపోయుంటే ఉత్తమ్‌కు ఓటమి తప్పేది కాదన్నారు.

ఈ ఉపఎన్నికల్లో కాంగ్రెస్, బీజేపీ గెలిచినా జనానికి ఒరేగేది లేదని.. ఈసారి కాంగ్రెస్ పార్టీకి హుజుర్‌నగర్‌లో ఓటమి తప్పదని కేటీఆర్ తేల్చి చెప్పారు. సైదిరెడ్డి విజయం సాధిస్తే హుజుర్‌నగర్‌కు సంబంధించిన సమస్యలను జగదీశ్‌రెడ్డికో లేదంటే తన వద్దకో తీసుకొస్తారన్నారు.

ఐదేళ్ల కాలంలో నల్గొండ జిల్లాను మూడు జిల్లాలుగా విభజించి పాలనను పరుగులు పెట్టిస్తున్నామని, కొత్త రెవెన్యూ డివిజన్లు, గ్రామ పంచాయతీలు ఏర్పాటు చేశామని కేటీఆర్ గుర్తు చేశారు.

త్వరలో అధికారంలోకి వచ్చేది మేమేనంటూ బీజేపీ ఎగిరిపడుతోందని.. అయితే ఎవరి స్థానమేంటో ప్రజలే నిర్ణయిస్తారని మంత్రి తెలిపారు.

కోదాడలో పోటీ చేసిన సమయంలో ఉత్తమ్ కుమార్ రెడ్డి రూ.3 కోట్లను ప్రజలకు పంచేందుకు వెళుతూ.. దొరికిపోతాననే భయంతో ఇన్నోవా కారును తగులబెట్టుకున్నారని కేటీఆర్ గుర్తు చేశారు.  

సంబంధిత వార్తలు