కరీంనగర్ పరువు హత్య: ఆదివారం నాడే కుమార్ మిస్సింగ్

కరీంనగర్ జిల్లా  శంకరపట్నం మండలం తాడికల్ గ్రామానికి చెందిన కుమార్  ఆదివారం రాత్రి 9 గంటల నుండి కన్పించకుండా పోయాడు.ఈ విషయమై పోలీసులకు ఫిర్యాదు చేసినా పట్టించుకోలేదని  కుమార్ కుటుంబసభ్యులు ఆరోపిస్తున్నారు. 

కరీంనగర్: కరీంనగర్ జిల్లా  శంకరపట్నం మండలం తాడికల్ గ్రామానికి చెందిన కుమార్  ఆదివారం రాత్రి 9 గంటల నుండి కన్పించకుండా పోయాడు.ఈ విషయమై పోలీసులకు ఫిర్యాదు చేసినా పట్టించుకోలేదని  కుమార్ కుటుంబసభ్యులు ఆరోపిస్తున్నారు.  పోలీసులు సకాలంలో స్పందిస్తే కుమార్ బతికేవాడని  కుటుంబసభ్యులు ఆవేదన వ్యక్తం చేస్తున్నారు.

 కరీంనగర్ జిల్లా శంకరపట్నం  మండలం తాడికల్ గ్రామానికి చెందిన కుమార్ ... వంకాయలపల్లెకు చెందిన ఓ యువతిని ప్రేమిస్తున్నాడు. వీరిద్దరికి కూడ పెళ్లి చేయాలని రెండు కుటుంబాలు నిర్ణయం తీసుకొన్నాయి. అయితే  కొంత కాలం క్రితం ఈ రెండు కుటుంబాల మధ్య గొడవ జరిగినట్టు సమాచారం.

అయితే  ఈ గొడవ కారణంగానే  కుమార్‌ను  యువతి కుటుంబసభ్యులు హత్యచేసి ఉంటారని  మృతుడి  కుటుంబసభ్యులు  ఆరోపిస్తున్నారు.  కుమార్  అక్టోబర్ 7వ తేదీ రాత్రి నుండి అదృశ్యమయ్యాడు. అతని ఆచూకీ కోసం కుటుంబసభ్యులు  వెతికినా ప్రయోజనం లేకపోయింది.

అక్టోబర్ 8వ, తేదీ మధ్యాహ్నం వరకు వెతికినా ఆచూకీ లభ్యం కాలేదు. దీంతో కుమార్ కుటుంబసభ్యులు  పోలీసులకు ఫిర్యాదు చేశారు.  అయితే పోలీసులు సకాలంలో స్పందించలేదని  మృతుడి బంధువులు ఆరోపిస్తున్నారు. ఫిర్యాదు చేసేందుకు వెళ్లిన  తన తల్లిని, తనను  పోలీసులు  దూషించారని కుమార్ సోదరుడు ఆరోపించాడు.

ఈ విషయమై ఓ తెలుగున్యూస్ ఛానెల్‌కు ఇచ్చిన ఇంటర్వ్యూలో  పోలీసులపై తీవ్ర ఆరోపణలు చేశాడు. పోలీసులు సకాలంలో స్పందించి ఉంటే తన సోదరుడు బతికి ఉండేవాడని ఆయన అభిప్రాయపడ్డారు.  హంతకులతో పోలీసులు కుమ్మక్కయ్యారని ఆయన ఆరోపించారు. 

ఫిర్యాదు చేసేందుకు వెళ్లిన  తనను ఎఎస్ఐ కాలర్ పట్టుకొని దూషించాడని  కుమార్ సోదరుడు ఆరోపించారు.  పోలీసుల నిర్లక్ష్యం వల్లే కుమార్ మరణించాడని బంధువులు, కుటుంసభ్యులు ఆరోపిస్తున్నారు.

సంబంధిత వార్తలు