ముగిసిన జైట్లీ అంత్యక్రియలు, భారీగా తరలివచ్చిన నేతలు, కార్యకర్తలు

బీజేపీ సీనియర్ నేత, కేంద్ర మాజీ మంత్రి అరుణ్ జైట్లీ అంత్యక్రియలు ముగిశాయి. ఢిల్లీలోని యమునా నది ఒడ్డున వున్న నిగమ్ బోధ్‌లో హిందూ సాంప్రదాయం ప్రకారం ఆయన అంత్యక్రియలు జరిగాయి. 

బీజేపీ సీనియర్ నేత, కేంద్ర మాజీ మంత్రి అరుణ్ జైట్లీ అంత్యక్రియలు ముగిశాయి. ఢిల్లీలోని యమునా నది ఒడ్డున వున్న నిగమ్ బోధ్‌లో హిందూ సాంప్రదాయం ప్రకారం అధికార లాంఛనాలతో ఆయన అంత్యక్రియలు జరిగాయి.

జైట్లీ చితికి కుమారుడు రోహన్ నిప్పంటించారు. ఉపరాష్ట్రపతి వెంకయ్య నాయుడు, కేంద్రమంత్రులు అమిత్ షా, రాజ్‌నాథ్ సింగ్, పలువురు ముఖ్యమంత్రులు, అభిమానులు పెద్దసంఖ్యలో హాజరై అరుణ్ జైట్లీకి తుది వీడ్కోలు పలికారు. 

అంతకు ముందు జైట్లీ భౌతికకాయాన్ని బీజేపీ కేంద్ర కార్యాలయం నుంచి ఊరేగింపుగా నిగమ్ బోధ్‌కు తరలించారు. దారి పొడవునా ప్రజలు, బీజేపీ కార్యకర్తలు అరుణ్ జైట్లీ భౌతికకాయానికి నివాళుర్పించారు. ఆయన అంతిమయాత్రకు బీజేపీ నేతలు, కార్యకర్తలు, అభిమానులు వేలాదిగా తరలివచ్చారు.

ఉదయం స్వగృహం నుంచి ఆయన భౌతికకాయాన్ని బీజేపీ కేంద్ర కార్యాలయానికి తీసుకొచ్చారు. అనంతరం ప్రజలు, నేతల సందర్శనార్ధం మధ్యాహ్నం వరకు అక్కడే వుంచారు.

గత కొంతకాలంగా క్యాన్సర్‌తో బాధపడుతున్న అరుణ్ జైట్లీ ఎయిమ్స్‌ చికిత్సపొందుతూ శనివారం తుదిశ్వాస విడిచారు. న్యాయకోవిదుడిగా, పార్లమెంటెరీయన్‌గా జైట్లీ దేశప్రజలతో మన్ననలు అందుకున్నారు. కొద్దిరోజుల వ్యవధిలోనే సుష్మా స్వరాజ్, జైట్లీ వంటి అగ్రనేతలను కోల్పోవడంతో బీజేపీ శ్రేణులు కన్నీరుమున్నీరవుతున్నారు.