గాలి అరెస్ట్.. మరో ముగ్గురి కోసం గాలింపు

అంబిడెంట్ మార్కెటింగ్ ప్రైవేట్ లిమిటెడ్ కేసులో గాలి జనార్ధన్ రెడ్డిని సీసీబీ పోలీసులు అదుపులోకి తీసుకున్న సంగతి తెలిసిందే. కాగా ఈ కేసుకు సంబంధించి మరో ముగ్గురి కోసం తీవ్రంగా గాలిస్తున్నారు. ఈ కంపెనీ చీఫ్ సయ్యద్ అహ్మద్ ఫరీద్‌కు, గాలి జనార్ధన్ రెడ్డికి మధ్య సయోధ్య కుదిర్చిన ఇద్దరు వ్యక్తులు పరారీలో ఉన్నారు. 

ఆ ఇద్దరితో పాటు గాలి జనార్ధన్ రెడ్డికి 57కిలోల బంగారాన్ని అక్రమంగా చేరవేసిన మరో వ్యక్తి కోసం కూడా గాలిస్తున్నారు. బళ్లారిలో ఉన్న రాజమహల్ ఫ్యాన్సీ జ్యువెలర్స్ యజమాని రమేష్ కొఠారీ నుంచి బంగారాన్ని తరలించినట్లు తెలిసింది. ఈ కేసులో గాలి జనార్ధన్‌రెడ్డికి నవంబర్ 24వరకూ జ్యుడీషియల్ కస్టడీ విధించారు. 

గాలి తరపు న్యాయవాది కర్ణాటక హైకోర్టులో బెయిల్ కోసం దాఖలు చేశారు. ఈ పిటిషన్‌పై సోమవారం విచారణ జరగాల్సి ఉన్నప్పటికీ.. కేంద్ర మంత్రి అనంత్ కుమార్ ఆకస్మిక మృతితో కోర్టుకు సెలవు ప్రకటించారు. దీంతో మంగళవారం గాలి బెయిల్ పిటిషన్ విచారణకొచ్చే అవకాశముంది.

read more news