చలికాలంలో విటమిన్ డి లోపం.. ఎలా పోగొట్టాలంటే.. ?

విటమిన్ డిని ఒక్క సూర్యరశ్మి ద్వారే కాదు వివిధ ఆహారాల నుంచి కూడా పొందొచ్చు. ఇతర కాలాలతో పోల్చితే చలికాలంలో చాలా మంది విటమిన్ డి లోపంతో బాధపడుతుంటారు. కానీ ఈ విటమిన్ డి లోపం వల్ల ఎన్నో అనారోగ్య  సమస్యలు వస్తుంటాయి.   

vitamin d deficiency

ఎముకలు, దంతాలు, కండరాలు ఆరోగ్యంగా ఉండటానికి మన శరీరానికి విటమిన్ డి చాలా అవసరం. ఈ విటమిన్ డి సూర్యరశ్మి ద్వారా బాగా అందుతుంది. ఈ పోషకం మన శరీరంలో కాల్షియం, ఫాస్పేట్ మొత్తాన్ని నియంత్రించడానికి సహాయపడుతుంది. బలమైన ఎముకలను నిర్మించేందుకు ఈ పోషకం చాలా చాలా అవసరం. విటమిన్ డి తక్కువగా ఉంటే ఎముకలు బలహీనపడతాయి. అంతేకాదు ఇది బోలు ఎముకల వ్యాధికి, ఎముకల పగుళ్లకు దారితీస్తుంది. ఈ విటమిన్ డి లోపం ఇతర వ్యాధులకు కూడా కారణమవుతుందంటున్నారు నిపుణులు. ఈ విటమిన్ డి లోపం పిల్లల్లో రికెట్స్ కు కూడా కారణమవుతుంది. 

Vitamin d

చలికాలంలో బాగా ఉష్ణోగ్రతలు తగ్గుతాయి. ముఖ్యంగా ఈ సీజన్ లో సూర్యరశ్మి చాలా తక్కువగా ఉంటుంది. మన చర్మానికి సూర్యరశ్మి తగిలే అవకాశం తక్కువగా ఉంటుంది. నిజానికి సూర్యరశ్మి ద్వారా అందే విటమిన్ డి మన శరీరానికి ప్రాథమిక వనరు. ఈ చలికాలంలో విటమిన్ డి లోపం ఎక్కువగా వచ్చే అవకాశం ఉందని నిపుణులు చెబుతున్నారు. ఒక్క వేసవిలోనే విటమిన్ డి స్థాయిలు తక్కువగా ఉంటాయని అర్థం కాదు. కానీ మీరు పోషకాలను సరిగ్గా తీసుకోవడం లేదని అర్థం చేసుకోవాలి. 

విటమిన్ డి ని పొందడానికి ఉత్తమ మార్గం సూర్యరశ్మి. అయితే చల్లని గాలుల వల్ల చాలా మంది బయటకు అడుగుపెట్టరు. సూర్య రశ్మిలో 8 నుంచి 15 నిమిషాలు ఉంటే తేలికదపాటి చర్మం ఉన్నవాళ్లకు విటమిన్ డి పుష్కలంగా అందుతుందని పరిశోధనలు వెల్లడించాయి. 

అయితే మన పోషక స్థాయిలను ఎక్కువగా ఉంచడంలో ఆహారాలు కీలక పాత్ర పోషిస్తాయి. ముఖ్యంగా కొన్ని రకాల ఆహారాల్లో విటమిన్ డి స్థాయిలు పుష్కలంగా ఉంటాయి. వీటిని తీసుకుంటే మీ మొత్తం ఆరోగ్యం మెరుగ్గా ఉంటుంది. అవేంటంటే.. 

- సాల్మన్

- పుట్టగొడుగులు

- ట్యూనా

- బలవర్థకమైన పాలు

- నారింజ

- గింజలు

- గుడ్లు 

విటమిన్ 'డి' లోపంతో వచ్చే సమస్యలు:
విటమిన్ డి పై సౌత్ ఆస్ట్రేలియా యూనివర్సిటీ అనేక పరిశోధనలు చేసింది. అయితే ఈ పరిశోధనలో విటమిన్ డి లోపంతో బాధపడే వాళ్ళు ఎక్కువగా హృద్రోగాలు (Heart diseases), బీపీ వ్యాధుల (BP diseases) బారిన పడుతున్నట్లు వాళ్ల పరిశోధనలో తేలింది.

సూర్యరశ్మి ద్వారా విటమిన్ డి ని పొందకుంటే ఆహారాన్ని తీసుకోవాల్సి ఉంటుంది. ఒక్క  ఆహారం నుంచి మాత్రమే విటమిన్ డిని పొందలేమనుకుంటే విటమిన్ డి సప్లిమెంట్లను కూడా తీసుకోవచ్చు. యుకె నేషనల్ హెల్త్ సర్వీసెస్ (ఎన్హెచ్ఎస్) ప్రకారం.. ప్రతి ఒక్కరూ అంటే గర్భిణీలు, పాలిచ్చే తల్లులతో సహా అందరూ శీతాకాలంలో 10 మైక్రోగ్రాముల విటమిన్ డి కలిగిన రోజువారీ సప్లిమెంట్ తీసుకోవచ్చని వెల్లడించింది. 

విటమిన్ డి లోపం సాధారణ లక్షణాలు 

అలసట 
ఎముక నొప్పి
కండరాల బలహీనత, కండరాల నొప్పులు లేదా కండరాల తిమ్మిరి
నిరాశ వంటి మానసిక మార్పులు
అయితే విటమిన్ డి లోపం ఎప్పుడూ లక్షణాలను చూపించకపోవచ్చు. అందుకే దీని స్థాయిలను చెక్ చేయడం మంచిది.