జయరాం హత్య కేసు: శిఖా చౌదరి పాత్రపై తేల్చని పోలీసులు, అనుమానాలు

కోస్టల్ బ్యాంక్ అధినేత, ప్రముఖ పారిశ్రామికవేత్త చిగురుపాటి జయరాం చౌదరి హత్య కేసులో రాకేశ్ రెడ్డి ప్రధాన నిందితుడని ఇప్పటికే స్పష్టమైన ఆధారాలు లభించాయి. పోలీసులకు ఇచ్చిన వాంగ్మూలంలో తనకు చెల్లించాల్సిన అప్పు విషయంలోనే జయరాంను చంపినట్లు రాకేశ్ రెడ్డి అంగీకరించాడు.

అయితే అప్పు తీసుకుంది జయరాం మేనకోడలు శిఖా చౌదరి కావడం, హత్య జరిగిన రోజు ఆమె తన మేనమామ ఇంటికి వెళ్లడం లాంటి విషయాల్లో క్లారిటీ రావాల్సి ఉంది. కార్పోరేట్ వ్యవహారాలు, వివాహేతర సంబంధాలు, ఆర్ధిక లావాదేవీల కలబోతగా ఉన్న ఈ కేసులో అనేక చిక్కుముడులు ఉన్నాయి.

శిఖా చౌదరి ఏదో దాస్తున్నారనే అనుమానాన్ని పోలీసులు వ్యక్తపరుస్తున్నారు. ఈ క్రమంలో ఆమెను కంచికచర్ల పోలీస్ స్టేషన్ నుంచి జగ్గయ్యపేటలోని రామ్‌కో సిమెంట్స్ గెస్ట్‌హౌస్‌కు తరలించారు. అక్కడ రాకేశ్ రెడ్డి, శిఖా చౌదరిని ఎదురెదురుగా కూర్చోబెట్టి ప్రశ్నిస్తున్నారు. ఈ విచారణలో మరిన్ని విషయాలు తెలిసే అవకాశం ఉందని పోలీసులు భావిస్తున్నారు.

మరోవైపు జయరాం హత్య కేసులో ప్రధాని నిందితుడు రాకేశ్ రెడ్డితో పాటు మరో ముగ్గురిని ఇవాళ పోలీసులు మీడియా ముందు ప్రవేశపెట్టనున్నారు. అయితే పై స్థాయి నుంచి ఒత్తిడి రావడంతో శిఖా చౌదరిని పోలీసులు తప్పించే ప్రయత్నం చేస్తున్నారనే ఆరోపణలు వినిపిస్తున్నాయి.