కుమార్ అనుమానాస్పద మృతి: మా వైఫల్యం లేదు: ఏసీపీ

శంకరపట్నం మండలం తాడికల్ గ్రామానికి చెందిన  కుమార్  అనుమానాస్పద మృతి కేసులో  తమ వైఫల్యం లేదని  ఏసీపీ కృపాకర్ రావు చెప్పారు.  

కరీంనగర్: శంకరపట్నం మండలం తాడికల్ గ్రామానికి చెందిన  కుమార్  అనుమానాస్పద మృతి కేసులో  తమ వైఫల్యం లేదని  ఏసీపీ కృపాకర్ రావు చెప్పారు.  మృతుడి కుటుంబసభ్యుల ఫిర్యాదు చేసిన  వెంటనే కేసు రిజిస్టర్ చేసినట్టు తెలిపారు.

సంఘటనాస్థలం వద్ద మృతుడి కుటుంబసభ్యులు కన్నీరు మున్నీరుగా విలపించారు. పోలీసు ఉన్నతాధికారుల కాళ్లు పట్టుకొని  తమకు న్యాయం చేయాలని  మృతుడి తల్లి కోరారు.

మృతుడి కుటుంబసభ్యుల ఫిర్యాదు మేరకు  కుమార్ అదృశ్యం జరిగిన ఘటనపై  కేసు నమోదు చేసినట్టు ఏసీపీ  కృపాకర్ రావు తెలిపారు.  కుమార్ శనివారం నాడు తన లవర్‌ను హూజూరాబాద్‌లోని కాలేజీ నుండి నిజామాబాద్‌కు తీసుకెళ్లాడని ఆదివారం నాడు లవర్‌తో కలిసి స్వగ్రామానికి చేరుకొన్నారని  ఏసీపీ తెలిపారు.

ఆదివారం రాత్రి నుండి కుమార్ కన్పించకపోయినా... సోమవారం సాయంత్రం కుటుంబసభ్యులు  ఫిర్యాదు చేయగానే  స్థానిక ఎస్ఐ కేసు నమోదు చేశారని  ఆయన గుర్తు చేశారు. ఈ ఘటనలో తమ నిర్లక్ష్యం లేదని ఆయన తేల్చి చెప్పారు.

ఇదిలా ఉంటే ఏడాది క్రితం అమ్మాయి కుటుంబసభ్యులు కుమార్‌పై కేసు పెట్టారని చెప్పారు. అయితే ఆరు మాసాల తర్వాత అమ్మాయి కుటుంబసభ్యులు కుమార్‌తో ఆ అమ్మాయిని ఇచ్చి వివాహం చేసేందుకు ఒప్పుకొన్నారని మృతుడు కుమార్ సోదరుడు తెలిపారు.

మూడు రోజుల క్రితం కుమార్ కు, ఆమె తండ్రికి మధ్య గొడవ జరిగిందని ఆయన చెప్పారు. కుమార్‌ను ఇంటికి పిలిపించిన తర్వాత కుమార్  అనుమానాస్పదస్థితిలో మరణించారని ఆయన తెలిపారు.

సంబంధిత వార్తలు