తప్పుడు ఆరోపణలతో క్షోభకు గురిచేయొద్దు: కోడెల

అసెంబ్లీ ఫర్నీచర్ విషయమై మాజీ స్పీకర్ కోడెల శివప్రసాదరావు స్పందించారు. తనను మానసికంగా క్షోభ పెట్టకూడదని ఆయన కోరారు. 

అమరావతి: తప్పుడు ఆరోపణలతో  తనను మానిసికంగా క్షోభ పెట్టకూడదని మాజీ స్పీకర్ కోడెల శివప్రసాదరావు కోరారు.

గురువారం నాడు ఆయన తనపై నమోదైన కేసుల విషయమై స్పందించారు.ఈ నెల 23వ తేదీ రాత్రి కోడెల శివప్రసాదరావుకు గుండెపోటుకు గురైన విషయం తెలిసిందే.

అసెంబ్లీ ఫర్నీచర్‌ను దారిని మళ్లించారనే విషయమై ఈ నెల 25వ తేదీన కోడెలతో పాటు ఆయన తనయుడు శివరామ్‌పై కూడ పోలీసులు కేసు  నమోదు చేశారు.ఈ పరిణామాలపై కోడెల శివప్రసాదరావు స్పందించారు.

హైద్రాబాద్ నుండి అసెంబ్లీ ఫర్నీచర్ ను అమరావతికి తరలించే సమయంలో   పాత సామాగ్రిని తన క్యాంపు కార్యాలయానికి తరలించారని కోడెల చెప్పారు. తన పదవీ కాలం పూర్తి కాగానే ఫర్నీచర్ ను తీసుకెళ్లాలని అసెంబ్లీ కార్యదర్శికి లేఖ రాసినట్టుగా ఆయన చెప్పారు.

ఫర్నీచర్‌కు సంబంధించిన  డబ్బులు కూడ చెల్లిస్తానని తాను అసెంబ్లీ కార్యదర్శికి స్పష్టం చేసినట్టుగా ఆయన గుర్తు చేశారు. తన కార్యాలయానికి మూడు రోజుల క్రితం అసెంబ్లీ అధికారులు వచ్చారన్నారు. అసెంబ్లీ ఫర్నీచర్ ఉంటే తీసుకెళ్లాలని తాను కోరినట్టుగా ఆయన  వివరించారు.

ఉద్దేశ్యపూర్వకంగానే తనను ఇబ్బంది పెడుతున్నారనే అభిప్రాయాన్ని కోడెల శివప్రసాదరావు వ్యక్తం చేశారు.తప్పుడు ఆరోపణలతో తనను ఇబ్బందుల పాలు చేయకూడదని ఆయన కోరారు.

సంబంధిత వార్తలు