తండ్రి అస్థికలను కలుపుదామని వస్తే: గోదారి మింగేసింది

గోదావరి బోటు ప్రమాదంలో మరణించిన వారి ఒక్కొక్కరి నేపథ్యం కన్నీరు తెప్పిస్తోంది. తండ్రి అస్థికలను కలిపేందుకు వచ్చిన ఓ వ్యక్తి కూతురితో సహా గల్లంతయ్యారు.

చిత్తూరు జిల్లా తిరుపతికి చెందిన దుర్గం సుబ్రమణ్యం కుటుంబంతో నివసిస్తున్నారు. ఈ క్రమంలో ఆయన తండ్రి గంగిశెట్టి మూడు నెలల క్రితం మరణించాడు.

దీంతో ఆయన అస్థికలను గోదావరిలో నిమజ్జనం చేసేందుకు సుబ్రమణ్యం రెండు రోజుల క్రితం భార్య మధులత, కుమార్తె హాసినితో కలిసి రాజమహేంద్రవరం వచ్చారు.

ఆదివారం ఈ క్రతువును నిర్వహించేందుకు వశిష్ట బోటును ఎక్కారు. ఇంతలో లాంచీ ప్రమాదానికి గురైంది. కుమార్తె హాసినీ నీళ్లలో తల్లి మధులత కాళ్లు పట్టుకుని ఏడుస్తోంది.

అయితే సుబ్రమణ్యం ఎంతో కష్టపడి కుమార్తెను కాపాడి గల్లంతయ్యారు. బోటు పక్కకు ఒరిగిపోవడంతో హాసినీ సైతం నీటి ప్రవాహంలో కొట్టుకుపోగా.. మధులత ప్రాణాలతో బయటపడ్డారు. కళ్ల ముందే భర్త, కూతురు చనిపోవడంతో ఆమె కన్నీటిపర్యంతమయ్యారు.