ఫరూఖ్ చాలా ముదురు... కొత్త మంత్రులకు సహకరించండి: చంద్రబాబు

కొత్తగా మంత్రివర్గంలోకి వచ్చిన వారికి అందరూ సహకరించాలన్నారు ఆంధ్రప్రదేశ్ ముఖ్యమంత్రి, టీడీపీ అధినేత చంద్రబాబు నాయుడు. ఉండవల్లిలోని ప్రజావేదిక వద్ద కొత్త మంత్రుల ప్రమాణ స్వీకారం అనంతరం ఆయన ..కార్యకర్తలనుద్దేశించి ప్రసంగించారు.

ఎన్నడూ లేని విధంగా ముస్లిం, మైనారిటీ వర్గాలకు పదవులు ఇచ్చామన్నారు. ఎన్నికలు ఎప్పుడు వచ్చినా పార్టీ గెలుపు కోసం అందరూ కృషి చేయాలని సీఎం పిలుపునిచ్చారు. ఫరూఖ్ చాలా ముదురని.. టీడీపీ ఆవిర్భావం నుంచి వివిధ పదవులు చేపట్టారని.. ఆయన అనుభవం పార్టీకి, ప్రభుత్వానికి ఉపయోగపడుతుందని ఆశాభావం వ్యక్తం చేశారు.

ఐఏఎస్ కావాలనుకున్న శ్రావణ్ మంత్రి కావడం వినూత్న పరిణామమని.. అతనిలో సర్వేశ్వరరావును చూసుకుంటూ అందరూ అండగా నిలవాలని విజ్ఙప్తి చేశారు. కిడారి రెండో కుమారునికి గ్రూప్-1 ఉద్యోగం ఇస్తున్నామని.. కుమార్తె డాక్టర్ అవుతుందని ముఖ్యమంత్రి స్పష్టం చేశారు.

అలాగే సివేరి సోమ కుమారుడు అబ్రహంను ఎస్సీ, ఎస్టీ కమిషన్ సభ్యుడిగా నియమిస్తున్నామని.. ఎవరికీ ఏ కష్టం వచ్చినా వారికి పార్టీ అండగా ఉంటుందని.. ఎవ్వరూ భయపడాల్సిన అవసరం లేదన్నారు. నష్టపోయిన కుటుంబాలను అన్ని విధాలుగా ఆదుకుంటామన్నారు.