సిసోడియా లాగే త్వరలోనే కవిత జైలుకు..: తిరుమలలో బిజెపి కీలక నేత సంచలనం

తిరుపతి : తెలంగాణ ముఖ్యమంత్రి కేసీఆర్ కూతురు, బిఆర్ఎస్ పార్టీ ఎమ్మెల్సీ కల్వకుంట్ల కవిత అరెస్టవడం ఖాయమంటూ తెలంగాణ బిజెపి నాయకులు వివేక్ వెంకటస్వామి సంచలన వ్యాఖ్యలు చేసారు. డిల్లీ లిక్కర్ స్కాం లో డిల్లీ ఉపముఖ్యమంత్రి మనీష్ సిసోడియా మాదిరిగానే కవిత కూడా త్వరలోనే జైలుకు వెళుతుందన్నారు. లిక్కర్ స్కాంలో ఇంకా చాలామందిని అరెస్ట్ చేసే అవకాశాలున్నాయని వివేక్ అన్నారు. సోమవారం కుటుంబసభ్యులతో కలిసి వివేక్ తిరుమల వెంకటేశ్వర స్వామిని దర్శించుకున్నారు. ఈ సందర్భంగా సిసోడియా అరెస్ట్ పై స్పందిస్తూ కవితకు లిక్కర్ స్కాంతో సంబంధాలున్నాయని స్పష్టంగా అర్థమవుతోందని అన్నారు. ఇటీవల పంజాబ్ గుజరాత్ ఎన్నికల ఖర్చు కోసం కేజ్రీవాల్ కు డబ్బులు అవసరం... దీన్ని గుర్తించే కవిత అతడితో ఒప్పందం కుదుర్చుకుందని అన్నారు. ఇలా ఆమ్ ఆద్మీ పార్టీకి కవిత రూ.150 కోట్లు ముట్టచెప్పిందని అన్నారు. డిల్లీతో పాటు ఇటీవలే ఆప్ అధికారంలోకి వచ్చిన పంజాబ్ లోనూ లిక్కర్ స్కాం చేయాలని భావించారని... ఇంతలోనే ఈ బండారం బయటపడిందని వివేక్ అన్నారు.