ఎమ్మెల్యే సాయన్న అంత్యక్రియలు... ఏర్పాట్లను పరిశీలించిన మంత్రి తలసాని

హైదరాబాద్ : గత కొంతకాలంగా తీవ్ర అనారోగ్యంతో బాధపడుతూ యశోదా హాస్పిటల్లో చికిత్సపొందుతూ బిఆర్ఎస్ ఎమ్మెల్యే సాయన్న తుదిశ్వాస విడిచారు. నిన్న (ఆదివారం) మృతిచెందిన  సికింద్రాబాద్ కంటోన్మెంట్ ఎమ్మెల్యే సాయన్న అంత్యక్రియలు నేడు(సోమవారం) బన్సీలాల్ పేటలో జరగనున్నాయి. అంతకుముందు బిఆర్ఎస్ నాయకులు, కార్యకర్తల సందర్శనార్థం సాయన్న పార్థీవదేహాన్ని స్థానిక ఎమ్మెల్యే క్యాంప్ కార్యాలయంలో వుంచనున్నారు. ఈ క్రమంలో అశోక్ నగర్ లోని సాయన్న నివాసం నుండి పార్థివదేహాన్ని కార్ఖానాలోని ఎమ్మెల్యే క్యాంప్ కార్యాలయానికి తరలిస్తున్నారు. దీంతో ముందుగానే ఎమ్మెల్యే సాయన్న కార్యాలయం వద్దకు చేరుకొన్న మంత్రి తలసాని శ్రీనివాస్ యాదవ్ ఏర్పాట్లను పరిశీలించారు. పోలీస్ అధికారులు, స్థానిక నేతలకు మంత్రి తగు సూచనలు చేసారు.