విశాఖలో సినిమా స్టైల్లో చేజింగ్ ... గంజాయి స్మగ్లర్ల ఆటకట్టించిన ఎస్ఈబి

విశాఖపట్నం : సినీ పక్కీలో స్మగ్లర్లను చేజింగ్ చేసి మరీ భారీగా గంజాయిని స్వాధీనం చేసుకున్నారు విశాఖపట్నం స్పెషల్ ఎన్ఫోర్స్ మెంట్ బ్యూరో(SEB) అధికారులు. విశాఖ నగరంలో భారీగా గంజాయి సరఫరా జరుగుతున్న అందిన సమాచారంతో ఎస్ఈబి అధికారులు వేపగుంట జంక్షన్ వద్ద రూట్  వాచ్ నిర్వహించారు. ఈ క్రమంలోనే కారులో గంజాయిని తరలిస్తూ అటువైపుగా వచ్చారు. అధికారులను గమనించి అడవివరం జంక్షన్ మీదుగా హనుమంతవాక వైపు కారును వేగంగా పోనివ్వగా అప్పటికే రెడీగా వున్న మరో ఎస్ఈబి బృందం కారును చేజ్ చేసింది. దీంతో తప్పించుకునే మార్గం లేకపోవడంతో కారును వదిలిపెట్టి స్మగ్లర్లు అక్కడినుండి పరారయ్యారు. 

స్మగ్లర్లు వదిలివెళ్లిన బ్రిజా కారును స్వాదీనం చేసుకున్న ఎస్ఈబి అధికారులు అందులో 150 కిలోల గంజాయిని గుర్తించారు. పరారీలో వున్న స్మగ్లర్ల కోసం గాలిస్తున్నట్లు ఎస్ఈబి అధికారులు తెలిపారు.