సారాంశం

Telangana rains: రాష్ట్రవ్యాప్తంగా వాన‌లు దంచికొడుతున్నాయి. మ‌రో మూడు రోజుల పాటు మోస్తారు నుంచి భారీ వ‌ర్షాలు కురుస్తాయ‌నే అంచ‌నాల మ‌ధ్య‌ రాష్ట్రంలోని విద్యాసంస్థలు, ప్రభుత్వ కార్యాలయాలకు శనివారం వరకు సెలవులు ప్రకటించిన తెలంగాణ ప్రభుత్వం అన్ని జిల్లాల్లో అధికార యంత్రాంగాన్ని అప్రమత్తం చేసి అవసరమైన చర్యలు తీసుకోవాలని ఆదేశించింది.
 

Godavari overflows amid heavy rainfall: తెలంగాణ వ్యాప్తంగా వాన‌లు దంచికొడుతున్నాయి. గత 24 గంటల్లో తెలంగాణలోని పలు ప్రాంతాల్లో, ముఖ్యంగా ఉత్తరాది జిల్లాల్లో భారీ నుంచి అతి భారీ వర్షాలు కురిశాయనీ, దీంతో గోదావరి నదికి భారీగా ఇన్ ఫ్లో వచ్చిందనీ, పలు వాగులు పొంగిపొర్లుతున్నాయని అధికారులు  తెలిపారు. మ‌రో మూడు రోజుల పాటు మోస్తారు నుంచి భారీ వ‌ర్షాలు కురుస్తాయ‌నే అంచ‌నాల మ‌ధ్య‌ రాష్ట్రంలోని విద్యాసంస్థలు, ప్రభుత్వ కార్యాలయాలకు శనివారం వరకు సెలవులు ప్రకటించిన తెలంగాణ ప్రభుత్వం అన్ని జిల్లాల్లో అధికార యంత్రాంగాన్ని అప్రమత్తం చేసి అవసరమైన చర్యలు తీసుకోవాలని ఆదేశించింది.

దక్షిణ ఒడిశా-ఉత్తర ఆంధ్రప్రదేశ్ లో ఏర్పడిన అల్పపీడన ద్రోణి కారణంగా సముద్ర మట్టానికి 7.6 కిలోమీటర్ల ఎత్తు వరకు ఉపరితల ఆవర్తనం ఏర్పడిందని భారత వాతావరణ శాఖ తెలిపింది. రానున్న రెండు రోజుల్లో ఇది నెమ్మదిగా పశ్చిమ వాయవ్య దిశగా కదులుతుందని శుక్రవారం విడుదల చేసిన అధికారిక బులెటిన్ లో పేర్కొంది. భారీ వర్షాల కారణంగా రాష్ట్రంలోని విద్యాసంస్థలు, ప్రభుత్వ కార్యాలయాలకు శనివారం వరకు సెలవులు ప్రకటించిన తెలంగాణ ప్రభుత్వం ఆస్తుల నష్టాన్ని తగ్గించడానికి, ప్రజల ప్రాణాలను కాపాడటానికి అవసరమైన చర్యలు తీసుకోవడానికి అన్ని జిల్లాల్లో అధికార యంత్రాంగాన్ని అప్రమత్తం చేసింది. రాగల 48 గంటల్లో తెలంగాణలోని కొమురం భీం ఆసిఫాబాద్, మంచిర్యాల, నిర్మల్, నిజామాబాద్ జిల్లాల్లో అక్కడక్కడ భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ హెచ్చరించింది.

తెలంగాణలోని ఆదిలాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, కామారెడ్డి జిల్లాల్లో అక్కడక్కడ భారీ నుంచి అతిభారీ వర్షాలు కురిసే అవకాశం ఉంది. అలాగే, జయశంకర్ భూపాలపల్లి, ములుగు, భద్రాద్రి కొత్తగూడెం, మహబూబాబాద్, వరంగల్, హన్మకొండ, సిద్దిపేట, మేడ్చల్ మల్కాజిగిరి, సంగారెడ్డి, మెదక్ జిల్లాల్లో భారీ వర్షాలు కురిసే అవకాశం ఉందని తెలిపింది. శుక్రవారం ఉదయం రాష్ట్ర సగటు వర్షపాతం 47.1 మిల్లీమీటర్లుగా నమోదైందనీ, సాధారణ వర్షపాతం 9.3 మిల్లీమీటర్లు కాగా, 406 శాతం తేడా ఉందని తెలంగాణ స్టేట్ డెవలప్ మెంట్ ప్లానింగ్ సొసైటీ (టీఎస్ డీపీఎస్) విడుదల చేసిన బులెటిన్ లో పేర్కొంది. "ఈ వారం ప్రారంభం వరకు -14% ఉన్న ఈ రుతుపవనాల సంచిత సగటు వర్షపాతం శుక్రవారం సాధారణం కంటే 19% ఎక్కువగా నమోదైంది. ఇది సాధారణం 273.9 మిల్లీ మీట‌ర్ల‌కు బ‌దులుగా 326.4 మిల్లీ మీట‌ర్లుగా ఉంది" అని బులెటిన్ తెలిపింది.

గడిచిన 24 గంటల్లో రాష్ట్రంలోనే అత్యధికంగా కరీంనగర్ జిల్లా రామడుగులో 220.2 మిల్లీమీటర్లు, వికారాబాద్ జిల్లా కుల్కచర్లలో 163.3 మిల్లీమీటర్లు, రంగారెడ్డి జిల్లా షాబాద్ లో 166.3 మిల్లీమీటర్లు, జగిత్యాల జిల్లా కొడిమ్యాలలో 160.8 మిల్లీమీటర్ల వర్షపాతం నమోదైంది. ఆదిలాబాద్, నిర్మల్, జగిత్యాల, కరీంనగర్, మెదక్, రంగారెడ్డి, వికారాబాద్, మహబూబ్ నగర్ జిల్లాల్లో 115.6 మిల్లీమీటర్ల నుంచి 204.4 మిల్లీమీటర్ల వరకు, ఖమ్మం, నల్లగొండ, నాగర్ కర్నూల్, వనపర్తి, జోగుళాంబ గద్వాల జిల్లాలు మినహా రాష్ట్రవ్యాప్తంగా 64.5 మిల్లీమీటర్ల నుంచి 115.5 మిల్లీమీటర్ల వరకు భారీ వర్షం కురిసింది. ఇదిలావుండగా, ఆలయ పట్టణమైన భద్రాచలం వద్ద గోదావరి నది గురువారం రాత్రి మొదటి ప్రమాద స్థాయిని దాటి 44.3 అడుగుల నీటి మట్టానికి చేరుకుంది. వరద ముప్పును దృష్టిలో ఉంచుకుని నది వెంబడి లోతట్టు ప్రాంతాల్లో నివసించే ప్రజలకు అధికారులు హెచ్చరికలు జారీ చేశారు. గత ఏడాది జూలైలో గోదావరి 70 అడుగుల మార్కును దాటిన తర్వాత 32 ఏళ్ల తర్వాత తొలిసారి భద్రాచలం ముంపునకు గురైంది.

గురువారం రాత్రి పరిస్థితిని సమీక్షించిన సీఎం కేసీఆర్ ప్రభావిత ప్రాంతాల్లో అత్యవసర చర్యలు చేపట్టాలని ప్రభుత్వ ప్రధాన కార్యదర్శి శాంతికుమారిని ఆదేశించారు. యుద్ధప్రాతిపదికన సహాయక చర్యలు చేపట్టేందుకు సిద్ధంగా ఉండాలనీ, భద్రాచలంలో ముంపునకు గురయ్యే జనావాసాల నుంచి ప్రజలను సురక్షిత ప్రాంతాలకు తరలించాలని అధికారులను ఆదేశించారు. సహాయక చర్యల కోసం జాతీయ విపత్తు ప్రతిస్పందన దళానికి (ఎన్డీఆర్ఎఫ్) హెలికాప్టర్లను అందుబాటులో ఉంచాలని ఆదేశించారు. రెవెన్యూ, పంచాయతీరాజ్, వైద్యఆరోగ్య, విపత్తు నిర్వహణ సహా సంబంధిత ప్రభుత్వ శాఖలు అప్రమత్తంగా ఉండాలనీ, సహాయక చర్యలు చేపట్టాలని ఆదేశించామని, పరిస్థితిని ఎప్పటికప్పుడు పర్యవేక్షిస్తున్నామ‌ని తెలిపారు.