New Delhi: చైనా సరిహద్దుల్లో ఉద్రిక్త పరిస్థితులు నెలకొని ఉన్నాయి. ఈ క్రమంలోనే అక్కడి పరిస్థితులు, అంతర్జాతీయ అంశాలపై ఓ కన్నేసి ఉంచండని రక్షణ మంత్రి రాజ్నాథ్ సింగ్ భారత ఆర్మీకి ఆదేశాలు ఇచ్చారు. ఈ క్రమంలోనే ఆయన దేశ భద్రతే తమ ప్రభుత్వ ప్రథమ ప్రాధాన్యతని స్పష్టం చేశారు.
ence Minister Rajnath Singh: చైనాతో కొనసాగుతున్న సరిహద్దు వివాదం, వాస్తవాధీన రేఖ (ఎల్ఏసీ) వెంబడి పలు రకాల చైనా కార్యకలాపాల నేపథ్యంలో రక్షణ మంత్రి రాజ్ నాథ్ సింగ్ బుధవారం ఆర్మీ కమాండర్ల సదస్సులో ప్రసంగింస్తూ కీలక వ్యాఖ్యలు చేశారు. చైనాతో వాస్తవాధీన రేఖ (ఎల్ఏసీ) వెంబడి బలమైన నిఘా ఉంచాలని ఆర్మీ కమాండర్ల కాన్ఫరెన్స్ లో పేర్కొన్నారు. చైనా పీఎల్ఏ బలగాలను మోహరించడంతో అంతర్జాతీయ సరిహద్దు వెంబడి ఉత్తర సెక్టార్ లో ఉద్రిక్త పరిస్థితులు నెలకొన్న నేపథ్యంలో ఆయన చేసిన వ్యాఖ్యలు ప్రధాన్యత సంతరించుకున్నాయి. సరిహద్దు పరిస్థితులపై నిఘా ఉంచాలని ఆర్మీని ఆదేశించిన మంత్రి.. దేశ భద్రతే తమ ప్రభుత్వ ప్రథమ ప్రాధాన్యమని స్పష్టం చేశారు.
వివరాల్లోకెళ్తే.. పీఎల్ఏ బలగాల మోహరింపు దృష్ట్యా ఉత్తర సెక్టార్ లో పరిస్థితి ఉద్రిక్తంగా ఉన్నందున చైనాతో వాస్తవాధీన రేఖ (ఎల్ఏసీ) వెంబడి గట్టి నిఘా ఉంచాలని రక్షణ మంత్రి రాజ్ నాథ్ సింగ్ బుధవారం సైన్యాన్ని కోరారు. ఆర్మీ కమాండర్స్ కాన్ఫరెన్స్ లో రాజ్ నాథ్ సింగ్ తన ప్రసంగంలో ప్రపంచవ్యాప్తంగా భౌగోళిక-రాజకీయ మార్పులను గమనించాలని, తదనుగుణంగా వారి ప్రణాళిక-వ్యూహాలను రూపొందించాలని సాయుధ దళాలకు పిలుపునిచ్చారని విశ్వసనీయ వర్గాలను ఉటంకిస్తూ ప్రెస్ ట్రస్ట్ ఆఫ్ ఇండియా నివేదించింది.
'ఉత్తర సెక్టార్లో పీఎల్ఏ బలగాల మోహరింపు కారణంగా పరిస్థితి ఉద్రిక్తంగా ఉంది. ఎల్ఏసీ భద్రతను కాపాడుకునేందుకు మన సాయుధ దళాలు, ముఖ్యంగా భారత సైన్యం నిరంతరం అప్రమత్తంగా ఉండాలి' అని ఆయన పేర్కొన్నారని నివేదిక తెలిపింది. ఉత్తర సెక్టార్ లో పీఎల్ఏ బలగాల మోహరింపు కారణంగా పరిస్థితి ఉద్రిక్తంగా ఉంది. ఎల్ఏసీ భద్రతను కాపాడుకునేందుకు మన సాయుధ దళాలు, ముఖ్యంగా భారత సైన్యం నిరంతరం అప్రమత్తంగా ఉండాలని చెప్పినట్టు సమాచారం. తూర్పు లద్దాఖ్ లో మూడేళ్ల సరిహద్దు వివాదం నేపథ్యంలో రాజ్ నాథ్ సింగ్ ఈ వ్యాఖ్యలు చేశారు. దేశ భద్రతే తమ ప్రభుత్వ ప్రథమ ప్రాధాన్యమని రక్షణ మంత్రి పేర్కొన్నారు.
సరిహద్దుల్లో విధులు నిర్వర్తిస్తున్న ప్రతి సైనికుడికి అత్యుత్తమ ఆయుధాలు, సౌకర్యాలు కల్పించడమే ప్రభుత్వ లక్ష్యమని అందరికీ హామీ ఇస్తున్నట్టు చెప్పారు. ఐదు రోజుల పాటు జరిగే ఆర్మీ కమాండర్ల సదస్సు సోమవారం ప్రారంభమైంది. చైనా, పాకిస్థాన్ సరిహద్దుల్లో భారత్ జాతీయ భద్రతా సవాళ్లు, బలగాల పోరాట సామర్థ్యాన్ని పెంపొందించే మార్గాలపై చర్చిస్తోంది. జమ్మూకాశ్మీర్ గురించి ప్రస్తావిస్తూ, అక్కడ శాంతి, సుస్థిరత కనిపిస్తోందని, కేంద్రపాలిత ప్రాంతంలో ఉగ్రవాద కార్యకలాపాల సంఖ్య గణనీయంగా తగ్గిందని రక్షణ మంత్రి అన్నారు. ఈశాన్య రాష్ట్రాల్లో కూడా భారత సైన్యం చేపట్టిన ఆపరేషన్ల తర్వాత అంతర్గత భద్రతలో చాలా మెరుగుదల కనిపించిందని మంత్రి తెలిపారు. ఏదేమైనా శాంతి కోసం ప్రభుత్వం చేస్తున్న ప్రయత్నాలను సవాలు చేసే జాతి వ్యతిరేక సంస్థల పట్ల అప్రమత్తంగా ఉండాల్సిన అవసరం ఉందన్నారు.
అనేక అనిశ్చితుల కారణంగా భవిష్యత్తులో యుద్ధాలు అత్యంత అనూహ్యంగా ఉంటాయని రాజ్ నాథ్ సింగ్ తన వ్యాఖ్యల్లో పేర్కొన్నారు. మారుతున్న ప్రస్తుత కాలంలో బెదిరింపులు, ఆయుధాల పరిధి చాలా విస్తృతంగా మారింది. తదనుగుణంగా రక్షణ సన్నద్ధతను అంచనా వేయాల్సిన అవసరం ఉందని కమాండర్లకు సూచించారు. రియల్ టైమ్ ఇంటెలిజెన్స్ ను మరింత సమర్థవంతంగా వినియోగించుకోవాల్సిన అవసరం ఉందనీ, తద్వారా భవిష్యత్తులో ఎదురయ్యే సవాళ్లను ఎదుర్కొనేందుకు తాము పూర్తిగా సిద్ధంగా ఉండగలమని రక్షణ మంత్రి పేర్కొన్నారు. ప్రతి సైనికుడు, మాజీ సైనికుడి సంక్షేమం, దేశ సంక్షేమమే ప్రభుత్వ ముఖ్య ధ్యేయమన్నారు.
దేశ భద్రత కోసం సాయుధ బలగాలు ఎంత చిత్తశుద్ధితో పనిచేస్తున్నాయో, సాయుధ దళాల కోసం కూడా అంతే శ్రద్ధగా ప్రభుత్వం పని చేస్తోందన్నారు. సాయుధ దళాలే కాకుండా అనుభవజ్ఞులు, వారి కుటుంబాల సంక్షేమానికి ప్రభుత్వం కట్టుబడి ఉందని రాజ్ నాథ్ సింగ్ తెలిపారు. ఆర్మీ కమాండర్స్ కాన్ఫరెన్స్ అనేది ప్రతి సంవత్సరం ఏప్రిల్-అక్టోబర్ లలో జరిగే అత్యున్నత స్థాయి ద్వైవార్షిక కార్యక్రమం. భారత సైన్యానికి ముఖ్యమైన విధానపరమైన నిర్ణయాలు తీసుకోవడానికి ఈ సదస్సు సంస్థాగత వేదికగా నిలుస్తుంది.
