మఠంలో స్వామీజీల భాగోతాలకు అంతులేకుండా పోతోంది. తాజాగా కర్ణాటకలో సంచలనం రేపిన మురుఘ మఠాధిపతి శివమూర్తి శరణుస్వామి లైంగిక వేధింపుల కేసులో ఛార్జిషీట్ లో సంచలన విషయాలు వెలుగులోకి వచ్చాయి.
కర్ణాటక : చిత్రదుర్గలోని ప్రఖ్యాత మురుఘ మఠాధిపతి శివమూర్తి శరణుస్వామి మఠం ఆవరణలోని హాస్టల్ బాలికపై అత్యాచారం కేసులో పోలీసులు చార్జిషీట్ లో విస్మకరమైన అంశాలను ప్రస్తావించారు. మత్తుమందు కలిపిన యాపిల్ పండ్లను ఇచ్చి వారు మత్తులోకి జారుకున్నాక అఘాయిత్యాలకు పాల్పడేవాడని పేర్కొన్నారు. ఈ యేడాది ఆగస్ట ఆఖర్లో లైంగిక దాడులకు పాల్పడినట్లు ఇద్దరు బాలికలు ఆరోపించడం తెలిసిందే.
తరువాత వారానికి పోక్సో, ఎస్సీ ఎస్టీ కేసుల కింద శివమూర్తిని పోలీసులు అరెస్ట్ చేసి జైలుకు తరలించారు. ఈ ఉదంతం అంతటా సంచలనం కలిగించింది.
సిగరెట్ కాల్చొద్దంటే.. దానితోనే కాల్చాడు.. అదనపు వరకట్నం కోసం వేధింపులు
చార్జిషీట్లో ఏముంది?
- ఈ నేపథ్యంలో రెండో పోక్సో కేసు దర్యాప్తు చేపట్టిన డీఎస్ పీ అనిల్ నేతృత్వంలోని పోలీస్ బృందం సోమవారం చిత్రదుర్గ నగర రెండవ అదనపు జిల్లా సెషన్స్ కోర్టులో 694 పేజీల చార్జిషీట్ ను సమర్పించారు. ఇందులో పలు అంశాలను సవివరంగా పేర్కొన్నారు.
- హాస్టల్ వార్డెన్ రశ్మి బాలికలను బెదిరించి శివమూర్తి స్వామి వద్దకు పంపేది. యాపిల్ పండ్లలో మత్తు కలిపి బాలికలకు తినిపించేవారు. మత్తులో ఉండగా దారుణాలకు పాల్పడేవారు.
- కార్యాలయం, బెడ్ రూం, బాత్ రూమ్ బాలికలను తీసుకెళ్లి లైంగికదాడికి పాల్పడ్డాడు.
- దీనిని వ్యతిరేకించే బాలికలను తీవ్రంగా హెచ్చరించి, మఠం పాఠశాల నుంచి ఇళ్లకు పంపేవారు.
- ఈ రకంగా 10మందికి పైగా బాలికలపై లైంగిక దాడికి పాల్పడినట్లుగా చార్జ్ షీట్ లో పేర్కొన్నారు. నిత్యం బాలికల మీద అఘాయిత్యాలు జరిగేవి.
- మఠం మహిలా వార్డెన్ రశ్మి, కార్యదర్శి పరమశివయ్యలను కూడా నిందితులుగా పేర్కొన్నారు.
- ఈ నెల 5న ఆస్పత్రిలో మురుఘ స్వామికి పురుషత్వ సామర్థ్య పరీక్షలు చేయగా, పాజిటివ్ ఫలితాలు వచ్చాయి.
ఉరి తీయాలి...
ఈ ఘటనపై ఒడనాడి సేవా సంస్థ అధ్యక్సుడు పరశురామ్ మాట్లాడుతూ మురుఘ స్వామికి ఉరిశిక్ష విధించాలన్నారు. ఎంత ఒత్తిడి వచ్చినప్పటికీ పోలీసులు బాగా దర్యాప్తు చేశారని, బాధితుల బాధను కోర్టు ముందుంచారని అన్నారు. అలాగే ఏడాది కిందట మఠంలో హత్యకు గురైన బాలిక కేసును బయటకు తేవాలని ఫిర్యాదు చేశామని అన్నారు. బాలికను హత్య చేసింది ఎవరు అనేదానిమీద పూర్తి స్థాయిలో దర్యాప్తు చేయాలని డిమాండ్ చేశారు.
