PM Modi Egypt Visit: భారత్ కు చెందిన దావూదీ బోహ్రా క‌మ్యూనిటీ సహకారంతో పునరుద్ధరించిన 11వ శతాబ్దానికి చెందిన ఈజిప్టులోని చారిత్రాత్మక అల్ హకీం మసీదును ప్రధాని నరేంద్ర మోడీ ఆదివారం సందర్శించారు. వెయ్యి సంవత్సరాలకు పైగా పురాతనమైన అల్-హకీం మ‌సీదు కైరోలోని నాల్గవ పురాతన మసీదు,  నగరంలో నిర్మించిన రెండవ ఫాతిమిద్ మసీదు కావ‌డం విశేషం. 

PM Modi in Egypt: భార‌త ప్ర‌ధాని న‌రేంద్ర మోడీ ఈజిప్టు ప‌ర్య‌ట‌న కొన‌సాగుతోంది. ఈ క్ర‌మంలోనే దావూదీ బోహ్రా క‌మ్యూనిటీ సహకారంతో పునరుద్ధరించిన ఈజిప్టులోని చారిత్రాత్మక 11వ శతాబ్దపు చారిత్రక అల్ హకీం మసీదును ప్రధాని ఆదివారం సందర్శించారు. వెయ్యి సంవత్సరాలకు పైగా పురాతనమైన అల్-హకీం కైరోలోని నాల్గవ పురాతన మసీదు. నగరంలో నిర్మించిన రెండవ ఫాతిమిద్ మసీదు కావ‌డం విశేషం. ఈ మసీదు 13,560 చదరపు మీటర్ల విస్తీర్ణంలో ఉంది. ఐకానిక్ సెంట్రల్ ఆవరణ 5,000 చదరపు మీటర్లను ఆక్రమించి ఉంటుంది. ఈజిప్టు పర్యటనలో భాగంగా రెండో రోజు మూడు నెలల క్రితం పునరుద్ధరణ పూర్తయిన మసీదు చుట్టూ తిరిగి చూశారు. ఈ మసీదు ప్రధానంగా శుక్రవారం ప్రార్థనలు, మొత్తం ఐదు తప్పనిసరి ప్రార్థనలను నిత్యం నిర్వహిస్తుంది. 1012లో నిర్మించిన మసీదు గోడలు, ద్వారాలపై చెక్కిన క్లిష్టమైన శాసనాలను ప్రధాని ప్రశంసించారు.

Scroll to load tweet…

మసీదుకు ఎందుకంత ప్రాముఖ్యత ఉంది?

భారతదేశంలో స్థిరపడిన బోహ్రా కమ్యూనిటీ ఫాతిమిద్ ల‌ నుండి ఉద్భవించింది. వారు 1970 నుండి మసీదును పునరుద్ధరించారు. అప్పటి నుండి దీనిని నిర్వహిస్తున్నారు. గుజరాత్ లో చాలా ఏళ్లుగా ఉన్న బోహ్రా కమ్యూనిటీతో ప్రధానికి చాలా సన్నిహిత అనుబంధం ఉందనీ, బోహ్రా కమ్యూనిటీ కోసం చాలా ముఖ్యమైన మత స్థలాన్ని సందర్శించడానికి ఇది ఒక సందర్భం అని ఈజిప్టులో భారత రాయబారి అజిత్ గుప్తే అన్నారు. ఈ చారిత్రాత్మక మసీదుకు 16 వ ఫాతిమిద్ ఖలీఫా అల్-హకీం బి-అమ్ర్ అల్లాహ్ పేరు పెట్టారు. ఇది దావూదీ బోహ్రా సమాజానికి ఒక ముఖ్యమైన మత-సాంస్కృతిక ప్రదేశం. దావూదీ బోహ్రా ముస్లిములు ఫాతిమి ఇస్మాయిలీ తయ్యిబి ఆలోచనా విధానానికి కట్టుబడి ఉన్న ఇస్లాంను అనుసరించే ఒక వర్గం. 11 వ శతాబ్దంలో భారతదేశంలో ఉనికిని స్థాపించడానికి ముందు వారు ఈజిప్టు నుండి ఉద్భవించి యెమెన్ కు మారారని తెలుస్తుంది. ప్రధాని కాకముందు నుంచే దావూదీ బోహ్రాలతో మోడీకి సుదీర్ఘ, ఆత్మీయ సంబంధాలు ఉన్నాయి.

ఈ ప‌ర్య‌ట‌న‌లో కైరోలోని హీలియోపోలిస్ యుద్ధ శ్మశానవాటికను సందర్శించిన ప్రధాని నరేంద్ర మోడీ మొదటి ప్రపంచ యుద్ధంలో ప్రాణాలు అర్పించిన భారత సైనికులకు నివాళులు అర్పించడానికి కైరోలోని హీలియోపోలిస్ యుద్ధ శ్మశానవాటికను సందర్శించారు. హీలియోపోలిస్ (పోర్ట్ టెవ్ఫిక్) స్మారక చిహ్నం, హీలియోపోలిస్ (ఆడెన్) స్మారక చిహ్నంతో కూడిన శ్మశాన వాటిక వద్ద మోడీ పుష్పాంజలి ఘటించారు. సందర్శకుల పుస్తకంపై సంతకం చేశారు. మొదటి ప్రపంచ యుద్ధంలో ఈజిప్టు-పాలస్తీనాలో పోరాడుతూ మరణించిన దాదాపు 4,000 మంది భారతీయ సైనికులను ఇది స్మరించుకుంటుంది. మొదటి ప్రపంచ యుద్ధంలో ఆడెన్ కోసం ప్రాణాలు అర్పించిన కామన్వెల్త్ దళాలకు చెందిన 600 మందికి పైగా పురుషులకు హీలియోపోలిస్ (ఆడెన్) స్మారక చిహ్నం నివాళి అర్పిస్తుంది. ఈ శ్మశానాన్ని కామన్వెల్త్ వార్ గ్రేవ్స్ కమిషన్ నిర్వహిస్తుంది. రెండవ ప్రపంచ యుద్ధానికి చెందిన 1,700 కామన్వెల్త్ సమాధులు, ఇతర దేశాలకు చెందిన అనేక యుద్ధ సమాధులు కూడా ఇక్కడ ఉన్నాయి.

సర్ జాన్ బర్నెట్ రూపొందించిన ఈ స్మారక చిహ్నం 1967-1973 ఇజ్రాయిల్-ఈజిప్టు సంఘర్షణ సమయంలో దెబ్బతిన్నదనీ, చివరికి కూల్చివేసిందని కామన్వెల్త్ వార్ గ్రేవ్స్ కమిషన్ వెబ్సైట్ తెలిపింది. అక్టోబరు 1980 లో, హెలియోపోలిస్ కామన్వెల్త్ వార్ గ్రేవ్ శ్మశానవాటికలో అమరులైన భారతీయ సైనికుల పేర్లతో కూడిన ప్యానెల్స్ తో కొత్త స్మారక చిహ్నాన్ని ఈజిప్టులోని భారత రాయబారి ఆవిష్కరించారు. గత అక్టోబరులో విదేశాంగ మంత్రి ఎస్ జైశంకర్ హీలియోపోలిస్ కామన్వెల్త్ వార్ గ్రేవ్ శ్మశానవాటికలో నివాళులు అర్పించారు. కాగా, ఈ నెల 24 నుంచి 25 వరకు ప్రధాని మోడీ ఈజిప్టులో పర్యటించనున్నారు. ఈ ఏడాది ప్రారంభంలో భారత గణతంత్ర దినోత్సవ వేడుకలకు అధ్యక్షుడు ఎల్-సిసి ముఖ్య అతిథిగా హాజరైన తరువాత ప్రధాని మోడీ ఈజిప్ట్ పర్యటన ప్రాధాన్యత సంతరించుకుంది. అధ్యక్షుడు ఎల్-సిసి భారత పర్యటన చాలా విజయవంతమైందని రుజువైంది, ఇరు దేశాలు తమ సంబంధాలను వ్యూహాత్మక భాగస్వామ్య స్థాయికి పెంచడానికి పరస్పరం అంగీకరించాయ‌ని అధికార వ‌ర్గాలు తెలిపాయి.