ఈశాన్య భారత్‌కు తొలి వందేభారత్ రైలు.. టూరిజం, ఉపాధి అవకాశాలను పెంచుతుందన్న ప్రధాని మోదీ..

ఈశాన్య భారతదేశపు మొట్టమొదటి వందే భారత్ ఎక్స్‌ప్రెస్ రైలును ప్రధానమంత్రి నరేంద్రమోదీ సోమవారం ప్రారంభించారు. ప్రధాని మోదీ వర్చువల్‌గా ఈ కార్యక్రమంలో పాల్గొన్నారు. ప్రధాని మోదీ జెండా ఊపి ప్రారంభించిన ఈ వందే భారత్ ఎక్స్‌ప్రెస్ సోమవారం నుంచి గౌహతి-జల్పాయిగురి మధ్య పరుగులు పెట్టనుంది. ఈ సందర్భంగా ప్రధాని మోదీ మాట్లాడుతూ.. ‘‘ఈ రోజు అస్సాంతో సహా మొత్తం ఈశాన్య రాష్ట్రాల రైలు కనెక్టివిటీకి ఒక పెద్ద రోజు. ఈ వందే భారత్ ఎక్స్‌ప్రెస్ ఇక్కడ నివసించే ప్రజల జీవితాన్ని సులభతరం చేస్తుంది. ఇది రాష్ట్ర పర్యాటక రంగానికి కూడా ఊపునిస్తుంది’’ అని పేర్కొన్నారు. వందే భారత్‌ ఎక్స్‌ప్రెస్ ఈశాన్య ప్రాంతంలో పర్యాటకం, విద్య, వాణిజ్యం మరియు ఉపాధి అవకాశాలను పెంచుతుందని అన్నారు. 

‘‘ఈశాన్య రాష్ట్రాల అనుసంధానానికి సంబంధించిన మూడు పనులు జరుగుతున్నాయి. ఈశాన్య భారతదేశం మొదటి వందే భారత్‌ను పొందుతోంది. పశ్చిమ బెంగాల్‌ను కలుపుతూ ఇది మూడో వందే భారత్ ఎక్స్‌ప్రెస్. అస్సాం, మేఘాలయలో సుమారు 425 కి.మీ ట్రాక్‌పై విద్యుద్దీకరణ పనులు పూర్తయ్యాయి’’ అని ప్రధాని మోదీ  అన్నారు. 

‘‘గత 9 సంవత్సరాలుగా భారతదేశం అపూర్వమైన విజయాలు సాధించింది. మా ప్రభుత్వం అధికారంలోకి వచ్చిన తర్వాత పేదల సంక్షేమానికి అత్యధిక ప్రాధాన్యతనిచ్చింది. పేదల ఇళ్ల నుంచి మహిళలకు మరుగుదొడ్ల వరకు, నీటి పైప్‌లైన్‌ నుంచి విద్యుత్‌ కనెక్షన్‌ వరకు, గ్యాస్‌ పైపులైన్‌ నుంచి ఎయిమ్స్‌ మెడికల్‌ కాలేజీ వరకు, రోడ్డు, రైలు, జలమార్గాలు, ఓడరేవు, విమానాశ్రయం, మొబైల్‌ కనెక్టివిటీ ఇలా అన్ని రంగాల్లో పూర్తి స్థాయిలో కృషి చేశాం. మౌలిక సదుపాయాలు అందరికీ సమానంగా, వివక్ష లేకుండా అందుతున్నాయి. అందుకే ఈ మౌలిక సదుపాయాల కల్పన ఒక విధంగా నిజమైన సామాజిక న్యాయం, నిజమైన లౌకికవాదం. 

ఈ రోజు భారతదేశంలో జరుగుతున్న మౌలిక సదుపాయాల పనుల గురించి ప్రపంచవ్యాప్తంగా చాలా చర్చలు జరుగుతున్నాయి. ఎందుకంటే ఈ మౌలిక సదుపాయాలు ప్రజల జీవితాన్ని సులభతరం చేస్తాయి. ఈ మౌలిక సదుపాయాలు ఉపాధి అవకాశాలను సృష్టిస్తున్నాయి. ఈ మౌలిక సదుపాయాలు వేగవంతమైన అభివృద్ధికి ఆధారం. ఈ మౌలిక సదుపాయాలు పేదలు, దళితులు, వెనుకబడినవారు, గిరిజనులు, అటువంటి ప్రతి ఒక్కరికీ అధికారం కల్పిస్తుంది. ఈ మౌలిక సదుపాయాల కల్పనలో ఎవరైనా ఎక్కువ ప్రయోజనం పొందినట్లయితే.. అది తూర్పు, ఈశాన్య భారతదేశం.

Scroll to load tweet…

తమ గత వైఫల్యాలను కప్పిపుచ్చుకోవడానికి, ఇంతకుముందు కూడా ఈశాన్య ప్రాంతంలో చాలా పనులు జరిగాయని కొందరు అంటున్నారు. వారు ఈశాన్య ప్రాంత ప్రజలను ప్రాథమిక సౌకర్యాల కోసం దశాబ్దాలుగా నిరీక్షించేలా చేశారు. క్షమించరాని ఈ నేరంలో ఈశాన్య ప్రాంతం చాలా నష్టపోయింది’’ అని మోదీ పేర్కొన్నారు.