2023- 24 ఆర్థిక సంవత్సంలో భారత జీడీపీ వృద్ధి 6.4 శాతంగా ఉండొచ్చు: ఆర్బీఐ
RBI Monetary Policy: రిజర్వు బ్యాంక్ ఆఫ్ ఇండియా రెపో రేటును పెంచుతూ నిర్ణ‌యం తీసుకుంది. దీంతో ప్రభుత్వ, ప్ర‌యివేటు బ్యాంకులు, హౌసింగ్ ఫైనాన్స్ కంపెనీలు గృహ రుణాల వడ్డీ రేట్లను పెంచేందుకు చ‌ర్య‌లు తీసుకుంటాయ‌నీ, కొత్త వడ్డీ రేట్లు అమల్లోకి వస్తే ఈఎంఐ చెల్లింపు మరింత పెరుగుతాయ‌ని మార్కెట్ నిపుణ‌లు పేర్కొంటున్నారు.
Reserve Bank of India • Monetary policy: ద్రవ్యోల్బణాన్ని కట్టడి చేసేందుకు గత ఏడాది మే నుంచి ఆర్బీఐ స్వల్పకాలిక రుణ రేటు (రెపో రేటు)ను నేటితో సహా 250 బేసిస్ పాయింట్లు పెంచింది. 2023-24 ఆర్థిక సంవత్సరానికి భారత వాస్తవ జీడీపీ వృద్ధి రేటు 6.4 శాతంగా ఉంటుందని రిజర్వ్ బ్యాంక్ ఆఫ్ ఇండియా (ఆర్బీఐ) అంచనా వేసింది. 2023-24 క్యూ1, క్యూ2, క్యూ3, క్యూ4 జీడీపీ అంచనాలు వరుసగా 7.8 శాతం, 6.2 శాతం, 6.0 శాతం, 5.8 శాతంగా అంచనా వేసింది. వచ్చే ఆర్థిక సంవత్సరం 2023-24లో భారత్ లో సగటు రిటైల్ ద్రవ్యోల్బణం 5.3గా ఉండొచ్చని అంచనా వేసింది.
వివ‌రాల్లోకెళ్తే.. ద్రవ్యోల్బణాన్ని కట్టడి చేసేందుకు గత ఏడాది మే నెలలో ప్రారంభమైన రేట్ల పెంపు నేపథ్యంలో శక్తికాంత దాస్ నేతృత్వంలోని మానిటరీ పాలసీ కమిటీ (ఎంపీసీ) మూడు రోజుల సమావేశాన్ని ఫిబ్రవరి 6న ప్రారంభించింది. ఈ క్ర‌మంలోనే రెపో రేటును 25 బేసిస్ పాయింట్లు (బీపీఎస్) పెంచి 6.5 శాతానికి ప్రకటించింది. మారుతున్న ద్రవ్యోల్బణ దృక్పథంపై ఎంపీసీ గట్టి నిఘా కొనసాగిస్తుందని, తద్వారా అది టాలరెన్స్ బ్యాండ్ లోనే ఉండేలా చూస్తామని భారత రిజర్వు బ్యాంకు గవర్నర్ శక్తికాంత దాసు చెప్పారు. వివిధ అంశాలను పరిగణనలోకి తీసుకుంటే 2023-24లో వాస్తవ జీడీపీ వృద్ధి రేటు 6.4 శాతంగా ఉంటుందని ఆయ‌న చెప్పారు. క్యూ1లో 7.8 శాతంగా ఉండొచ్చని ఆర్బీఐ అంచనా వేసింది. క్యూ2లో 6.2 శాతం, క్యూ3 6.0 శాతంగా వృద్ది ఉంటుందని తెలిపింది. ఇక క్యూ4 లో 5.8 శాతంగా ఉంటుందని పేర్కొంది.
ఆర్థిక వ్యవస్థకు ఎదురయ్యే సవాళ్లను సమర్థవంతంగా ఎదుర్కొనేందుకు ద్రవ్యోల్బణ పథంలో కదులుతున్న భాగాల పట్ల ద్రవ్య విధానం చురుగ్గా, అప్రమత్తంగా ఉంటుంది: ఆర్బీఐ గవర్నర్ శక్తికాంత దాస్
పలు అంశాలను పరిగణనలోకి తీసుకుని, బ్యారెల్ ముడిచమురు ధర (భారత బాస్కెట్) 95 డాలర్లుగా ఉంటుందని అంచనా వేసిన శక్తికాంత దాస్.. 2022-23లో ద్రవ్యోల్బణం 6.5 శాతంగా, క్యూ4లో 5.7 శాతంగా ఉండొచ్చని అంచనా వేశారు. సాధారణ రుతుపవనాల అంచనా ప్రకారం, 2023-24లో సీసీఐ ద్రవ్యోల్బణం 5.3 శాతంగా వుండ‌గా, క్యూ1 5.0%, క్యూ 2 5.4%, క్యూ3 5.4%, క్యూ4 5.6% గా అంచనా వేయబడింది.
ఆర్బీఐ గవర్నర్ త‌న ప్ర‌సంగంలో.. 2023-24 ఆర్థిక సంవత్సరానికి భారతదేశ వాస్తవ జీడీపీ వృద్ధి 6.4 శాతంగా ఉంటుందని భారతీయ రిజర్వ్ బ్యాంక్ (ఆర్బీఐ) అంచనా వేసిన‌ట్టు తెలిపారు. "విస్తృత ఆధారిత క్రెడిట్ వృద్ధి, సామర్థ్య వినియోగం మెరుగుపరచడం, మూలధన వ్యయం-మౌలిక సదుపాయాలపై ప్రభుత్వ థ్రస్ట్ పెట్టుబడి కార్యకలాపాలను బలోపేతం చేయాలి" అని బుధవారం ద్రవ్య విధాన సమావేశ ఫలితాలను ప్రకటిస్తూ దాస్ చెప్పారు. "మా సర్వేల ప్రకారం, తయారీ, సేవలు, మౌలిక సదుపాయాల రంగ సంస్థలు వ్యాపార దృక్పథం గురించి ఆశాజనకంగా ఉన్నాయి. మరోవైపు, సుదీర్ఘమైన భౌగోళిక రాజకీయ ఉద్రిక్తతలు, ప్రపంచ ఆర్థిక పరిస్థితులను కఠినతరం చేయడం, బాహ్య డిమాండ్ మందగించడం దేశీయ ఉత్పత్తికి ప్రతికూల ప్రమాదాలుగా కొనసాగవచ్చు" అని ఆయ‌న తెలిపారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
