కరోనా ఉద్ధృతి.. ర‌ద్దీ ప్రదేశాల్లో మాస్కులు పెట్టుకొండి.. బూస్టర్ డోసులు వేయించుకొండి: కేంద్రం
New Delhi: చైనా స‌హా ప‌లు దేశాల్లో మ‌ళ్లీ కరోనా వైరస్ విజృంభిస్తున్న నేపథ్యంలో ప్రజలు అప్రమత్తంగా ఉండాలనీ, మాస్క్‌లు ధరించడం వంటి కోవిడ్ మార్గదర్శకాలను త‌ప్ప‌కుండా పాటించాల‌ని కేంద్రం సూచించింది.
 )
FollowCorona Virus: చైనా స‌హా ప‌లు దేశాల్లో మ‌ళ్లీ కరోనా వైరస్ విజృంభిస్తోంది. కొత్త కేసులు క్ర‌మంగా పెరుగుతున్నాయి. ఈ క్ర‌మంలోనే అప్ర‌మ‌త్త‌మైన కేంద్ర ప్రభుత్వం కోవిడ్-19 వ్యాప్తి, ప్ర‌స్తుతం నెల‌కొన్న ప‌రిస్థితుల‌పై స‌మీక్ష నిర్వ‌హించింది. కోవిడ్-19 సమీక్షా సమావేశం తరువాత.. కరోనా సంక్రమణ వ్యాప్తిని నివారించడానికి రద్దీగా ఉన్న ప్రదేశాలలో మాస్కులు ధరించాలని ప్రభుత్వం ప్రజలకు సూచించింది. ప్రజలు ముందు జాగ్రత్త మోతాదులను (బూస్టర్ డోసులను) పొందాలని విజ్ఞప్తి చేసింది. వృద్ధులు, ఇతర అనారోగ్య సమస్యలు ఉన్నవారు మ‌రింత జాగ్ర‌త్త‌గా ఉండాలని సూచించింది. అయితే, ప్రస్తుతానికి విమానయానానికి సంబంధించి ఎటువంటి మార్పు లేదని ప్రభుత్వం పేర్కొంది.
"మీరు రద్దీగా ఉండే ప్రదేశంలో, ఇంటి లోపల లేదా ఆరుబయట ఉంటే మాస్క్ ధరించండి. కొమొర్బిడిటీలు లేదా అధిక వయస్సు ఉన్నవారికి ఇది చాలా ముఖ్యం" అని నీతి ఆయోగ్ సభ్యులు డాక్ట‌ర్ వీకే పాల్ అన్నారు. కేంద్ర ఆరోగ్య శాఖ మంత్రి మన్సుఖ్ మాండ‌వీయా అధ్యక్షతన జరిగిన కరోనావైరస్ వ్యాప్తి, ప్ర‌స్తుత ప‌రిస్థితుల సమీక్షా సమావేశం తరువాత అన్నారు. కేవలం 27 నుంచి 28 శాతం మంది మాత్రమే ముందుజాగ్రత్త మోతాదు (బూస్టర్ డోసులు) తీసుకున్నారని తెలిపారు. ఇతరులు, ముఖ్యంగా సీనియర్ సిటిజన్లు బూస్టర్ డోసులు తీసుకోవాలని తాము విజ్ఞప్తి చేస్తున్న‌ట్టు తెలిపారు. ముందు జాగ్రత్త మోతాదు తప్పనిసర‌ని పేర్కొన్నారు.
దేశంలో కరోనా వైరస్ పరిస్థితిని నిపుణులు, అధికారులతో సమీక్షించాననీ, కోవిడ్ -19 ఇంకా ముగియలేదని, అప్రమత్తంగా ఉండాలని, నిఘాను బలోపేతం చేయాలని సంబంధిత అధికారులందరినీ ఆదేశించినట్లు కేంద్ర ఆరోగ్య మంత్రి మన్సుఖ్ మాండవియా తెలిపారు. "కొన్ని దేశాల్లో పెరుగుతున్న కోవిడ్-19 కేసుల దృష్ట్యా, ఈ రోజు నిపుణులు, అధికారులతో పరిస్థితిని సమీక్షించారు. కోవిడ్ ఇంకా ముగియలేదు. అప్రమత్తంగా ఉండాలి. నిఘాను బలోపేతం చేయాలని నేను సంబంధిత అధికారులను ఆదేశించాను. ఎలాంటి పరిస్థితినైనా ఎదుర్కొనేందుకు సిద్ధంగా ఉన్నాం" అని మంత్రి చెప్పారు. అమెరికా, దక్షిణ కొరియా, బ్రెజిల్ లలో కూడా కేసులు పెరుగుతున్నట్లు నివేదికలు వస్తున్న నేపథ్యంలో, దేశంలో కరోనావైరస్ పరిస్థితిని సమీక్షించడానికి కేంద్ర ఆరోగ్య మంత్రి మన్సుఖ్ మాండవియా బుధ‌వారం ఒక సమావేశానికి అధ్యక్షత వహించారు.
కాగా, కరోనా వైరస్ కొత్త వేరియంట్లను గుర్తించేందుకు అన్ని రాష్ట్రాలు, కేంద్ర పాలిత ప్రాంతాలకు కేంద్ర ఆరోగ్య మంత్రిత్వ శాఖ కార్యదర్శి రాజేశ్ భూషణ్ మంగళవారం లేఖ రాశారు. ఈ ప్రక్రియ వల్ల దేశంలో కొత్త వేరియంట్లు ఏవైనా ఉంటే సకాలంలో గుర్తించడానికి వీలవుతుందనీ, అవసరమైన ప్రజారోగ్య చర్యలను చేపట్టడానికి వీలు కల్పిస్తుందని కేంద్ర ఆరోగ్య కార్యదర్శి రాజేశ్ భూషణ్ రాష్ట్రాలు, కేంద్రపాలిత ప్రాంతాలకు రాసిన లేఖలో పేర్కొన్నారు. దేశంలో మెరుగైన చ‌ర్య‌లు తీసుకుని కరోనావైరస్ వ్యాప్తిని పరిమితం చేయగలిగిందనీ, వారానికి 1,200 కేసులను నమోదు చేస్తోందని ఆయన చెప్పారు. కోవిడ్ -19 ప్రజారోగ్య సవాలు ఇప్పటికీ ప్రపంచవ్యాప్తంగా కొనసాగుతోందనీ, వారానికి 35 లక్షల కేసులు నమోదవుతున్నాయని రాజేశ్ భూషణ్ చెప్పారు.
"ప్ర‌స్తుతం జపాన్, యునైటెడ్ స్టేట్స్ ఆఫ్ అమెరికా, రిపబ్లిక్ ఆఫ్ కొరియా, బ్రెజిల్, చైనాలలో కరోనావైరస్ కేసులు అకస్మాత్తుగా పెరుగుతున్న దృష్ట్యా, ఇండియన్ సార్స్-కోవ్-2 జెనోమిక్స్ కన్సార్టియం (ఐఎన్ఎస్ఏసిఓజి) నెట్వర్క్ ద్వారా వేరియంట్లను ట్రాక్ చేయడానికి పాజిటివ్ కేసు నమూనాల మొత్తం జన్యు క్రమాన్ని సిద్ధం చేయడం చాలా అవసరం" అని ఆయన అన్నారు. ఈ నేపథ్యంలో, సాధ్యమైనంత వరకు, రోజువారీగా అన్ని పాజిటివ్ కేసుల నమూనాలను రాష్ట్రాలు-కేంద్రపాలిత ప్రాంతాలకు మ్యాప్ చేసిన నిర్ధారిత ఇన్సాకోగ్ జీనోమ్ ప్రయోగశాలలకు పంపేలా చూడాలని అన్ని రాష్ట్రాలను కోరారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
