తెలంగాణలో 45 కొత్త కోర్టు హాళ్లు: కేంద్ర న్యాయశాఖ మంత్రి కిరణ్ రిజిజు
New Delhi: తెలంగాణలో ప్రస్తుతం 531 కోర్టు హాళ్లు ఉన్నాయనీ, 410 వర్కింగ్ స్ట్రెంగ్త్ ఉండగా, 475 రెసిడెన్షియల్ యూనిట్లు అందుబాటులో ఉన్నాయని కేంద్ర న్యాయశాఖ మంత్రి క‌ర‌ణ్ రిజిజు తెలిపారు. ఇదిలావుండగా, న్యాయవాదుల రక్షణ బిల్లు-2021ను పార్లమెంటులో ప్రవేశపెట్టాలని ఖమ్మం జిల్లా బార్ అసోసియేషన్ సభ్యులు కేంద్ర న్యాయశాఖ మంత్రి కిరణ్ రిజిజును కోరారు.
Union law minister Kiren Rijiju: తెలంగాణలో సబార్డినేట్, జిల్లా కోర్టుల జ్యుడీషియల్ ఆఫీసర్ల కోసం 45 కొత్త కోర్టు హాళ్లు, ఆరు కొత్త రెసిడెన్షియల్ సౌకర్యాలు నిర్మిస్తున్నట్లు కేంద్ర న్యాయశాఖ మంత్రి కిరణ్ రిజిజు పార్ల‌మెంట్ లో శుక్ర‌వారం నాడు వెల్ల‌డించారు. దీంతో రాష్ట్రంలో కోర్టు హాళ్ల సంఖ్య క్ర‌మంగా పెరుగుతుంద‌ని ఆయన పేర్కొన్నారు. వివ‌రాల్లోకెళ్తే.. రాజ్యసభలో భారత రాష్ట్ర సమితి (బీఆర్ఎస్) ఎంపీ అడిగిన ప్రశ్నకు న్యాయశాఖ మంత్రి కిరణ్ రిజిజు లిఖిత‌పూర్వ‌కంగా సమాధానమిచ్చారు. తెలంగాణ రాష్ట్రంలో జిల్లా, సబార్డినేట్ న్యాయవ్యవస్థకు సంబంధించి కోర్టు గదులు, నివాస గృహాల కొరతపై బీఆర్ఎస్ సభ్యుడు దామోదర్ రావు దివకొండ అడిగిన ప్రశ్నకు కేంద్ర మంత్రి సమాధానమిస్తూ, తెలంగాణలో ప్రస్తుతం 531 కోర్టు హాళ్లు ఉన్నాయనీ, 410 మంది పనిచేస్తున్నారని తెలిపారు. 475 రెసిడెన్షియల్ యూనిట్లు అందుబాటులో ఉన్నాయని పేర్కొన్నారు.
న్యాయవ్యవస్థకు సంబంధించిన మౌలిక సదుపాయాల అభివృద్ధి ప్రాథమిక బాధ్యత రాష్ట్ర ప్రభుత్వాలపై ఉందని కేంద్ర మంత్రి కిరణ్ రిజిజు పేర్కొన్నారు. అయితే, రాష్ట్ర ప్రభుత్వాల వనరులను పెంపొందించడానికి, కేంద్ర ప్రభుత్వం నిర్ణీత నిధుల భాగస్వామ్య పద్ధతిలో రాష్ట్ర ప్రభుత్వాలు, కేంద్ర పాలిత ప్రాంతాలకు ఆర్థిక సహాయం అందించడం ద్వారా న్యాయవ్యవస్థ కోసం మౌలిక సదుపాయాల అభివృద్ధి కోసం కేంద్ర ప్రాయోజిత పథకం (CSS) అమలు చేస్తోంది. కేంద్రం- రాష్ట్రాల మధ్య స‌మ‌న్వ‌యంతో ముందుకు సాగుతున్న‌ద‌ని తెలిపారు. కిరణ్ రిజిజు మరిన్ని వివ‌రాలు వెల్ల‌డిస్తూ.. ఈ పథకం 1993-94 నుండి అమలు చేయబడిందని తెలిపారు. జిల్లా, సబార్డినేట్ జ్యుడిషియరీ న్యాయాధికారులకు కోర్టు భవనాలు-నివాస గృహాల నిర్మాణాన్ని కవర్ చేస్తుందని వెల్ల‌డించారు. పథకం ప్రారంభం నుంచి ఇప్పటి వరకు రూ.9,445.46 కోట్లు విడుదల చేశామనీ, ఇందులో 2014-15 నుంచి రూ.6,001.15 కోట్లు విడుదల చేశామని తెలిపారు.
ఈ పథకాన్ని 2021-22 నుంచి 2025-26 వరకు కేంద్ర వాటా రూ .5,307 కోట్లతో సహా రూ .9,000 కోట్ల బడ్జెట్ వ్యయంతో పొడిగించినట్లు ఆయన తెలిపారు. కోర్టు హాళ్లు, రెసిడెన్షియల్ క్వార్టర్ల నిర్మాణంతో పాటు జిల్లా, సబార్డినేట్ కోర్టుల్లో న్యాయవాదుల హాళ్లు, డిజిటల్ కంప్యూటర్ గదులు, టాయిలెట్ కాంప్లెక్స్ల నిర్మాణానికి కూడా ఈ పథకం వర్తిస్తుందని పేర్కొన్నారు.
న్యాయవాదుల రక్షణ బిల్లును కోరుతూ..
న్యాయవాదుల రక్షణ బిల్లు-2021ను పార్లమెంటులో ప్రవేశపెట్టాలని ఖమ్మం జిల్లా బార్ అసోసియేషన్ సభ్యులు కేంద్ర న్యాయశాఖ మంత్రి కిరణ్ రిజిజును కోరారు. రాజ్యసభ సభ్యుడు వడ్డిరాజు రవిచంద్ర నేతృత్వంలో అసోసియేషన్ సభ్యులు తాళ్లూరి దిలీప్, కొండపల్లి శ్రీనివాస్ న్యూఢిల్లీలో మంత్రిని కలిసి వినతిపత్రం సమర్పించారు. న్యాయవాదులు తమ వృత్తిపరమైన విధులను నిర్వర్తిస్తున్నప్పుడు దాడి, బెదిరింపుల వంటి సంఘటనలు ప్రమాదకరమైన ఎత్తులకు చేరుకున్నందున పార్లమెంటులో బిల్లును ప్రవేశపెట్టాల్సిన అవసరం గురించి ఏంపీ, న్యాయవాదులు కిరణ్ రిజిజుకు వివరించారు.
రోజువారీ జీవితంలో, న్యాయవాదులు దేశంలో న్యాయం కోసం కృషి చేయడంలో కీలక పాత్ర పోషిస్తార‌ని పేర్కొన్నారు. కానీ తరచుగా వారు తమ ప్రయత్నాలలో నిరవధిక అడ్డంకులను ఎదుర్కొంటారనీ, నిరంతరం తీవ్రమైన ఒత్తిడికి గురవుతున్నారని దిలీప్, శ్రీనివాస్ పేర్కొన్నారు. ఈ సందర్భంగా బీఆర్ఎస్ లోక్ సభా పక్షనేత నామా నాగేశ్వరరావు, టీపీసీసీ అధ్యక్షుడు, ఎంపీ అనుముల రేవంత్ తదితరులతో అసోసియేషన్ సభ్యులు సమావేశమయ్యారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
