సోషల్ మీడియా లైవ్‌లో ఇన్‌ఫ్లుయెన్సర్ ఏడు బాటిళ్ల వోడ్కా తాగాడు.. 12 గంటల తర్వాత మత్తులోనే ప్రాణాలు వదిలాడు..
ఓ సోషల్ మీడియా ఇన్‌ఫ్లుయెన్సర్ లైవ్ స్ట్రీమ్‌లో ఏడు బాటిళ్ల స్పిరిట్ తాగాడు. ఆ బ్రాడ్‌కాస్ట్ ముగిసిన 12 గంటల తర్వాత మత్తులోనే మరణించాడు. ఈ ఘటన చైనాలో చోటుచేసుకుంది.
న్యూఢిల్లీ: ఓ సోషల్ మీడియా ఇన్‌ఫ్లుయెన్సర్ పందేనికి వెళ్లి ప్రాణాల మీదికి తెచ్చుకున్నాడు. సోషల్ మీడియా ప్లాట్‌ఫామ్ పై లైవ్‌లో ఏడు వోడ్కా బాటిళ్లు తాగాడు. ఆ తర్వాత సుమారు 12 గంటల తర్వాత ప్రాణాలు కోల్పోయాడు. ఈ ఘటన చైనాలో చోటుచేసుకుంది.
34 ఏళ్ల ఇన్‌ఫ్లుయెన్సర్.. సాంక్వియాంగ్ అని చాలా మందికి తెలుసు. ఆయనకు డొయిన్‌లో ఒక అకౌంట్ ఉన్నది. డొయిన్.. చైనాలో టిక్ టక్ వెర్షన్. ఆ డొయిన్‌లో సాంక్వియాంగ్ ఓ చాలెంజ్ స్టార్ట్ చేశాడు. మే 16వ తేదీన అర్ధరాత్రి దాటినాక 1 గంటలకు చైనీస్ సోషల్ మీడియా ప్లాట్‌ఫామ్‌లో లైవ్ ప్రారంభించాడు. ఆ చాలెంజ్‌లో బైజియు అనే చైనీస్ స్పిరిట్ సేవించడం భాగమై ఉన్నది. ఇది ఒక రకమైన వోడ్కా. ఇందులో 30 శాతం నుంచి 60 శాతం ఆల్కహాల్ కంటెంట్ ఉంటుంది.
సాంక్వియాంగ్ ఫ్రెండ్ జాహో ఈ ఘటన గురించి మాట్లాడాడు. ఇలాంటి చాలెంజ్‌లలో ఇన్‌ఫ్లుయెన్సర్లు ఒకరితో పోటీ పడి మరొకరు బాటిల్స్ తాగుతుంటారని ఆయన చెప్పాడు. అందులో గెలిచిన వారికి వ్యూయర్స్ గిఫ్ట్‌లు, రివార్డులు ఇస్తుంటారు. ఒక్కోసారి ఓడిపోయిన వారికి పనిష్మెంట్లు కూడా ఉంటాయని వివరించాడు. ఈ కేసులో బైజియు తాగడం ఉన్నదని పేర్కొన్నాడు. తాను ఈ వీడియో చూసినప్పుడు సాంక్వియాంగ్ మూడో బాటిల్ పూర్తి చేసి నాలుగో బాటిల్ చేతపట్టాడని తెలిపాడు.
వ్యూయర్స్ చెప్పిన ప్రకారం సాంక్వియాంగ్ ఏడు బాటిళ్ల బైజియు స్పిరిట్స్ సేవించాడు. ఆ లైవ్ బ్రాడ్‌కాస్ట్ ముగిసిన 12 గంటల తర్వాత మరణించాడు.
కుటుంబం ఆయనను చూడటానికి ముందే సాంక్వియాంగ్ మరణించాడు. కనీసం ఎమర్జెన్సీ ట్రీట్‌మెంట్‌కు కూడా నోచుకోలేదని జావో తెలిపాడు.
మితిమీరి ఆల్కహాల్ తాగడం వల్లే అతను మరణించినట్టు షాంగ్యూ న్యూస్ ధ్రువీకరించింది. ఆ తర్వాత ఉదయమే అతని అంత్యక్రియలు నిర్వహించారు. డొయిన్ లైవ్ స్ట్రీమ్స్‌లో లిక్కర్ తాగడాన్ని అంగీకరించదు. పెనాల్టీలు విధించడం నుంచి అకౌంట్ నిలిపేసే వరకు చర్యలు తీసుకుంటుంది. కానీ, కొత్త అకౌంట్లు ప్రారంభించి ఇలాంటి వారు నిబంధనలు అతిక్రమిస్తుంటారని బీబీసీ రిపోర్టులో పేర్కొన్నారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
