- Home
- Telangana
- Cable Bridge: రూ. 180 కోట్ల‌తో 1.25 కిమీల బ్రిడ్జి.. మరో అద్భుతమైన కేబుల్ బ్రిడ్జి నిర్మాణం, ఎక్క‌డంటే.?
Cable Bridge: రూ. 180 కోట్ల‌తో 1.25 కిమీల బ్రిడ్జి.. మరో అద్భుతమైన కేబుల్ బ్రిడ్జి నిర్మాణం, ఎక్క‌డంటే.?
Cable Bridge: తెలంగాణలో మౌలిక సదుపాయాల అభివృద్ధిలో మరో కీలక ప్రాజెక్టు రూపుదిద్దుకుంటోంది. ఖమ్మం నగరంలోని మున్నేరు నదిపై నిర్మిస్తున్న భారీ కేబుల్ బ్రిడ్జి పనులు తుది దశకు చేరుకున్నాయి. సుమారు రూ.180 కోట్ల వ్యయంతో ఈ ప్రాజెక్టును రూపొందిస్తున్నారు.
మున్నేరు నదిపై 1.25 కిలోమీటర్ల ఆధునిక వంతెన
ఖమ్మం నగరంలోని జలగం నగర్–కాల్వొడ్డు ప్రాంతాలను కలుపుతూ ఈ కేబుల్ బ్రిడ్జిని నిర్మిస్తున్నారు. మొత్తం 1.25 కిలోమీటర్ల పొడవుతో రూపొందుతున్న ఈ వంతెనలో ప్రధాన భాగం మున్నేరు నదిపై నిర్మితమవుతోంది. నది మధ్యలో రెండు భారీ టవర్లను ఏర్పాటు చేసి, వాటికి అనుసంధానంగా స్టీల్ కేబుళ్ల సహాయంతో వంతెన నిర్మాణం చేపట్టారు. ప్రధాన బ్రిడ్జి భాగం సుమారు 300 మీటర్ల మేర కేబుళ్ల ఆధారంగా నిలవనుండగా, మిగిలిన భాగంలో వయాడెక్ట్‌లు, అనుసంధాన రహదారులు ఏర్పాటు చేస్తున్నారు. ఆధునిక ఇంజినీరింగ్ ప్రమాణాలతో నిర్మిస్తున్న ఈ ప్రాజెక్టు ఖమ్మం నగరానికి ప్రత్యేక గుర్తింపును తీసుకురానుంది.
85 శాతం పనులు పూర్తి.. చివరి దశలో నిర్మాణం
రెండేళ్లుగా కొనసాగుతున్న ఈ నిర్మాణ పనులు ప్రస్తుతం చివరి దశకు చేరుకున్నాయి. ఇప్పటికే నది పరివాహక ప్రాంతంలో చేపట్టాల్సిన ప్రధాన నిర్మాణ కార్యకలాపాలు పూర్తయ్యాయి. ప్రస్తుతం వంతెనపై డెక్ నిర్మాణం, రహదారి ఉపరితల పనులు, లైటింగ్, భద్రతా ఏర్పాట్లపై అధికారులు దృష్టి సారించారు. నాలుగు లేన్ల రహదారిగా రూపొందుతున్న ఈ బ్రిడ్జిపై సెంట్రల్ డివైడర్, ఆధునిక వీధి దీపాలు, పాదచారుల కోసం ప్రత్యేక ఫుట్‌పాత్‌లు ఏర్పాటు చేస్తున్నారు. నిర్మాణ సంస్థలు పనులను వేగవంతం చేయడంతో మిగిలిన పనులు కూడా త్వరగా పూర్తయ్యే అవకాశాలు కనిపిస్తున్నాయి.
పాత వంతెనకు ప్రత్యామ్నాయం.. ట్రాఫిక్ సమస్యలకు పరిష్కారం
ప్రస్తుతం మున్నేరు నదిపై ఉన్న పాత వంతెన ద్వారానే వేలాది వాహనాలు ప్రతిరోజూ రాకపోకలు సాగిస్తున్నాయి. కాలక్రమేణా ఆ వంతెనపై భారం పెరగడంతో ట్రాఫిక్ సమస్యలు తరచూ తలెత్తుతున్నాయి. ముఖ్యంగా ఖమ్మం–కోదాడ మార్గంతో పాటు సూర్యాపేట, ఖమ్మం జిల్లాల మధ్య ప్రయాణించే వాహనాల రద్దీ అధికంగా ఉంటుంది. కొత్త కేబుల్ బ్రిడ్జి అందుబాటులోకి వస్తే ట్రాఫిక్ ఒత్తిడి గణనీయంగా తగ్గే అవకాశం ఉంది. నగరంలోని కీలక ప్రాంతాల మధ్య ప్రయాణ సమయం కూడా తగ్గనుంది. దీంతో వాహనదారులకు సౌకర్యవంతమైన ప్రయాణం అందుబాటులోకి రానుంది.
పర్యాటక ఆకర్షణగా మారనున్న ఖమ్మం కేబుల్ బ్రిడ్జి
హైదరాబాద్‌లోని దుర్గం చెరువు కేబుల్ బ్రిడ్జి పర్యాటకంగా ఎంతటి గుర్తింపు తెచ్చుకుందో తెలిసిందే. అదే తరహాలో ఖమ్మం కేబుల్ బ్రిడ్జి కూడా నగరానికి కొత్త ఆకర్షణగా మారుతుందని అధికారులు ఆశిస్తున్నారు. రాత్రి వేళల్లో ప్రత్యేక లైటింగ్ ఏర్పాట్లు, నది పరిసరాల అభివృద్ధి, పాదచారుల కోసం విజిటింగ్‌ స్థలాలు వంటి సదుపాయాలు అందుబాటులోకి వస్తే ఈ ప్రాంతం పర్యాటక కేంద్రంగా మారే అవకాశముంది. మున్నేరు నది అందాలను ఆస్వాదించేందుకు కూడా ఈ వంతెన ప్రత్యేక ఆకర్షణగా నిలవనుంది.
సెప్టెంబర్ నాటికి ప్రారంభించ‌డ‌మే ల‌క్ష్యం
ప్రాజెక్టు పనులను అధికారులు నిరంతరం పర్యవేక్షిస్తున్నారు. వంతెనతో పాటు అప్రోచ్ రోడ్లు, రిటైనింగ్ వాల్స్, అనుబంధ మౌలిక సదుపాయాల పనులు కూడా వేగంగా కొనసాగుతున్నాయి. జిల్లా యంత్రాంగం, రోడ్లు-భవనాల శాఖ అధికారులు నిర్ణీత గడువులోపు పనులు పూర్తి చేయాలని నిర్మాణ సంస్థలకు సూచించారు. ప్రస్తుతం పనుల పురోగతి సంతృప్తికరంగా ఉండటంతో ఈ ఏడాది సెప్టెంబర్ నెలలో వంతెనను ప్రజలకు అందుబాటులోకి తీసుకురావాలని లక్ష్యంగా పెట్టుకున్నారు. ప్రాజెక్టు పూర్తయితే ఖమ్మం నగర రవాణా రంగంలో ఇది ఒక మైలురాయిగా నిలవడంతో పాటు తెలంగాణలోని ప్రముఖ కేబుల్ బ్రిడ్జిల జాబితాలో చోటు దక్కించుకోనుంది.
