Monday Facts: సోమవారానికి ఆ పేరు ఎలా వచ్చింది? ఆరోజు శివుడినే ఎందుకు పూజించాలి?
Monday Facts: వారానికి ఉన్న 7 రోజుల్లో సోమవారానికి చాలా ప్రాముఖ్యత ఉంది. ఈ రోజున పరమశివుడిని దర్శించుకుని ప్రత్యేక పూజలు, అభిషేకాలు చేస్తారు. ఉపవాసాలు ఉంటారు. అసలు సోమవారానికి ఆ పేరు ఎలా వచ్చింది? ఇదే రోజున మహాదేవుడిని ఎందుకు పూజిస్తారో తెలుసా?
సోమవారం గురించి ఆసక్తికర విషయాలు
సోమవారం వచ్చిందంటే చాలు….శివాలయాలకు జనం పోటెత్తుతారు. ఎంత పనిలో ఉన్నా సరే…ఉదయాన్నే లేచి తలంటుకుని కోవెళ్లకు వెళ్తారు. ప్రత్యేక పూజలు, అభిషేకాలు చేస్తారు. ఉపవాసాలు ఉంటారు.వారానికి ఉన్న 7 రోజుల్లో ఈ సోమవారానికి చాలా ప్రాముఖ్యత ఉంది. అసలు సోమవారానికి ఆ పేరు ఎలా వచ్చింది? ఇదే రోజున మహాదేవుడిని ఎందుకు పూజిస్తారో తెలుసా?
వారంలో మొదటి రోజు సోమవారం. ఈ రోజు శివుడికి, చంద్రుడికి పూజలు చేయడం చాలా ప్రత్యేకం. సోమవారానికి సంబంధించి మన పురాణాల్లో చాలా నియమాలు, సంప్రదాయాలు ఉన్నాయి. వీటిని పాటిస్తే జీవితంలో సుఖసంతోషాలు ఉంటాయని నమ్ముతారు. అసలు వారంలో మొదటి రోజుకు సోమవారం అనే పేరే ఎందుకు వచ్చింది? దీనికి జ్యోతిష్య శాస్త్రంలో సమాధానం ఉంది. ఆ ఆసక్తికరమైన విషయాలు ఇక్కడ తెలుసుకుందాం.
గంటలను జ్యోతిషంలో 'హోర' అంటారు
జ్యోతిష్య శాస్త్రం ప్రకారం, ఒక రోజుకు 24 గంటలు ఉంటాయి. ఈ గంటలను జ్యోతిషంలో 'హోర' అంటారు. ప్రతి హోరకు ఒక గ్రహంతో సంబంధం ఉంటుంది. హోర నియమం ప్రకారం, రోజులోని మొదటి గంటకు (సూర్యోదయం సమయంలో) ఏ గ్రహం అధిపతిగా ఉంటుందో, ఆ రోజంతటికీ అదే అధిపతి అవుతుంది. ఆదివారం తర్వాత వచ్చే రోజున (సూర్యోదయం) 25వ గంట చంద్రుడి హోరలోకి వస్తుంది. చంద్రుడికి 'సోముడు' అనే మరో పేరు కూడా ఉంది. అందుకే వారంలో మొదటి రోజుకు సోమవారం అని పేరు వచ్చింది.
శివుడిని ఎందుకు పూజిస్తారు?
సోమవారం శివ పూజకు చాలా ప్రాముఖ్యత ఉంది. దీనికి కారణం ఏంటంటే, ఈ రోజు చంద్రుడి ప్రభావం ఎక్కువగా ఉంటుంది. ఆ చంద్రుడు మహాదేవుడి తలపై అలంకారంగా ఉన్నాడు. అందుకే సోమవారం శివుడిని పూజిస్తే, చంద్రుడిని కూడా పూజించినట్లే అవుతుంది. మన పురాణాలు సోమవారం శివ పూజకు ఇంత ప్రాధాన్యత ఇవ్వడానికి ఇదే కారణం.
శివుడిని ఎలా పూజించాలి?
- సోమవారం ఉదయాన్నే లేచి స్నానం చేసి, వ్రతం, పూజ చేస్తానని సంకల్పం చెప్పుకోవాలి.
- రోజంతా సాత్విక జీవితం గడపాలి. అంటే, ఎవరిపైనా కోపం తెచ్చుకోకూడదు, చెడుగా ఆలోచించకూడదు.
- దగ్గర్లోని శివాలయానికి వెళ్లొచ్చు లేదా ఇంట్లోని పూజ గదిలోనైనా శివుడికి పూజ చేయవచ్చు.
- శివలింగానికి మొదట శుద్ధమైన నీటితో, తర్వాత పాలతో, మళ్లీ నీటితో అభిషేకం చేయాలి.
- శివుడికి బిల్వపత్రాలు, తెల్ల చందనం, మారేడు, జిల్లేడు పూలు, పండ్లు సమర్పించాలి.
- ఆ తర్వాత నైవేద్యం పెట్టి, హారతి ఇవ్వాలి. ఇలా చేస్తే మీ కోరికలు తప్పక నెరవేరుతాయి.
ఈ మంత్రం పటించాలి
సోమవారం శివుడికి ఇష్టమైన రోజు కాబట్టి, ఈ రోజు మహాదేవుడి మంత్రాలను జపించడం వల్ల మంచి ఫలితాలు వస్తాయి. కింద ఇచ్చిన మంత్రాలలో దేన్నైనా జపించవచ్చు-
- ఓం నమః శివాయ
- ఓం త్ర్యంబకం యజామహే సుగంధిం పుష్టివర్ధనమ్।
ఉర్వారుకమివ బంధనాన్మృత్యోర్ముక్షీయ మామృతాత్॥
- ఓం తత్పురుషాయ విద్మహే మహాదేవాయ ధీమహి తన్నో రుద్రః ప్రచోదయాత్॥
సోమవారం రోజు ఇవి దానం చేయాలి
జ్యోతిష్య శాస్త్రంలో ప్రతి రోజు కొన్ని ప్రత్యేక వస్తువులను దానం చేయడం వల్ల మంచి జరుగుతుందని చెబుతారు. ఈ వస్తువులను దానం చేస్తే జీవితంలో సుఖసంతోషాలు వెల్లివిరుస్తాయి. సోమవారం రోజున తెల్లని వస్త్రాలు, బియ్యం, పాలు, పటికబెల్లం, పెరుగు, తెల్లని పువ్వులు, వెండి వంటి వాటిని దానం చేయడం చాలా శుభప్రదంగా భావిస్తారు. ఈ వస్తువులన్నీ చంద్రుడికి సంబంధించినవి.
గమనిక: ఈ ఆర్టికల్‌లోని సమాచారం మత గ్రంథాలు, పండితులు, జ్యోతిష్యుల నుంచి సేకరించబడింది. మేము ఈ సమాచారాన్ని మీ ముందుకు తీసుకురావడానికి ఒక మాధ్యమం మాత్రమే. పాఠకులు ఈ సమాచారాన్ని కేవలం సూచనగా మాత్రమే పరిగణించాలి.
