Kids Hair Growth: పిల్లల జుట్టు ఒత్తుగా పెరగాలా? ఇవి చేస్తే చాలు

పిల్లల జుట్టు ఒత్తుగా పెరగాలని పేరెంట్స్ అందరూ కోరుకుంటారు. మీ పిల్లల జుట్టు కూడా ఒత్తుగా పెరగాలంటే వారికి గుడ్డు నుంచి బాదం పప్పు వరకు  అందించాలి.   

జుట్టు పెరుగుదలకు డాక్టర్ సలహా

కొంతమంది పిల్లలు పుట్టుకతోనే దట్టమైన జుట్టు కలిగి ఉంటారు, మరికొంతమందికి జుట్టు చాలా తక్కువగా ఉంటుంది. కొంతమంది పిల్లలు తక్కువ జుట్టుతో పుట్టినా, వారు పెరిగే కొద్దీ జుట్టు పెరుగుదల పెరుగుతుంది. కానీ కొంతమంది పిల్లలకు చాలా తక్కువ జుట్టు ఉండటం వల్ల తల్లిదండ్రులు చాలా ఆందోళన చెందుతారు. చాలా తక్కువగా ఉన్న జుట్టును ఎలా దట్టంగా చేయాలనే దాని గురించి డాక్టర్ చెప్పిన సమాచారాన్ని చూద్దాం.

ఎంబీబీఎస్ డాక్టర్ హేమప్రియ తన ఇన్‌స్టాగ్రామ్‌లో ఒక పోస్ట్‌ను షేర్ చేశారు. పిల్లల జుట్టును దట్టంగా చేసే కొన్ని ఆహార పదార్థాల గురించి ఆమె వివరించారు. పిల్లల జుట్టు పెరుగుదలలో ఆహారం కీలక పాత్ర పోషిస్తుందని డాక్టర్ తన పోస్ట్‌లో పేర్కొన్నారు. సరైన పోషకాలను అందించడం ద్వారా పిల్లల జుట్టు బలంగా, ఆరోగ్యంగా పెరుగుతుందని తెలిపారు.

గుడ్డు:

జుట్టు పెరుగుదలకు పిల్లల ఆహారంలో గుడ్డు చేర్చాలని సూచించారు. ఉడికించిన గుడ్డులోని పచ్చసొనను మెత్తగా చేసి అన్నం లేదా కూరలతో కలిపి ఇవ్వవచ్చు. ఒక సంవత్సరం లోపు పిల్లలకు గుడ్డులోని సగం పచ్చసొన ఇవ్వాలి, ఒక సంవత్సరం పైబడిన పిల్లలకు మొత్తం పచ్చసొన ఇవ్వవచ్చు. ఇది వారికి పోషకాలను అందించడమే కాకుండా, జుట్టు పెరుగుదలకు కూడా మంచిదని తెలిపారు.

అవకాడో:

అవకాడోను మెత్తగా చేసి పిల్లలకు  ఇవ్వవచ్చు. అవకాడో టోస్ట్ గా కూడా ఇవ్వవచ్చు. పిల్లలకు రోజూ ఒకటి నుండి రెండు టీస్పూన్ల అవకాడో ఇవ్వవచ్చు. అవకాడో పిల్లల పెరుగుదలకు చాలా మంచిదని తెలిపారు.జుట్టు కూడా చాలా ఒత్తుగా పెరుగుతుంది.

చిలగడదుంప:

చిలగడదుంపను ఉడికించిన తర్వాత దానిని మెత్తగా చేసి పిల్లలకు ఇవ్వవచ్చు. సూప్ , గంజిలో కలిపి ఇవ్వవచ్చు. మీ పిల్లలకు ఒకసారికి రెండు నుండి నాలుగు టీస్పూన్ల చిలగడదుంప ఇవ్వవచ్చు. చిలగడదుంపలో బీటా కెరోటిన్ ఉంటుంది. ఇది వారి జుట్టు పెరుగుదలను ప్రోత్సహిస్తుంది.

పప్పు ధాన్యాలు:

వివిధ రకాల పప్పు ధాన్యాల్లో వివిధ రకాల పోషకాలు , ప్రోటీన్లు ఉంటాయి. పప్పు ధాన్యాలను ముందుగా ఉడికించి ఆ తర్వాత వాటిని సూప్ లేదా మెత్తగా చేసి ఇవ్వవచ్చు. మీ పిల్లలకు ఒక రోజుకు పావు కప్పు పప్పు ఇవ్వవచ్చు. ఇది వారి పెరుగుదలకు మంచిది.

వాల్‌నట్, బాదం పొడి:

పిల్లలకు సూప్ లేదా పాలు తయారు చేసేప్పుడు అందులో బాదం ,వాల్‌నట్ పొడిని కలపవచ్చు. పిల్లలకు రోజూ ఒక టీస్పూన్ వాల్‌నట్ పొడి ఇవ్వవచ్చు. ఒక సంవత్సరం పైబడిన పిల్లలకు బాదంపప్పును నీటిలో నానబెట్టి ఇవ్వడం కూడా మంచిది.