5ఏళ్లలోపు పిల్లలకు పేరెంట్స్ ఏం నేర్పాలో తెలుసా?

పిల్లలు జీవితంలో సెటిల్ అయ్యేంత వరకు పేరెంట్స్ వారికి గైడెన్స్ ఇస్తూనే ఉంటారు. వారికి ప్రతి విషయంలోనూ అండగా ఉంటూ, సలహాలు ఇస్తూనే ఉంటారు. అయితే..కొన్ని విషయాలు మాత్రం పిల్లలకు చిన్నతనంలోనే నేర్పించాలట. ఎందుకు అంటే.. పిల్లల ఐదేళ్ల జీవితం చాలా ముఖ్యమైనది. ఐదేళ్ల లోపు వయసు అనేది వారికి పునాది లాంటిది. పునాది గట్టిగా ఉంటేనే వారి జీవితం బాగుంటుంది. మనం ఎలాంటి మంచి విషయాలు నేర్పించాలన్నా.. ఇదే కరెక్ట్ వయసు. మరి కచ్చితంగా పేరెంట్స్ ఐదేళ్ల లోపు తల్లిదండ్రులకు ఎలాంటి విషయాలు, లక్షణాలు నేర్పించాలి అనే విషయం  చూద్దాం...

ఐదేళ్లలోపు పిల్లలకు నేర్పించాల్సిన  లక్షణాలు..

పెద్దలను గౌరవించడం, వినయం..

పిల్లలకు చిన్న వయసులో కచ్చితంగా నేర్పించాల్సిన మొదటి లక్షణం పెద్దలను గౌరవించడం, వినయంగా ఉండటం. ముఖ్యంగా పెద్దలతో మాట్లాడే సమయంలో   ఎల్లప్పుడూ మర్యాదగా, గౌరవంగా ప్రవర్తించాలని నేర్పించాలి. దీనితో పాటు, మర్యాదపూర్వకమైన పదాలు, క్షమించండి, ధన్యవాదాలు, దయచేసి వంటి సాధారణ పదాలను పిల్లలకు తప్పనిసరిగా నేర్పించడం అవసరం.

షేరింగ్ ఈజ్ కేరింగ్

షేరింగ్ ఈజ్ కేరింగ్ కూడా పిల్లలకు నేర్పించాలి. మన దగ్గర ఉన్నదానిని ఇతరులతో పంచుకోవడం గురించి పిల్లలకు తప్పనిసరిగా నేర్పించాలి. ఎందుకంటే ఈ లక్షణం పిల్లల స్నేహాన్ని పెంపొందించడానికి, సామాజిక పరిస్థితులను ఎదుర్కోవడానికి ఎంతో ఉపయోగపడుతుంది. ఉదాహరణకు బొమ్మలు, స్నాక్స్ లేదా ఇతర వస్తువులను పంచుకోవడానికి వారిని ప్రోత్సహించాలి.

భావాలను వ్యక్తపరచడం

పిల్లలు తమ భావాలను ఎలా వ్యక్తపరచాలో తల్లిదండ్రులు నేర్పించాలి. అంటే కోపం, బోర్, నిరాశ, అసహనం వంటి పదాలను భావాల ద్వారా ఎలా వ్యక్తపరచాలో నేర్పించండి.

పరిశుభ్రత 

పిల్లలకు విద్యతో పాటు పరిశుభ్రత వంటి కొన్ని ప్రాథమిక విషయాలను కూడా నేర్పించడం ముఖ్యం. అంటే, భోజనానికి ముందు, టాయిలెట్ ఉపయోగించిన తర్వాత తప్పనిసరిగా సబ్బుతో చేతులు కడుక్కోవాలి. దీనితో పాటు, బయట ఆడుకున్న తర్వాత చేతులు, కాళ్ళు కడుక్కోవాలి. అంతేకాకుండా, పళ్ళు సరిగ్గా తోముకోవాలి, ప్రతిరోజూ స్నానం చేయాలి. ఇలాంటి మంచి విషయాల ప్రాముఖ్యతను నేర్పించి, ప్రోత్సహించాలి. ఇది వారి మంచి ఆరోగ్యానికి దోహదపడుతుంది.

సలహాలు వినడం

మీ పిల్లలు మీరు చెప్పే మాటలు, సలహాలు వినేలా అలవాటు చేయండి. అలాగే పెద్దల మాటలకు విలువివ్వాలని చెప్పండి. దీని ద్వారా వారిలో బాధ్యత పెరుగుతుంది.

స్వీయ నిర్ణయం

పిల్లల చిన్న వయసు నుండే వారికి ఈ లక్షణాలను ప్రోత్సహించడం వలన వారు సమర్థవంతంగా ఎదగడానికి సహాయపడుతుంది. ఉదాహరణకు వారి దుస్తులను ఎంచుకోవడం. దీని ద్వారా వారు స్వతంత్ర ఆలోచనతో ఎదుగుతారు.

సమయం  ప్రాముఖ్యత

చిన్నప్పటి నుండే పిల్లలకు సమయం  ప్రాముఖ్యతను నేర్పించడం అవసరం. వారికి ఒక టైమ్ టేబుల్ వేసి, దాని ప్రకారం సమయం  ప్రాముఖ్యతను నేర్పించండి. దానిని పాటించడానికి ప్రోత్సహించండి.

 ఆసక్తిని పెంపొందించడం

పిల్లల ఆసక్తిని తెలుసుకొని, దానిలో వారిని ప్రోత్సహించడం ప్రతి తల్లిదండ్రుల కర్తవ్యం. మీ పిల్లలు కొత్త విషయాలు నేర్చుకోవడానికి, ప్రశ్నలు అడగడానికి వారిని ప్రోత్సహించాలి. దీనివల్ల పిల్లల సృజనాత్మకత పెరుగుతుంది.