పిల్లలకు చెవులు కుట్టించేముందు ఇవి కచ్చితంగా తెలుసుకోండి!
పిల్లలకు చెవులు కుట్టించడం మన సంప్రదాయం. చాలామంది తల్లిదండ్రులు.. ఏడాదిలోపు పిల్లలకు చెవులు కుట్టిస్తుంటారు. పిల్లలకు చెవులు కుట్టించేటప్పుడు తల్లిదండ్రులు తీసుకోవాల్సిన కొన్ని జాగ్రత్తల గురించి ఇక్కడ తెలుసుకుందాం.
చెవులు కుట్టేటప్పుడు తీసుకోవాల్సిన జాగ్రత్తలు
పిల్లలకు చెవులు కుట్టించడం తరతరాలుగా వస్తున్న సంప్రదాయం. మరీ ముఖ్యంగా ఆడపిల్లలకు చిన్న వయసులోనే చెవులు కుట్టిస్తారు. కాస్త పెద్దగా అయ్యాక కొందరు ముక్కు కూడా కుట్టించుకుంటారు. అయితే పిల్లలకు చెవులు కుట్టేటప్పుడు తల్లిదండ్రులు కొన్ని జాగ్రత్తలు కచ్చితంగా తీసుకోవాలి. అవెంటో ఇక్కడ చూద్దాం.
6 నెలల లోపు పిల్లలకు చెవి కుట్టించడం:
కొందరు తల్లిదండ్రులు.. పిల్లలకు పుట్టిన ఆరు నెలల్లోపే చెవులు కుట్టిస్తుంటారు. కానీ అలా చేయడం మంచిది కాదని నిపుణులు చెబుతున్నారు. ఆరు నెలలలోపు పిల్లల శరీరంలో తగినంత రోగనిరోధక శక్తి ఉండదు. దీనివల్ల ఇన్ఫెక్షన్ వచ్చే అవకాశం ఉంది.
గ్లౌజులు తప్పనిసరి:
పిల్లలకి చెవులు కుట్టే వ్యక్తి తప్పనిసరిగా గ్లౌజులు వేసుకోవాలని చెప్పండి. అలాగే చెవి కుట్టడానికి ఉపయోగించే వస్తువులు శుభ్రంగా ఉన్నాయో లేదో చెక్ చేసుకోండి. ఫస్ట్ ఎయిడ్ బాక్సును తప్పనిసరిగా దగ్గర ఉంచుకోండి. చెవులు కుట్టే వ్యక్తి అనుభవాన్ని కూడా పరిగణలోకి తీసుకోండి.
పిల్లలు ఇబ్బంది పడకుండా..
పిల్లలకి చెవులు కుట్టాల్సిన చోట ముందే మార్క్ చేసుకోవడం మంచిది. కుట్టాల్సిన చోట కాకుండా కాస్త అటు ఇటుగా కుడితే.. పిల్లలు ఇబ్బంది పడాల్సి వస్తుంది.
జాగ్రత్త అవసరం
పిల్లలకి చెవులు కుట్టిన తర్వాత గాయం, నొప్పి పూర్తిగా తగ్గే వరకు వారిని ఎక్కువగా ఆడుకోనివ్వకండి. బయటకు వెళ్లనివ్వకండి. ఒకవేళ వారిని ఆడుకోనిస్తే జాగ్రత్తగా ఉండండి. కొన్నిసార్లు చెవులు కుట్టిన దగ్గర మచ్చ ఏర్పడవచ్చు. అలా వచ్చినప్పుడు నిపుణులను సంప్రదించడం మంచిది.
