మీరు ఈ 7 తప్పులు చేస్తే మీ పిల్లలు కూడా వాటిని నేర్చుకుంటారు

మీకు తెలుసా? పిల్లలు తమ క్యారెక్టర్ ని తల్లిదండ్రులను చూసే క్రియేట్ చేసుకుంటారు. మరి తల్లిదండ్రుల ప్రవర్తన పిల్లల ముందు ఎంత మెచ్యూర్డ్ గా ఉండాలి? పిల్లలు చక్కటి ప్రవర్తన కలిగి ఉండాలంటే తల్లిదండ్రులు ఏ 7 పనులు పిల్లల ముందు అస్సలు చేయకూడదు. 

పిల్లలు తమ చుట్టూ ఉన్న వాతావరణం, జనాన్ని బట్టి ప్రవర్తనను మార్చుకుంటారు. చుట్టూ ఉండే రకరకాల మనుషులు ఎలా ప్రవర్తిస్తున్నారు? ఎలా మట్లాడుతున్నారు? ఎలా నవ్వుతున్నారు? ఎలా రియాక్ట్ అవుతున్నారు? ఇలాంటివన్నీ తమ చుట్టూ ఉండే వారి నుంచే నేర్చుకుంటారు. ముఖ్యంగా తల్లిదండ్రుల చర్యల ద్వారా ఎక్కువగా ప్రభావితమవుతారు. చిన్న వయసులో క్రియేట్ అయిన కొన్ని ప్రవర్తనలు శాశ్వతంగా ఉండిపోతాయి. అవి మారడం కష్టం. కొన్ని సందర్భాల్లో అవే పిల్లల ఎదుగుదలకు సహకరిస్తాయి. నాశనం కూడా చేస్తాయి. అందుకే పిల్లల ముందు తల్లిదండ్రులు ఈ 7 పనులు అస్సలు చేయకూడదు.

1. గొడవలు పడొద్దు

పిల్లల ముందు ఎప్పుడూ వాదనలు పెట్టుకోకూడదు. అరవడం, గొడవపడటం లాంటివి చేయకూడదు. దీనివల్ల పిల్లలు తమకు కూడా రక్షణ ఉండదని భావిస్తారు. ఇది వారిలో ఒత్తిడిని పెంచుతుంది. భావోద్వేగాలు బయటపెట్టడానికి కూడా భయపడతారు. ఇలా కాకుండా ప్రశాంతంగా, గౌరవంగా మాట్లాడుకోండి.

2. తీవ్రమైన కోపం చూపించొద్దు

పిల్లలు వారు చూసేదాన్ని అనుకరిస్తారు. తల్లిదండ్రులు గాని కంట్రోల్ చేసుకోలేని కోపాన్ని చూపిస్తే పిల్లలు కూడా అలాంటివే అనుకరిస్తారు. 

3. ఇతరులను విమర్శించొద్దు

కుటుంబ సభ్యులతో సహా ఇతరుల గురించి ప్రతికూలంగా మాట్లాడటం వల్ల పిల్లలు సానుభూతి, దయ చూపించడం కంటే వెక్కిరించడం, విమర్శించడం నేర్చుకుంటారు.

4. అబద్ధం చెప్పొద్దు 

పిల్లలు తమ తల్లిదండ్రుల నుండి నిజాయితీని నేర్చుకుంటారు. వారు అబద్ధాలు అడినా, తీర్చలేని వాగ్దానాలు చేసినా వారు నమ్మడం మానేస్తారు. తరువాత జీవితంలో ఎవరినీ నమ్మకపోవడం లాంటి సమస్యలను ఎదుర్కొంటారు. 

5. వారి చెప్పేది వినకపోతే బాధపడతారు

తల్లిదండ్రులు పిల్లల భావోద్వేగాలను పట్టించుకోకపోతే చాలా బాధపడతారు. ఇదే కొనసాగితే వారు మొండి వారిగా తయారైపోతారు. ఇది వారి క్యారెక్టర్ నే మార్చేస్తుంది. పెద్దయ్యాక వారి భావాలను వ్యక్తీకరించడంలో ఇబ్బంది పడతారు. దీని కెరీర్ లో కూడా సమస్యలు ఎదుర్కొంటారు. ఎదుగుదల లేక డిప్రెషన్ లోకి కూడా వెళ్లే ప్రమాదం ఉంటుంది. పిల్లలు ఏం చెప్పినా శ్రద్ధగా తల్లిదండ్రులు వినాలి. తర్వాత వారి డౌట్స్ తీర్చాలి. 

6. కఠినమైన పదాలు వాడొద్దు

మాటలకు చాలా శక్తి ఉంటుంది. నిరంతరం విమర్శించడం లేదా పేరు పెట్టడం లాంటివి చేస్తుంటే పిల్లల ఆత్మవిశ్వాసం కోల్పోతారు. అది వారి ఆత్మగౌరవాన్ని తీవ్రంగా ప్రభావితం చేస్తుంది.

7. మీరు ఫోన్ కు అతుక్కుపోకండి 

తల్లిదండ్రులు తమ ఫోన్‌లు, టీవీలకు అతుక్కుపోతే పిల్లలు కూడా అలాగే తయారవుతారు. కొన్నాళ్లకి తల్లిదండ్రులు శ్రద్ధ చూపాలనుకున్నా పిల్లలు కఠినంగా మారిపోతారు. ఇది పిల్లల భావోద్వేగాలపై ప్రభావం చూపుతాయి. తల్లిదండ్రులు ఈ 7 పనులు అస్సలు చేయకండి.