Psychology: హ్యాపీగా ఉన్నా.. డిప్రెషన్ ఫీలింగ్ ఎందుకు వస్తుంది? సైకాలజీ ఏం చెప్తోంది?
Psychology: చాలామంది జీవితంలో అన్నీ బాగానే ఉన్నా.. కొన్ని సార్లు మనసులో మాత్రం ఏదో కోల్పోయిన ఫీలింగ్ ఉంటుంది. బయటకు చూస్తే హ్యాపీగా ఉన్నట్టు కనిపించినా లోపల మాత్రం తెలియని డిప్రెషన్ ఫీలింగ్ ఉంటుంది. దీని గురించి సైకాలజీ ఏం చెబుతోందో చూద్దాం.
హ్యాపీగా ఉన్నా డిప్రెషన్ ఫీలింగ్ ఎందుకు?
చాలామందికి మంచి ఉద్యోగం, స్నేహితులు, కుటుంబం ఉంటుంది. బయటకు చాలా సంతోషంగా ఉంటారు. కానీ లోపల మాత్రం ఏదో తెలియని వెలితి ఉంటూనే ఉంటుంది. కారణం లేకుండా బాధగా అనిపిస్తుంటుంది. ఇలా హ్యాపీగా ఉన్నా కూడా డిప్రెషన్ ఫీలింగ్ రావడం వెనుక కారణం ఏంటి? సైకాలజీ నిపుణులు ఏం చెబుతున్నారో ఇక్కడ తెలుసుకుందాం.
భావాలను అణచివేయడం
చాలామంది తమ బాధను, ఆందోళనను, కోపాన్ని బయటకు చెప్పకుండా లోపలే దాచుకుంటారు. కొంతకాలం ఇలా చేయడం వల్ల మనసు బలంగా ఉందని అనిపించినా, దీర్ఘకాలంలో అది మానసిక ఒత్తిడిగా మారుతుంది. ఈ ఒత్తిడి కారణంగా మనసు ఎప్పుడూ అలసిపోయినట్టుగా, వెలితిగా ఉన్నట్టుగా అనిపిస్తుంది.
డోపమైన్ అసమతుల్యం
డోపమైన్ అనేది మన మెదడులో ఆనందాన్ని, ప్రోత్సాహాన్ని కలిగించే రసాయనం. సోషల్ మీడియా, తాత్కాలిక ఆనందాలు, లేదా ఒకటే రొటీన్ వల్ల డోపమైన్ లెవల్స్ అసమతుల్యంగా మారవచ్చు. ఫలితంగా, బయట పరిస్థితులు బాగున్నా కూడా మనసుకు అసంతృప్తిగా అనిపించవచ్చు.
ఓవర్ థింకింగ్
సైకాలజీ ప్రకారం మనం గతంలో జరిగిన విషయాలు లేదా భవిష్యత్తు గురించి ఎక్కువగా ఆలోచిస్తే, ప్రస్తుత క్షణంలో ఉండే ఆనందాన్ని మన మెదడు పొందలేకపోతుంది. అందుకే కొందరు బయటకు సంతోషంగా ఉన్నా లోపల మాత్రం అసంతృప్తిగా ఉంటారు. అలాగే కొంతమంది జీవితంలో అన్నీ ఉన్నా కూడా ఇంకా ఎక్కువ కావాలి అనే భావనలో ఉంటారు. దానివల్ల ప్రస్తుత జీవితంలో ఉన్న మంచి విషయాలు కనిపించవు. ఇది మనసులో అసంతృప్తిని పెంచుతుంది.
పని ఒత్తిడి
నిరంతరం పని ఒత్తిడి, బాధ్యతలు, లేదా ఇతరుల కోసం జీవించడం వల్ల మనసు పూర్తిగా అలసిపోతుంది. ఈ అలసట డిప్రెషన్ ఫీలింగ్గా బయటపడుతుంది. ఇలాంటి సందర్భాల్లో వ్యక్తి విశ్రాంతి తీసుకున్నా కూడా మానసికంగా రీఛార్జ్ కాలేడు. అలాగే మన చుట్టూ మనుషులు ఉన్నా కూడా మనసుకు నిజంగా అర్థమయ్యే వ్యక్తులు లేకపోతే ఒంటరితనం అనిపిస్తుంది. ఈ ఒంటరితనం డిప్రెషన్ ఫీలింగ్ను పెంచుతుంది.
ఈ ఫీలింగ్ పోవాలంటే ఏం చేయాలి?
సైకాలజీ ప్రకారం, మనిషికి భావోద్వేగంగా కనెక్ట్ అయ్యే సంబంధాలు చాలా అవసరం. స్నేహితులతో మాట్లాడటం, డైరీ రాయడం లేదా కౌన్సిలింగ్ తీసుకోవడం మంచిది. సోషల్ మీడియా, తాత్కాలిక ఆనందాలపై ఆధారపడటం తగ్గించాలి. రోజూ కొంతసేపు ధ్యానం చేయడం ద్వారా మనసు ప్రస్తుత క్షణంలో ఉంటుంది.
