Nail Cutting : రాత్రిపూట గోళ్లు ఎందుకు కత్తిరించొద్దు? 99% మందికి తెలియని అసలు కారణం ఇదే
రాత్రిపూట గోళ్లు కత్తిరించకూడదని పెద్దలు చెెబుతుంటారు. అయితే ఇది మూడనమ్మకం కాదు… దీని వెనక ఆరోగ్యపరమైన కారణాలున్నాయట. మన పెద్దలు చెప్పిన ఈ పాత మాట వెనుక ఉన్న అసలు కారణాలు ఏంటో తెలుసుకుందాం.
రాత్రిపూట గోళ్లు కత్తిరించకూడదు అనడానికి కారణాలేంటి?
‘రాత్రిపూట గోళ్లు తీయొద్దు’… ఈ మాటలు చిన్నప్పుడు చాలామంది వినే ఉంటారు. ఇలా పెద్దలు చెప్పే మాటలను మూఢనమ్మకంగా భావించివుంటారు. కానీ దీనివెనక కొన్ని భద్రత, పరిశుభ్రతకు సంబంధించిన కారణాలున్నాయని నిపుణులు అంటున్నారు. కాలం మారినా ఈ అలవాటు వెనుక ఉన్న ఉద్దేశాన్ని అర్థం చేసుకోవడం ముఖ్యం.
రాత్రిపూట గోళ్లు కత్తిరించొద్దని పెద్దలు ఎందుకు చెబుతారో తెలుసా?
ఇప్పటిలా కరెంట్ లేని రోజుల్లో ఇళ్లలో కిరోసిన్ దీపాలే వాడేవాళ్లు. అప్పట్లో గోళ్లు కత్తిరించడానికి నేటి నెయిల్ కట్టర్లు ఉండేవి కావు. ప్రజలు కత్తిలాంటి పదునైన వస్తువులతో గోళ్లు కత్తిరించేవాళ్లు. తక్కువ వెలుతురులో వేళ్లకు గాయాలయ్యే ప్రమాదం ఎక్కువగా ఉండేది. అందుకే రాత్రిపూట గోళ్లు కత్తిరించొద్దనే అలవాటు వచ్చింది.
పరిశుభ్రతా కారణాలు..
గోళ్లు కత్తిరించినప్పుడు ఆ చిన్న ముక్కలు నేలపైన, పరుపుపై లేదా ఆహార పదార్థాల దగ్గర పడొచ్చు. ఇవి చిన్నగా ఉంటాయి కాబట్టి రాత్రిపూట కనిపించవు… వాటిని పూర్తిగా తీసేయకపోతే అపరిశుభ్రత ఏర్పడుతుంది. ముఖ్యంగా పిల్లలున్న ఇళ్లలో ఇది మరింత జాగ్రత్తగా ఉండాల్సిన విషయం.
రాత్రిపూట గోళ్లు కత్తిరించడంపై ఆయుర్వేదం ఏం చెబుతోంది?
కొన్ని ఆయుర్వేద సంప్రదాయాల ప్రకారం… రాత్రి సమయాన్ని శరీరం విశ్రాంతి తీసుకునే కాలంగా భావిస్తారు. ఆ సమయంలో గోళ్లు, జుట్టు కత్తిరించడం వంటివి చేయకూడదని చెబుతారు. అయితే దీనికి ఆధునిక శాస్త్రీయ ఆధారాలు చాలా తక్కువ.
గోళ్లను ఎలా కత్తిరించుకోవాలి..?
నిపుణుల ప్రకారం… స్నానం చేశాక గోళ్లు మెత్తగా ఉంటాయి కాబట్టి అప్పుడు కత్తిరించడం సురక్షితం. గోళ్లు కత్తిరించే ముందు తర్వాత చేతులు శుభ్రం చేసుకోవాలి. కత్తిరించిన గోళ్లను వెంటనే చెత్తబుట్టలో వేయడం మంచి ఆరోగ్యకరమైన అలవాటు. పాత సలహాల వెనుక కారణాలను అర్థం చేసుకుని, వాటిని మన జీవనశైలికి తగ్గట్టు పాటించడమే ఉత్తమం.
