మీ కిడ్నీలు ఆరోగ్యంగా ఉండాలంటే ఈ పండ్లను తప్పకుండా తినండి

మారుతున్న జీవన శైలికి అనుగుణంగా మన ఆరోగ్యం విషయంలో కూడా చాలా జాగ్రత్తగా ఉండాలి. లేకపోతే ఎన్నో అనారోగ్య సమస్యలొచ్చే ప్రమాదం ఉంది. మన శరీరంలో అతి ముఖ్యమైన భాగం అయిన మూత్రపిండాల ఆరోగ్యం విషయంలో ఏ మాత్రం నిర్లక్ష్యంగా ఉండకూడదు. ఎందుకంటే మూత్రపిండాలు మన శరీరం నుంచి మలినాలను బయటకు పంపే అవయవం. మూత్రపిండాలు గనుక సరిగ్గా పనిచేయకపోతే ఇతర అవయవాల పనితీరు కూడా ప్రభావితం అవుతుంది. మన మూత్రపిండాల ఆరోగ్యం దెబ్బతినడానికి ఎన్నో కారణాలున్నాయి. ముఖ్యంగా డయాబెటిస్, అధిక రక్తపోటు వంటి అనేక జీవనశైలి వ్యాధులే మూత్రపిండాల పనితీరును ప్రభావితం చేస్తాయి. 

మూత్రపిండాల వ్యాధులను సమర్థవంతంగా నియంత్రించడానికి ఆహారం కీలక పాత్ర పోషిస్తుంది. మూత్రపిండాల ఆరోగ్యం బాగుండాలంటే మీ ఆహారంలో ఉప్పును చాలా వరకు తగ్గించాలి. అలాగే నీటిని పుష్కలంగా తాగాలి. ఇవన్నీ చేస్తేనే మీ మూత్రపిండాల ఆరోగ్యం మెరుగ్గా ఉంటుంది. మూత్రపిండాల ఆరోగ్యం కోసం కోలాలతో సహా కృత్రిమ శీతల పానీయాలకు వీలైనంత దూరంగా ఉండాలి. అలాగే తీపి పదార్థాలను ఎక్కువగా తినకూడదు. శాఖాహారాలనే ఎక్కువగా తినాలి. అయితే కొన్ని పండ్లు మన కిడ్నీలను ఆరోగ్యంగా ఉంచుతాయి. వీటిని రోజూ తినాలని నిపుణులు చెబుతున్నారు. అవేంటంటే.. 

స్ట్రాబెర్రీలు

స్ట్రాబెర్రీలు , బ్లూబెర్రీస్ వంటి బెర్రీలలు మన ఆరోగ్యానికి ఎంతో ప్రయోజనకరంగా ఉంటాయి. వీటిలో యాంటీఆక్సిడెంట్లు పుష్కలంగా ఉంటాయి. ఈ బెర్రీల్లో మూత్రపిండాలను ఆరోగ్యంగా ఉంచే విటమిన్ సి, ఫైబర్  కంటెంట్ ఎక్కువ మొత్తంలో ఉంటుంది. ఈ బెర్రీలు కిడ్నీ స్టోన్స్ ఏర్పడే ప్రమాదాన్ని తగ్గిస్తాయి.  
 

ఆపిల్ 

ఆపిల్ పండ్లలో యాంటీ ఆక్సిడెంట్లు, ఫ్లేవనాయిడ్లు, విటమిన్ సి పుష్కలంగా ఉంటాయి. ఇలాంటి పండును రోజూ ఒకటి తింటే ఎన్నో అనారోగ్య సమస్యలు తొలగిపోతాయి. ముఖ్యంగా మూత్రపిండాల ఆరోగ్యం బాగుంటుంది కూడా. విటమిన్ బి, కాల్షియం పుష్కలంగా ఉండే యాపిల్స్ గుండె ఆరోగ్యానికి కూడా ఎంతో మేలు చేస్తాయి.
 

అనాస పండు

మీ రోజు వారి ఆహారంలో పైనాపిల్ ను చేర్చుకోవడం వల్ల మీ మూత్రపిండాలు ఆరోగ్యంగా ఉంటాయి. విటమిన్ సి పుష్కలంగా ఉండే పైనాపిల్ మూత్రపిండాల అనారోగ్య సమస్యలను దూరం చేస్తుంది. 
 

ద్రాక్ష 

యాంటీ ఆక్సిడెంట్లు పుష్కలంగా ఉండే ద్రాక్ష మూత్రపిండాల ఆరోగ్యానికి కూడా చాలా చాలా మంచిది. ఇది రోగనిరోధక శక్తిని మెరుగుపరుస్తుంది. అలాగే అధిక రక్తపోటును నియంత్రిస్తుంది. అంతేకాదు గుండె జబ్బులను నివారించడానికి కూడా ఈ పండు సహాయపడుతుంది. 
 

నారింజ

నారింజతో సహా సిట్రిస్ పండ్లలో విటమిన్ సి పుష్కలంగా ఉంటుంది. ఈ విటమిన్ సి మన రోగనిరోధక శక్తిని పెంచడమే కాదు మన మూత్రపిండాలను కూడా ఆరోగ్యంగా ఉంచుతుంది.