Dinner: రాత్రి ఏ టైమ్ తింటే బరువు తగ్గుతారో తెలుసా?

ఆరోగ్యంగా బరువు తగ్గాలి అంటే.. మనం ఏ సమయానికి  రాత్రి భోజనం చేస్తున్నాం అనేది కూాడా ముఖ్యమే.

మంచి ఆరోగ్యానికి రాత్రి భోజనం సరైన టైమ్: మన తాతలు, నానమ్మలు 90 -100 ఏళ్ల వరకు ఎలాంటి రోగాలు లేకుండా బతికారు. కానీ ఇప్పుడు 20-30 ఏళ్లకే షుగర్, కీళ్ల నొప్పులు, గౌట్, కిడ్నీ సమస్యలు, గుండె జబ్బులు లాంటి ఎన్నో రోగాలొస్తున్నాయి. మన పూర్వీకులు అంత ఆరోగ్యంగా ఉండడానికి కారణం ఏంటో తెలుసా? పెద్ద సీక్రెట్ ఏమీ లేదు. వాళ్లు బాగా కష్టపడేవాళ్లు, కెమికల్స్ లేని తిండి తినేవాళ్లు. ముఖ్యంగా టైమ్‌కి తినేవాళ్లు. అందుకే వాళ్లు ఆరోగ్యంగా ఉండేవారని నిపుణులు చెబుతున్నారు.

రాత్రి లేట్‌గా తింటే ఏమవుతుంది?

మన పూర్వీకులు వందేళ్లు బతకడానికి కారణం వాళ్లు టైమ్‌కి తినడమే. టైమ్‌కి తినకపోతే ఆరోగ్యం పాడవుతుంది. ఇప్పుడు చాలామంది రాత్రిళ్లు హోటళ్లలో తింటున్నారు. టైమ్ లేదు గీమ్ లేదు.. ఎప్పుడు పడితే అప్పుడు తింటున్నారు. కానీ రాత్రిళ్లు సరైన టైమ్‌కి తినకపోతే చాలా ఆరోగ్య సమస్యలు వస్తాయని డాక్టర్లు హెచ్చరిస్తున్నారు. ఆరోగ్యంగా ఉండాలంటే రాత్రి ఎప్పుడు తినాలనేది ఇక్కడ చూద్దాం.

రాత్రి తినడానికి బెస్ట్ టైమ్ ఏది?

మీరు జీవితాంతం ఎలాంటి రోగాలు లేకుండా ఆరోగ్యంగా ఉండాలనుకుంటే, పడుకునే ముందు 2-3 గంటల ముందు రాత్రి భోజనం తినేయండి. సాయంత్రం 6 గంటల నుంచి రాత్రి 8 గంటల మధ్యలో తింటే మంచిదని చెబుతున్నారు.

రాత్రి పాలు తాగొచ్చా?

చాలామందికి రాత్రి పాలు తాగే అలవాటు ఉంటుంది. మీరు పడుకునే ముందు గంట ముందు పాలు తాగేయండి. పడుకునే ముందు తాగకూడదని నిపుణులు చెబుతున్నారు.

కొందరు రాత్రి 10 గంటల వరకు ఆఫీసు పని చేస్తారు. అలాంటి వాళ్లకు మధ్యలో ఆకలేస్తుంది. అలాంటి టైమ్‌లో బరువుగా తినకూడదు. తింటే బరువు పెరగడం లాంటి సమస్యలొస్తాయి. రాత్రి పని చేసేటప్పుడు ఆకలేస్తే లైట్‌గా తినండి. అది కూడా హెల్దీగా.

బరువు తగ్గాలంటే ఎప్పుడు తినాలి?

మీరు బరువు తగ్గడానికి ట్రై చేస్తుంటే సాయంత్రం 7 గంటలకల్లా రాత్రి భోజనం పూర్తి చేయండి. అప్పుడే బాడీలో జీవక్రియలు బాగా పనిచేస్తాయి. కొవ్వు కూడా పేరుకుపోదు. రాత్రిపూట కార్బోహైడ్రేట్లు ఎక్కువగా తినకూడదు. రాత్రి తినేటప్పుడు టీవీ, ఫోన్ చూడకూడదు. చూస్తే ఎక్కువ తినేస్తారు. అప్పుడు జీర్ణం సరిగ్గా కాదు. బరువు పెరుగుతారు.

గుర్తుంచుకోండి..

రాత్రి సరైన టైమ్‌కి తింటే హాయిగా నిద్రపోవచ్చు. లేదంటే నిద్ర పాడవుతుంది. అజీర్తి సమస్య కూడా వస్తుంది. తిన్న వెంటనే పడుకోకూడదు. అది ఆరోగ్యానికి మంచిది కాదు.